இலங்கை முஸ்லிம் தலைமைகளின், நிலைப்பாடு எப்படி இருக்கும்...?

"பலஸ்தீன மண்ணும்; மக்களும் விற்பனைக்கில்லை" என்று பலஸ்தீன தலைவர் மஹ்மூத் அப்பாஸ் மற்றும் ஹமாஸ் தலைவர் இஸ்மாயில் ஹனியா ஆகியோர் கூறிய வார்த்தைகள் - இந்த நாட்களில் மீண்டும் மீண்டும் காதுகளுக்குள் எதிரொலித்துக்கொண்டிருக்கிறது.

அமெரிக்க ஜனாதிபதி ரம்ப்பினால், பலஸ்தீன் - இஸ்ரேயில் பிரச்சினை தீர்விற்காக முன்வைக்கப்பட்ட "deal of the century" (நூற்றாண்டின் உடன்பாடு) என்றழைக்கப்படும் முன்மொழிவு - இஸ்ரேலுக்கு சார்பாக பாலஸ்தீனத்தின் தலைநகர் ஜெரூசலத்தை - இஸ்ரேலின் தலைநகராக அங்கிகரிப்பதோடு - ஜோர்டானின் ஒரு பகுதியை இஸ்ரேலின் நிருவாகத்தின் கீழ்கொண்டு வரும் அங்கிகாரத்தையும் வழங்குகிறது.

ஏலவே, பலஸ்தீன் - இஸ்ரேயில் பிரச்சினை விவகாரத்தில் முன்வைக்கப்பட்ட two state policy (இரு தேசக்கொள்கை) என்பதையும் ரம்பின் முன்மொழிவு இருட்டடிப்பு செய்கிறது என்ற குற்றச்சாட்டும் முன்வைக்கப்படுகிறது. அதாவது, "பலஸ்தீனுக்கு ஒரு நாடு - இஸ்ரேலுக்கு ஒரு நாடு" என்ற அரபு நாடுகளின் முன்மொழிவை இல்லாமல் செய்கிறது எனக்கொள்ளலாம்.

ரம்ப்பினால், தீர்வாக முன்வைக்கப்பட்ட இந்த "deal of the century" யின் முதற்கட்டமாக - இந்த தீர்வை ஏற்றுக்கொண்டால் 50 பில்லியன் அமெரிக்க டொலர்கள் பலஸ்தீனத்தில் முதலிடப்படும் என்ற ஆசையை - அமெரிக்கா சுமார் 06 மாதங்களுக்கு முன்னர் பலஸ்தீனர்களுக்கு காட்டியது. அதனை ரம்ப்பின் ஆலோசகரான அவரது மருமகன் குஸ்னர் முன்வைத்தார்.

இந்த முதலீடுகள் - வேலைவாய்ப்பு, உட்கட்டமைப்பு வசதிகள், போக்குவரத்து, உற்பத்தி துறை போன்றவற்றில் அபிவிருத்தியை கொண்டு வரும் - அதனூடாக பலஸ்தீனர்கள் மேம்பட்ட வாழ்வை வாழலாம் என்ற ஆசை காட்டப்பட்டு - பலஸ்தீன மண்ணை கபளிகரம் செய்யும் சதி அரங்கேற்றப்பட்டது.

இந்த சதிகள் எல்லாவற்றையுமே பலஸ்தீன சமூகம் ஒற்றுமையாக ஒரே குரலில் நிராகரித்து நிற்கிறது. அல்ஹம்துலில்லாஹ்.

இதையே இலங்கை சூழலில் ஒப்பிட்டு பார்த்தால் - நமது முஸ்லிம் தலைமைகளின் நிலைப்பாடு எப்படி இருக்கும்?.....

👉🏿பாரம்பரிய மண்ணையும் மக்களையும் விட - அபிவிருத்தியே முக்கியம் என்று ஒரு தரப்பு கூறிக்கொண்டு - அந்த காசுக்கு பின்னால் போயிருக்கும்.

👉🏿குறிப்பிட்ட ஒரு முஸ்லிம் தலைவரை சுட்டிக்காட்டி - அவர் இந்த திட்டத்தை எதிர்ப்பதால் நாம் ஆதரிப்போம் என்று இன்னொரு தரப்பு கிழம்பி இருக்கும்.

👉🏿பலமான சக்திகள் இந்த திட்டத்தை முன்வைப்பதால் - அந்த பலமான சக்திகளின் திட்டத்தை அங்கிகாரித்து ஆதரவு செய்வதே நமக்கிருக்கும் ஒரே வழி என்று மற்றொரு தரப்பு - மடிச்சிக்கட்டிக்கொண்டு நின்றிருக்கும்.

இது வரலாற்று அனுபவங்களாக நாம் இலங்கை சூழலில் கண்டவை. கண்டுகொண்டு இருப்பவை.

இனவாத சக்திகள் முஸ்லிம்களின் மீது நேரடியாகவும் - மறைமுகமாகவும் அழிவு நடவடிக்கைகளை மேற்கொண்டு - கொண்டு முற்றுகை செய்திருக்கும் சூழ்நிலையில் - அதிகாரத்திற்காக வாய்மூடி மௌத்திருப்பதும் - அவற்றை நியாயப்படுத்தி அரச விசுவாசத்தை வெளிக்காட்டுவதையும் - நம்மில் சில முஸ்லிம் தலைமைகள் தமது அதிகாரத்திற்காக இன்றுவரை செய்துகொண்டே இருக்கிறார்கள்.

இவர்களை, தமது இயலாமையால் மக்களும் கண்டும் காணாமல் விடுவது அல்லது அற்ப விடயங்களை எதிர்பார்த்து பூஜிப்பது - ஒரு நாளில் இலங்கையில் தலைநிமிர்ந்து நடக்கின்ற ஒரு முஸ்லிமை காண்பது அரிது என்ற நிலையை தோற்றுவிக்கும்.

முஸ்லிம்கள் வெறும் உயிர்வாழ சுவாசிக்கும் விலங்குகளாக வீதிகளில் காண்போம்.

அதற்கு முன்னர் விழித்துக்கொள்ள - நம்மை நோக்கி வரும் தேர்தலையாவது பயன்படுத்துமா நமது சமூகம்.

- AL Thavam -