பசில் அணியை வலுப்படுத்துவதே மாற்று வழி - கலாநிதி நிர்மால் ரஞ்சித்

நாட்டில் தற்போது காணப்படும் அரசியல் நிலைமையில் முன்னாள் அமைச்சர் பசில் ராஜபக்ச தரப்பை வலுப்படுத்துவதே சிறந்த மாற்று வழியாக இருக்கும் என கலாநிதி நிர்மால் ரஞ்சித் தேவசிறி தெரிவித்துள்ளார்.

பசில் ராஜபக்ச தரப்பை வலுப்படுத்த தாம் நிபந்தனையின்றி குரல் கொடுப்பதாகவும் அவர் கூறியுள்ளார்.

தனது முகநூல் பக்கத்தில் இட்டுள்ள பதிவில் தேவசிறி இதனை கூறியுள்ளார். அவர் மேலும் கூறுகையில்,

நாம் விரும்புவது நாம் விரும்பியதை போலவே நடக்காது. அரசியல் என்பது அலையுடன் சேர்ந்து நீந்துவது அல்ல.

அலையுடன் நீந்தி பாதுகாப்பாக ஆற்றை கடப்பதே அரசியல். தற்போதைய அரசியல் நிலைமையில் அரசாங்கத்தின் பசில் அணியை வலுப்படுத்துவதற்காக நான் நிபந்தனையின்றி குரல் கொடுப்பேன்.

சிங்கள - பௌத்தம் அல்லாத மக்களுக்கு நிவாரணத்துடன் கூடிய சந்தர்ப்பம் தேவை என்றால், பசில் அணியை வலுப்படுத்துவதன் மூலமே அதனை செயற்பாட்டு ரீதியாக செய்ய முடியும்.

அத்துடன் 13ஆவது அரசியலமைப்புத் திருத்தச் சட்டத்தை வைத்திருக்க வேண்டும் என எண்ணும் நபர்களுக்கு பசில் அணியை வலுப்படுத்துவதே மாற்றுவழி எனவும் நிர்மால் ரஞ்சித் தேவசிறி குறிப்பிட்டுள்ளார்.