அமெரிக்காவில் இன்று நடந்த, சில வரலாற்று நிகழ்வுகள்

அமெரிக்காவின் முதல் பெண், ஆசிய வம்சாவளி, ஆப்பிரிக்க வம்சாவளி துணை அதிபராக பதவியேற்றார் கமலா ஹாரிஸ்.

கமலா ஹாரிசுக்கு முதல் லத்தீன் உச்சநீதிமன்ற நீதிபதியான சோனியா சோடோமாயர் பதவிப்பிரமாணம் செய்து வைத்தார்.

அதைத் தொடர்ந்து அமெரிக்காவின் 46வது அதிபராக ஜனநாயகக் கட்சியின் ஜோ பைடன் பதவியேற்றார்.

அதிபர் ஜோ பைடனுக்கு பாரம்பரிய வழக்கப்படி உச்ச நீதிமன்றத்தின் தலைமை நீதிபதி ஜான் ராபர்ட்ஸ் பதவிப் பிரமாணம் செய்து வைத்தார்.

வாஷிங்டனில் உள்ள நாடாளுமன்ற வளாகமாக கேப்பிட்டால் வளாகத்தில் இந்த பதவியேற்பு நிகழ்வு நடக்கிறது.

இரு வாரங்களுக்கு முன்னர் டிரம்ப் ஆதரவாளர்களால் இங்குதான் வன்முறை நடத்தப்பட்டது.

டொனால்டு டிரம்ப் புறக்கணிப்பு

வழக்கமாக புதிய அதிபரை முன் வாசல் வழியாக பதவியை இழக்கும் அதிபர் வரவேற்பார். ஆனால், இந்நிகழ்வில் டொனால்டு டிரம்ப் கலந்து கொள்ளவில்லை.

1869க்கு பின் தமக்கு பின் பதவியேற்பவரின் நிகழ்வில் கலந்துகொள்ளாத முதல் அதிபர் டிரம்ப் ஆவார்.

கொரோனா வைரஸ் பரவல் மற்றும் பாதுகாப்பு அச்சுறுத்தல்களின் காரணமாக முன்னெப்போதுமில்லாத அளவுக்கு பல்லாயிரக்கணக்கான பாதுகாப்புப்படை வீரர்கள் களமிறக்கப்பட்டு வாஷிங்டன் டி.சி முழுவதும் பாதுகாப்பு வளையத்திற்குள் கொண்டுவரப்பட்டுள்ளது.

விழாவுக்கு வருகை தந்த அனைவருக்கும் கொரோனா பரிசோதனை மேற்கொள்ளப்பட்டு, சமூக இடைவெளி விதிமுறைகளும் அமலில் இருந்தன.

பதவியேற்பு விழாவை நேரடியாக பார்க்க அனுமதிக்கப்படுவோரின் எண்ணிக்கையும் குறைக்கப்பட்டுள்ளது.

முன்னாள் அமெரிக்க அதிபர்கள் பராக் ஒபாமா, பில் கிளின்டன், மற்றும் ஜார்ஜ் டபுள்யூ புஷ் ஆகியோர் பைடனின் பதவியேற்பு நிகழ்வில் பங்கேற்றார்கள்.

கொரோன வைரஸால் உயிரிழந்தவர்களுக்காக ஒரு நிமிட மௌன அஞ்சலி செலுத்துமாறும் நிகழ்வில் பங்கேற்றவர்களை ஜோ பைடன் கேட்டுக் கொண்டார்.

இந்த நிகழ்வில் அமெரிக்க தேசிய கீதத்தை பாடகி லேடி காகா பாடினார்.

கறுப்பினத்தைச் சேர்ந்த இளம் பெண் கவிஞர் அமண்டா கார்மன் இந்த நிகழ்வில் உரையாற்றினார். 22 வயதாகும் இவர்தான் அதிபர் பதவியேற்பு விழா ஒன்றில் உரையாற்றியவர்களிலேயே இளம் வயது நபர் ஆவர்.

அதிபரான பின் ஜோ பைடன் முதல் உரையில் பேசியது என்ன?

"இது அமெரிக்காவின் நாள். ஜனநாயகத்தின் நாள். வரலாறு மற்றும் நம்பிக்கைக்கான நாள்" என்று அதிபராக பதவியேற்றுள்ள ஜோ பைடன், பதவியேற்ற பின்பான தன் முதல் உரையில் தெரிவித்தார்.

"பல சோதனைகளை சந்தித்துள்ள அமெரிக்கா, சவால்களில் இருந்து மீண்டுள்ளது. இன்று என் வெற்றியை அல்ல, ஜனநாயகத்தை கொண்டாடுவோம்" என்று அவர் கூறினார்.

"ஜனநாயம் எவ்வளவு விலைமதிப்பானது என்று நாம் மீண்டும் கற்றுக் கொண்டுள்ளோம். ஜனநாயகம் சற்று பலவீனமானது, ஆனால். இன்று ஜனநாயகம் வென்றிருக்கிறது" என்று அவர் தெரிவித்தார்.

"சில நாட்களுக்கு முன்பு இந்த இடத்தில் (கேப்பிட்டோல்) வன்முறை வெடித்தது. ஆனால், இங்கு நாம் ஒரே நாடாக, கடவுளுக்கு கீழ் ஒன்றிணைந்து இருக்கிறோம். கடந்த இரண்டு தசாப்தங்களாக எப்படி நடந்ததோ அப்படி இன்றும் அமைதியான முறையில் இந்த பதவியேற்பு விழா நடைபெறுகிறது."

அதிபராக பதவியேற்ற பின் பேசிய முதல் உரையில், பெண் துணை அதிபரான கமலா ஹாரிஸ் குறித்தும் அதிபர் ஜோ பைடன் குறிப்பிட்டார்.

"180 ஆண்டுகளுக்கு முன்பு பெண்கள் வாக்களிக்கும் உரிமை கேட்டு பேரணி நடத்தியபோது, ஆயிரக்கணக்கான போராட்டக்காரர்கள் அவர்களை தடுத்னர். ஆனால், இன்று அமெரிக்க வரலாற்றில் முதல் பெண் துணை அதிபராக இங்கு கமலா ஹாரிஸ் பதவியேற்றுள்ளார். எதுவும் மாறாது என்று கிடையாது" என்று அவர் தெரிவித்தார்.

எனக்கு வாக்களிக்காதவர்களையும் நான் பாதுகாப்பேன் என உறுதி கூறுகிறேன் என்று அவர் பேசினார்.

பர்புள் நிறம் அணிந்த முக்கிய பிரமுகர்கள் - என்ன காரணம்?

புதிய அதிபர் பதவியேற்பு விழாவில் துணை அதிபர் கமலா ஹாரிஸ் உள்ளிட்ட பல முக்கிய நபர்கள் பர்புள் நிற ஆடையை அணிந்திருந்தனர்.

இரு கட்சியும் ஒன்றிணைக்கும் வண்ணமாக பர்புள் நிறம் பார்க்கப்படுகிறது. குடியரசு மற்றும் ஜனநாயக கட்சிகளின் நிறமான முறையே சிவப்பு மற்றும் நீல நிறத்தை சேர்த்தால் பர்புள் நிறம் வெளிப்படும்.

இந்த பதவியேற்பு விழாவின் தீம் "அமெரிக்கா யுனைட்டட்" என்பதை குறிக்கும் விதமாகவே பலரும் பர்புள் நிற ஆடையை அணிந்து வந்துள்ளனர்.