முஸ்லிம்களின் உடல்கள் எரிப்பு - அலிசப்ரி எச்சரிக்கை

(எம்.ஆர்.எம்.வஸீம்)

கொவிட் 19 ஸல் மரணிக்கும் முஸ்லிம்களின் சடலங்களை எரிப்பதற்கு எடுத்திருக்கும் தீர்மானத்தால் முஸ்லிம் இளைஞர்கள் காலப்போக்கில் மனஅழுத்தத்துக்குள்ளாகி அடிப்படைவாத குழுக்களுடன் இணைந்துகொண்டால் அது பாரிய விபரீதத்திலே முடிவடையும்.

அந்த நிலைக்கு செல்ல இடமளிக்கக்கூடாது. அத்துடன் மரணிப்பவர்களின் உடலில் இருந்து வைரஸ் வரவுமா இல்லை என்பதை வைரஸ் தொடர்பான நிபுணர்களே தீர்மானிக்கவேண்டும். மாறாக புவியியலாளர்களுக்கு அதனை தீர்மானிக்க முடியாது என நீதி அமைச்சர் அலி சப்ரி தெரிவித்தார்.

கொவிட்டில் மரணிக்கும் முஸ்லிம்களின் ஜனாசாக்களை எரிக்கும் அரசாங்கத்தின் நிலைப்பாடு மாறாமல் இருப்பது தொடர்பில் கருத்து தெரிவிக்கையிலேயே இவ்வாறு குறிப்பிட்டார்.

இதுதொர்பாக அவர் தொடர்ந்து தெரிவிக்கையில்,

கொவிட் தொடர்பிலான அனைத்து நடவடிக்கைகளையும் எமது நாடு, உலக சுகாதார அமைப்பின் வழிகாட்டலின் பிரகாரமே மேற்கொண்டு வருகின்றது.

அதன் பிரகாரமே மரணிப்பவர்களின் சடலங்களை தகனம் செய்ய அனுமதிப்பதுபோல் அடக்கம் செய்யவும் அனுமதி வழங்கவேண்டும் என்பதே முஸ்லம்களின் வாதமாக இருக்கின்றது.

அது முறையற்ற வாதம் அல்ல. அநியாயமான கோரிக்கையும் இல்ல. இந்த விடயம் இந்தளவு கருத்து முரண்பாட்டுக்கு ஏன் செல்கின்றது என்பதே புரியாமல் இருக்கின்றது.

கொராேனாவில் மரணிப்பவர்களை அடக்கம் செய்ய உலகில் இருக்கும் நாடுகளில் சீனாவை தவிர மற்ற எனைத்து நாடுகளும் அனுமதிக்கும்போது இலங்கை மாத்திரம் இதற்கு அனுமதிக்காமல் இருப்பது பாரிய பிரச்சினையாகும்.

உலக சுகாதார அமைப்பின் வழிகாட்டலில், மரணிப்பவர்களை தகனம் மற்றும் அடக்கம் செய்ய அனுமதித்திருக்கும்போது இலங்கையும் சீனாவும் மாத்திரமே அதனை பின்பற்றாமல் இருக்கின்றது.

இதனை இனவாதமாக பார்க்கக்கூடாது.ஒரு சமூகத்தை இலக்குவைத்து இதனை செய்வதாக இருந்தால் அது நல்லதில்லை.

அத்துடன் கொவிட்டில் மரணித்தவரின் சடலத்தில் இருந்து வைரஸ் பரவும் என்பதை விஞ்ஞான ரீதியில் ஒப்புவிக்க முடியாமல் இருக்கின்றது.

அதனால்தான் உலக சுகாதார அமைப்பும் அடக்கம் செய்ய அனுமதித்திருக்கின்றது. இந்த சடலங்களில் இருந்து வைரஸ் பரவுமா இல்லையா என்பது தொடர்பில் வைரஸ் தொடர்பான நிபுணர்களுக்கே தெரிவிக்க முடியும். மாறாக புவியியலாளர்களுக்கு தீர்மானிக்க முடியாது.

சடலங்களில் இருந்து வைரஸ் பரவ வாய்ப்பில்லை என எமது நாட்டில் இருக்கும் வைரஸ் தொடர்பான சிரேஷ்ட வைத்திய நிபுணரான பேராசிரியர் மலித் பீரிஸ் மற்றும் பபா பலிகவதன மற்றும் பலர் உறுதியாக தெரிவித்திருக்கின்றனர். 

அவ்வாறு இருந்தும் சடலத்தை முற்றாக தொற்று நீக்கம் செய்து, இரண்டு பொலிதின் உறைகளில் சுற்றி ஆழமான குழியில் அடக்கம் செய்தால் எப்படி வைரஸ் பரவும் என கேட்கும் கேள்வியை மறுக்க முடியாது.

அத்துடன் முஸ்லிம்களின் சடலங்களை எமது நாட்டில் எரிப்பது தொடர்பில் இங்கிலாந்து பாராளுமன்றத்தில் பேசப்பட்டிருக்கின்றது.

அதேபோன்று அடக்கம் செய்ய மனுமதிக்குமாறு 51 நாடுகளை உள்ளடக்கிய முஸ்லிம் நாடுகளின் ஒன்றியம், ஐக்கிய நாடுகள் சபை மற்றும் பல சர்வதேச நிறுவனங்கள் எழுத்துமூலம் கேட்டிருக்கின்றன. இது எமது நாட்டின் நற்பெயருக்கு களங்கத்தை ஏற்படுத்தி இருக்கின்றது.

மேலும் எமது இந்த தீர்மானத்தால் முஸ்லிம் இளைஞர்களில் சிலர் அடிப்படைவாதத்தினபால் தள்ளப்படுவார்களோ என்ற அச்சம் எனக்கு இருக்கின்றது. 

மரணிப்பவர்களை அடக்கம் செய்யக்கூட உரிமை இல்லை என்ற மன அழுத்தத்துக்கு இளைஞர்கள் தள்ளப்பட்டு, அடிப்படைவாதிகளுடன் இணைந்துகொண்டால் அது பாரிய விபரீதத்திலேயே முடிவடையும். இதற்கு இடமளிக்கக்கூடாது.

மேலும் மாலைதீவுக்கு கொண்டுசெல்வது தொடர்பாகவும் பேசப்பட்டு வருகின்றது. இதற்கு அனுமதிப்பது சர்வதேச ரீதியில் எமக்கு மேலும் பிரச்சினையை ஏற்படுத்தும்.

மாலைதீவில் அடக்க அனுமதிக்க முடியுமானால் ஏன் எமது நாட்டில் முடியாது என்றே நாங்கள் கேட்கின்றோம் என்றார்.