ஓமானுக்கான தூதுவர் அமீர் அஜ்வத்தின் முயற்ச்சியால், முதன்முதலாக இலங்கையிலிருந்து கோழி இறைச்சி ஏற்றுமதி

(மனாஸ் ஹுசைன்)

இலங்கையின் கோழிப்பண்ணை உற்பத்திகளின் ஏற்றுமதியை முதன் முதலாக ஓமான் நாட்டுக்கான இலங்கைத் தூதுவர் ஓ.எல். அமீர் அஜ்வத் ஆரம்பித்து வைத்துள்ளார். 

இலங்கையின் ஃபார்ம்ஸ் பிரைட் (பிரைவேட்) லிமிடெட் நிறுவனத்தினால் ஏற்றுமதி செய்யப்பட்ட இலங்கையின் குளிரூட்டப்பட்ட கோழி இறைச்சியின் முதல் 30 மெட்ரிக் டொன் சரக்குகளை ஓமானின் மிகப்பெரிய குளிரூட்டப்பட்ட இறைச்சி இறக்குமதியாளர்களில் ஒன்றான அல் ஹமாடி டிரேடிங் அன்ட் கொன்ட். எல்.எல்.சி. நிறுவனத்தின் முகாமைத்துவப் பணிப்பாளர் ஃப்ளின் எம்.வி. டி லிமா அவர்களிடம் கையளிக்கும் வைபவத்தில் கருத்துத் தெரிவித்தபோது ‘வளைகுடா பிராந்தியத்தில் முதன் முறையாக இலங்கையின் புதிய ஏற்றுமதித் தயாரிப்பொன்றுக்கு புதிய சந்தை வாய்ப்பு திறக்கப்பட்டுள்ளது. இது ஒரு பெரிய திருப்புமுனையாகும்’ என ஓமான் நாட்டுக்கான இலங்கைத் தூதுவர் அமீர் அஜ்வத் தெரிவித்தார்.

‘இலங்கையின் உணவுப் பொருட்களுக்கு இப் பிராந்தியத்தியில் பெருமளவிலான எதிர்பார்ப்புக்கள் இருப்பதுடன், இந்த முயற்சி இலங்கையின் கோழிப்பண்ணை உற்பத்திப் பொருட்களை இந்தப் பிராந்தியத்திற்கு ஏற்றுமதி செய்வதற்கான புதியதொரு அத்தியாயத்தைத் திறந்து வைத்துள்ளது’ என திரு. ஃப்ளின் எம்.வி. டி லிமா தெரிவித்தார். 

இலங்கையின் இறைச்சி உற்பத்தி வளைகுடா நாடுகளின் சந்தையில் வணிக ரீதியாக இவ்வளவு பெரிய அளவில் உள்நுழைவது வரலாற்றில் இதுவே முதலாவது தடவையாகும். 

இலங்கை கோழிப்பண்ணை உற்பத்திப் பொருட்களை முதன்முறையாக ஓமானுக்கு ஏற்றுமதி செய்வதற்குத் தேவையான அனுமதி உரிமத்தை வழங்கியமைக்காக தூதுவர் அமீர் அஜ்வத் ஓமான் நாட்டின் விவசாய மற்றும் மீன்வள அமைச்சிற்கு தனது மனமார்ந்த நன்றிகளைத் தெரிவித்தார். 

கோவிட்-19 தொற்றுநோய் சவால்களுக்கு மத்தியிலும் இந்த முயற்சியை வெற்றிகரமாக்குவதற்கான அயராத முயற்சிகளை மேற்கொண்ட இலங்கை ஃபார்ம்ஸ் பிரைட் லிமிடெட் (கிறிஸ்போ) மற்றும் ஓமான் நாட்டின் அல் ஹமாடி டிரேடிங் அன்ட் கொன்ட். எல்.எல்.சி. ஆகிய நிறுவனங்களின் நிறைவேற்றுப் பணிப்பாளர்களுக்கும் அவர் தனது பாராட்டுகளைத் தெரிவித்தார்.