இன்றைய அரசியல் சிக்கலுக்கு, அஷ்ரபின் 2 வித்தியாசமான சமன்பாடுகள்

சமன்பாடு - 01:-

ஶ்ரீலங்கா முஸ்லிம் காங்கிரஸின் ஆரம்ப காலகட்டத்தில் - ஶ்ரீலங்கா முஸ்லிம் காங்கிரஸ் வேறூன்றி விடக்கூடாது என்பதற்காக - பல்வேறு நெருக்குவாரங்களையும் அதிகார அடக்குமுறைகளையும் - ஐக்கிய தேசிய கட்சி பயன்படுத்தியது. அதனால் ஶ்ரீலங்கா முஸ்லிம் காங்கிரஸின் ஆதரவாளர்கள் மத்தியில் ஐக்கிய தேசிய கட்சி தொடர்பில் பெரும் அதிருப்தி இருந்தது. ஐக்கிய தேசிய கட்சியை பரம எதிரியாக வரித்துக்கொண்டனர்.

ஆனால், 1988 ஜனாதிபதி தேர்தல் வந்த போது - ஶ்ரீமாவோ பண்டாரநாயகவோடு நடந்த பேச்சுவார்த்தைகள் சாதமில்லாமல் போன சந்தர்ப்பத்தில் - அஷ்ரப், ஐக்கிய தேசிய கட்சியின் வேட்பாளர் பிரேமதாசவை ஆதரிக்க அவரிடம் வைத்த வேண்டுகோள்களை - அவர் ஏற்றுக்கொண்டு அமுல்படுத்த முன்வந்த போது - அத்தேர்தலில் அவர் பிரேமதாசவையே ஆதரிக்க வேண்டி வந்தது.

ஐக்கிய தேசிய கட்சியின் மீது ஶ்ரீலங்கா முஸ்லிம் காங்கிரஸின் ஆதரவாளர்கள் மத்தியில் இருக்கும் எதிர்ப்புணர்வை உள்வாங்கிய அஷ்ரப் - அந்த தேர்தலில் பிரேமதாசவை ஆதரிக்கும் தனது நிலைப்பாட்டை;

👉🏿 "ஐக்கிய தேசிய கட்சியையும், அதன் வேட்பாளர் ரணசிங்க பிரேமதாச என்ற தனிநபரையும் நான் வேறுபடுத்தி பார்க்கிறேன். நீங்களும் அவ்வாறே பாருங்கள்"

என்று கூறி - அந்த தேர்தலில் கட்சியை விட அதன் வேட்பாளருக்கு முக்கியத்துவம் கொடுக்கும் நிலையை உருவாக்கி - பிரேமதாசவை ஆதரித்து வெல்லவைத்து ஜனாதிபதியாக்கினார்.

✍🏿 எதிர்வரும் ஜனாதிபதி தேர்தலில் ஐக்கிய தேசிய கட்சி வேட்பாளராக சஜீத் பிரேமதாச அறிவிக்கப்பட்டால் - பிரதமர் ரணில் மீதும் ஐக்கிய தேசிய கட்சி மீதும் முஸ்லிம்களுக்கு இருக்கும் அதிருப்திக்கான விடையாக - அஷ்ரபின் இந்த அனுகுமுறை அமையும். கட்சியின் நிலைப்பாட்டின் நியாயமாகவும் அமையும்.

சமன்பாடு - 02:-

1988 ஆம் ஆண்டில் ஶ்ரீமாவோ பண்டாரநாயகவை தேற்கடித்து பிரேமதாசவை ஜனாதிபதியாக்க மடித்துக்கட்டிக்கொண்டு நின்ற அதே அஷ்ரப் - 1994 ஆம் ஆண்டு; அதாவது 6 வருடங்களுக்குள் - அதே ஶ்ரீமாவோ பண்டாரநாயகவின் மகள் சந்திரிகாவை வெல்ல வைக்க - ஐக்கிய தேசிய கட்சிக்கு எதிராக மடித்துக்கட்டிக்கொண்டு நின்றார்.

✍🏿 அதாவது, எதிர்வரும் ஜனாதிபதி தேர்தலில் ஶ்ரீலங்கா முஸ்லிம் காங்கிரஸ் - ஐக்கிய தேசிய கட்சி தலைமையிலான ஜனாதிபதி வேட்பாளரைத்தான் ஆதரிக்க வேண்டுமென்றில்லை; மாறாக,

"அம்மாவை (ஶ்ரீமா) தோற்கடித்து மகளை (சந்திரிகா) வெல்ல வைத்த அஷ்ரபின் அனுகுமுறையின் வழியில் - அண்ணனை (மகிந்த) தோற்கடித்து தம்பியை (கோட்டா) வெல்ல வைக்கும் நிலைக்கு வருவதையும்'' 

அஷ்ரப் அன்றே காட்டி தந்திருக்கிறார் என்ற விடயம் கவனத்தில் கொள்ள வேண்டும்.

👉🏿 இன்னும் விரிவாக கூறினால், "அரசியலில் நிரந்தரமான எதிரியுமில்லை; நிரந்தரமான நண்பனுமில்லை" என்பதை அஷ்ரப் நடைமுறையில் காட்டியிருக்கிறார்.

👉🏿 "ஶ்ரீலங்கா முஸ்லிம் காங்கிரஸை கையாள தெரியாமல் தவறுவிட்டவர்களுக்கு; பாடம் கற்பிக்க வேண்டிய தேவை நமக்கிருப்பதால்; இந்தத் தேர்தலில் நாம் சந்திரிக்காவை ஆதரிக்கும் நிலைப்பாட்டை எடுத்திருக்கிறோம்" என்று இந்த நிலைப்பாட்டை அஷ்ரப் விபரித்தார்.

✍🏿 அதேவழியில், முஸ்லிம்களின் விவகாரங்களை சரியாக கையாள தவறி விட்டவர்களுக்கு; பாடம் கற்பிக்க வேண்டிய தேவை நமக்கிருப்பதால்; இந்தத் தேர்தலில் ஐக்கிய தேசிய கட்சிக்கு எதிர்நிலைப்பாடு எடுக்க வேண்டி தேவை வந்ததை முஸ்லிம் காங்கிரஸ் தாராளமாக முன்வைக்கலாம்.

இவை அஷ்ரப் இன்றைய சிக்கல்களுக்கு போட்டுத்தந்துவிட்டு போன அரசியல் சமன்பாடுகள்.

புரிந்தவன் பிஸ்தா.

ஏ.எல். தவம்