அலி சப்ரியின் கரங்களை, முஸ்லிம் சமூகம் பலப்படுத்துமா...?

- Fazlin Wahid Mohamed -

இன்றைய நிலையில் இலங்கை முஸ்லிம்கள் சரியான ஒரு தலைமை இல்லாமல் தத்தளித்துக் கொண்டிருப்பதே ஏற்றுக் கொண்டுதான் ஆக வேண்டும் .நேற்று உலமா சபையினால் நாட்டிலுள்ள சகல பள்ளிவாசல்களிலும் மூன்று தினங்கள் மஃரிப் தொழுகையின் பின்னர் துவா பிரார்த்தனையை ஒலிபரப்புமமாறு  கேட்டுக்கொண்டிருந்தனர் .இன்று அது முஸ்லிம் சமய பண்பாட்டலுவல்கள் திணைக்களத்தினால் தடை செய்யப்பட்டது என்ற செய்தி வைரலாக பரவியது. ஒரு இக்கட்டான நெருக்கடியான நிலையில் நாம் இருக்கும்போது ஒரு சபை எடுக்கும் முடிவை இன்னொரு சபை தடை செய்தது  பார்ப்பவர்கள் கண்ணில் எங்களுக்குள்ளே மோதல்கள் இருப்பதை தெளிவாக காட்டுகின்றது.

 இப்படியான ஒரு இக்கட்டான சூழ்நிலையில் சமூகத்தை வழி காட்டுவதற்கு ஒரு தலைமைத்துவம் இன்றியமையாததாகும். அது அரசியல், ஆன்மீக, சமூக விடயங்கள் அனைத்துக்கும் பொதுவானதாக இருக்கவேண்டும். நாம் சிறுபான்மை இனமாக வாழும் ஒரு நாட்டிலே அரசு பொதுவாக எடுக்கும் தீர்மானங்களுக்கு கட்டுப்பட்டு நடக்க வேண்டும் என்பதில் எவருக்கும் சந்தேகம் இருக்க முடியாது.

 ஆனால் சமூகத்துக்கு என்று தனித்துவமாக எடுக்க வேண்டிய சில விடயங்களுக்கு எமக்குள்ளே ஒற்றுமையும் இணக்கப்பாடும் இன்றியமையாததாகும்.இன்றைய நிலையில் பாராளுமன்றம் கலைக்கப்பட்டு அரசியல் அதிகாரம் அற்ற தலைவர்கள் அற்ற ஒரு சமூகமாக நாம் இருக்கின்றோம்.  துரதிஷ்டவசமாக எமக்கென்று ஒரு அமைச்சரும் இல்லாத நிலையில் இருக்கின்றோம். அதிகாரம் கொண்டு அரசியல் தலைமை இருக்கும் என்றால் எல்லோரும் கட்சி பேதமின்றி அவரின் பின்னால் இவ்வாறான நிலைமையில் இருப்பார்கள் .

 நாம் யாரோ ஒரு பொருத்தமான நபரை தேர்ந்தெடுத்து அவரின் தலைமைத்துவத்தின் கீழ் இந்த சமூக தலைவர்கள் எல்லாம் ஒன்று சேர வேண்டிய கட்டாய நிலைக்கு உள்ளாகி இருக்கின்றோம். முன்னே  வரும் காலம் இதைவிட இக்கட்டான நிலைக்கு நாம் தள்ளப்படலாம்.

ஏற்றத்தாழ்வுகளையும் ,கட்சி அரசியலையும், பிரதேச வாதத்தையும் ஒரு புறம் தள்ளிவிட்டு ஒன்று சேர வேண்டும். 

 அரசாங்கத்துடன் இணைந்து ஒத்துப்போகும்  ஒருவரே தலைவராக இருப்பதும் அவசியமாக உள்ளது. தேர்தல் என்று ஒன்று வரும்போது சுயமாக தனி வழியே செல்லலாம். அந்த இடைவெளியை நிரப்புவதற்கு சகல விதத்திலும் பொருத்தமானவராக ஜனாதிபதி சட்டத்தரணி அலி சப்ரி அவர்கள் இருக்கின்றார் என்பது என் அபிப்பிராயம்.

 காழ்ப்புணர்வு கொள்ளாது அவரின் கீழ் காலத்தின் தேவையை கருத்தில் கொண்டு செயல்படுவது அத்தியாவசியமாக உள்ளது என்பதை யாராலும் மறுத்துவிட முடியாது.  

இதைவிட, மொத்த சமூகமும் ஏற்றுக்கொள்ளக்கூடிய ஒரு தலைவரை தெரிவு செய்வது சாத்தியமில்லை. ஆனால், இன்று இருக்கும் தலைமைத்துவங்கள் எல்லாம் ஒன்று சேர்ந்து தமக்குள்ளே ஒரு தலைமைத்துவத்தை தெரிவு செய்து கொள்ளலாம். ஆனால், அவர் அதிகாரம் வாய்ந்த ஒருவராக அரசுடன் இணக்கப்பாட்டுடன் செயல்படும் ஒருவராக இருக்க வேண்டுமென்றால், அதற்கு பொருத்தமானவர் ஜனாதிபதி சட்டத்தரணி அலி சப்ரி அவர்கள் தான்.

அது  சாத்தியமற்றதாகிவிடும் எனின் நாட்டின் சகல பிரதேசத்தையும் பிரதிநிதித்துவப்படுத்த கூடியதாக அரசியலுக்கு அப்பால் தெரிவு செய்யப்பட்ட ஒரு சபையை அவரே உருவாக்கிக்கொள்ள வேண்டும். நாட்டின் பல பாகங்களில் பல்வேறு கிராமங்களில் இருக்கும் பிரச்சினைகளை யாரிடம் சொல்வது என்று தெரியாமல் மக்கள் திண்டாடிக் கொண்டிருக்கிறார்கள் .அரசாங்கம் தனது கடமையை சரிவர செய்கின்றது . மக்களிடத்தில் எந்த பாரபட்சமும் இல்லாமல் அதிகாரிகள் செயல்படுகின்றனர். என்றாலும் சமூகம் அவ்வப்போது ஆங்காங்கே எதிர்கொள்ளும் சில பிரச்சினைகளை சொல்வதற்கு தலைமைகளை கொண்டிருக்கின்றது. தமக்கு அரசியல் அதிகாரம் எதுவும் இல்லை என்ற காரணத்தினால் எமது சமூகத்தை பிரதிநிதித்துவப்படுத்திய தலைவர்கள் மௌனமாக இருக்கின்றார்களோ தெரியவில்லை .எனினும் காலத்தின் கட்டாயத் தேவை சமூகத்தை சகல விடயங்களிலும் பிரதிநிதித்துவப்படுத்தும் ஒரு தலைமைத்துவமே. அது தற்காலிகம் என்றாலும் சரி மிக விரைவாக இந்த இடைவெளி நிரப்பப்பட வேண்டியது சமூகத்தின் அவசரமும், அவசியமுமான தேவையாகும்.