பிளவுபடுதலும், தனிமைப்படுத்தப்படுதலும் இலங்கை முஸ்லிம்கள் எதிர்நோக்கும் ஆபத்து

- வ.ஐ.ச.ஜெயபாலன் -

2013 இறுதியில் இன்றைய ஆழும் தரப்பின் உயர் மட்டத்தால் நான் கைது செய்யப்பட்டேன். அவர்கள் என்னை விடுதலை செய்யும் நோக்கத்தில் கைது செய்யவில்லை. அதனால் மிகுந்த வெளிப்படையாக என்னோடு பேசினார்கள். முஸ்லிம்களின் அதிகரித்த பிறப்பு வீதத்தால் திருகோணமலை மாவட்டத்தில் தமிழர்கள் சிறுபாண்மையாகி வருகிறார்கள்.  முஸ்லிம்களுக்கு எதிராக தமிழரும் சிங்களவரும் இணையவேண்டும் என அவர்கள் கூறியபோது 1950களில் இருந்தே கிழக்கில் சிங்கள குடியேற்றங்களால் சிங்களவரின் சனத்தொகை வளற்ச்சி விகிவிகிதம்தான் அதிகமாக இருக்கு என வாதாடினேன். 

  அதிஸ்ட்டவசமாக 2015ல் அரசு மாற்றம் அடைந்தததால் சிங்கள ஆதிக்க சக்திகளின் நிகழ்ச்சி நிரல் பின்போடப்பட்டது. 2019 ஏப்பிரல் தாக்குதலின்பின்னர் இத்தகைய கருத்துக்கள் சிங்களவரைத் தாண்டி  தமிழர் மலையகத் தமிழர் மத்தியில் மட்டுமன்றி இன்றைய முஸ்லிம் அமைச்சர்கள்போன்ற சில முஸ்லிம்கள் மத்தியிலும் செல்வாக்குபெற்றுள்ளது.   

 சர்வதேச அழுத்தத்தால்  நான் சிறைமீண்டபின் 2014ல் இருந்து வஹாபிகளை தனிமைப்படுத்தி தாக்கும் முயற்ச்சி சிங்கள ஆழும் சக்திகளின் மத்தியில்  கருக்கொள்வதுபற்றி எச்சரித்துவந்தேன். இஸ்லாமிய ஜனநாயக மரபுகள் அங்கீகரித்து   வகாபிகள் சூபிகளோடு சமரசம் செய்வது மட்டுமே முஸ்லிம் மக்களை பலப்படுத்தும் என்றும்  வலியுறுத்தி வருகிறேன்.  இதற்காக நான் மிக மோசமாக முனாபிக் காபிர் என வசைபாடப்பட்டேன். கிரான் சுடலைக்கு மண்வெட்டும் சவள் சகிதம் என்னை அழைத்துச் சென்ற தமிழ் இளைஞர்கள் ’நீ முஸ்களை குழப்புகிறாய்’ என  நெற்றிபொட்டில் துப்பாக்கியை வைத்து அழுத்தியபோது  வலித்ததைவிட காபீர், முனாபிக் என்னும்போது அதிகமாக வலிக்குது.

2015ல் நிகழ்ந்ததுபோல அதிஸ்ட்டவசமாக இந்த அரசு மாற்றமடையும் சாத்தியங்கள் எதுவுமில்லை. வகாபிகள் சூபிகளோடு இருந்துபேசி இஸ்லாமிய ஜனனாயக மரபுகளின் அடிப்படையில் விட்டுக்கொடுத்து சமரசமாவது மட்டுமே எஞ்சியுள்ள வழி.  இஸ்லாமிய ஜனநாயக மரபுகளும் அதன் அடிப்படையிலான முஸ்லிம்களின் ஐக்கியமும் மட்டுமே முஸ்லிம்களின் எதிர்காலம் என்பது தெளிவாகிவருகிறது. ஏனைய எல்லா முயற்ச்சிகளும் மேலும் மேலும் தனிமைப் படுத்த்தும். தனிமைப் படுதல் ஆபத்தன்னது. . நீங்கள் மீண்டும் வசைபாடலாம். துப்பாக்கி தாங்கியவர்களின் முன்னே உரத்த குரலில் முஸ்லிம்களுக்காகப் பேச நான் அஞ்சியதில்லை. இப்ப அதே மனநிலையுடன் வசைபாடல்களுக்கு அஞ்சாமல் வக்ஹாபிகள் சூபிகளோடு பேசி இஸ்லாமிய ஜனநாயக மரபுகளின் அடிப்படையில் பிணக்குகளைத் தீர்த்து ஐக்கியப்பட வேணும் என கூவி அழைக்கிறேன்