சிங்கள – முஸ்லிம் உறவு சேதப்படுத்தப்பட்டமை, ISIS பயங்கரவாதிகளைவிட பாரிய அச்சுறுத்தலானது
உயிர்த்த ஞாயிறு தினத்தன்று கிறிஸ்தவ தேவாலயங்களையும், நட்சத்திர ஹோட்டல்களையும் இலக்குவைத்து நடத்தப்பட்ட தொடர் குண்டுத்தாக்குதல்களை அடுத்து நாட்டின் சிங்கள – முஸ்லிம் சமூகங்களுக்கிடையில் இதுவரை காலமும் பேணப்பட்டு வந்த இணைப்பு சேதப்படுத்தப்பட்டுள்ளது. இந்நிலையில் தற்போது எமக்கான அச்சுறுத்தல் இஸ்லாமிய அரசு என்பதிலும் பார்க்க, இரு சமூகங்களுக்கிடையில் ஏற்பட்டுள்ள பிளவே பாரிய அச்சுறுத்தலாக இருக்கும் என்பதைப் புரிந்துகொள்ள வேண்டும் என்று பிரபல பயங்கரவாத எதிர்ப்பு விவகார நிபுணரான பேராசிரியர் ரொஹான் குணரத்ன தெரிவித்திருக்கின்றார்.
முன்கூட்டியே தெளிவான விபரங்களுடன் தாக்குதல்கள் குறித்த எச்சரிக்கைகள் விடுக்கப்பட்டிருந்த நிலையில் இந்த அனர்த்தத்தை பாதுகாப்புப் பிரிவினால் தடுக்க முடியாமல் போனமைக்குக் காரணம் என்ன? இதுவிடயத்தில் ஒருபோதும் பாதுகாப்புப் பிரிவினரை குறைகூற முடியாது. மிகத்தெளிவான தூரநோக்கற்ற, பிளவடைந்த அரசியல் தலைமைத்துவமே இந்தத் தாக்குதல்கள் தடுக்கப்படாமைக்குக் காரணமாகும் என்றும் அவர் சாடியிருக்கிறார்.
”பூகோள ரீதியில் இஸ்லாமிய அரசின் விரிவாக்கம்: இலங்கை மீதான தாக்கம்” என்ற தலைப்பிலான சர்வதேச கருத்தரங்கொன்று மஹிந்த ராஜபக் ஷ நிலையத்தினால் கொழும்பிலுள்ள கிங்ஸ்பெரி ஹோட்டலில் ஞாயிற்றுக்கிழமை மாலை ஏற்பாடு செய்யப்பட்டிருந்தது. அக்கருத்தரங்கில் இலங்கையில் இடம்பெற்ற தாக்குதல்களின் பின்னணி மற்றும் எதிர்காலத்தில் நடைமுறைப்படுத்த வேண்டிய பாதுகாப்பு செயற்றிட்டங்கள் தொடர்பில் பேராசிரியர் குணரத்ன விரிவாகப் பேசினார்.
இலங்கைப் பாதுகாப்பு அமைச்சின் சிந்தனை அமைப்பான தேசிய பாதுகாப்பு ஆய்வுகளுக்கான நிறுவனத்தை அமைப்பதற்கான வரைவுத்திட்டத்தை எழுதியதுடன், சர்வதேச பயங்கரவாதம் தொடர்பில் சான்று ஆதாரத்துடன் அபிப்பிராயங்களை வெளியிடுவதில் பெயரெடுத்தவரான ரொஹான் குணரத்ன மேலும் கூறியதாவது:
மூன்று இஸ்லாமிய வலையமைப்புக்கள்
நாட்டில் இடம்பெற்ற தொடர் குண்டுத்தாக்குதல்கள் பற்றிப் பேசுவதாயின் முதலில் இலங்கையிலுள்ள மூன்று இஸ்லாமிய அரசின் வலையமைப்புக்கள் பற்றிக் குறிப்பிடவேண்டும். முதலாவது கண்டி மாநகரத்தை மையமாகக் கொண்ட வலையமைப்பாகும். அதிலிருந்து 42 இலங்கையர்கள் ஈராக் மற்றும் சிரியாவிற்குச் சென்றிருப்பதுடன், முதலாவதாக மொஹமட் நிஸாம் என்பவர் கடந்த 2015 ஜனவரி 15 ஆம் திகதி அங்கு சென்றார். அவரது சகோதரரான ஐக்கிய இராச்சியத்தை மையமாகக் கொண்டு இயங்கிய தொண்டுநிறுவனத்தில் பணிபுரிந்த அபூ இஷாக் என்பவர் சிரியா, ஈராக்கிற்கு சென்று இலங்கைக்குத் திரும்பி தனது குடும்பத்தவர்களையும், தனது மனைவியின் குடும்பத்தவர்களையும் மத அடிப்படைவாதத் தீவிரவாதத்திற்குள் உள்ளீர்த்தார். ஈராக்கிற்கு சென்ற மொஹமட் நிலாம் ஆறுமாத காலத்தின் பின்னர் அங்கு கொல்லப்பட்டார். அவர் கொல்லப்பட்டமை தொடர்பிலான செய்தி இஸ்லாமிய அரசிற்கு சொந்தமான பத்திரிகையில் வெளிவந்த போதுதான், இலங்கையர்களும் இஸ்லாமிய அரசின் போராளிகளாக இருந்துவருகிறார்கள் என்ற உண்மையை உலகம் அறிந்துகொண்டது.
இவ்வாறு ஈராக் மற்றும் சிரியாவிற்கு சென்று வந்தவர்கள் இஸ்லாமிய அரசின் கொள்கைகளை இலங்கையில் விஸ்தரிக்க ஆரம்பித்தார்கள். அவ்வாறுதான் ஈஸ்டர் ஞாயிறு குண்டுத் தாக்குதல்களின் பிரதான சூத்திரதாரியாகக் கருதப்படும் சஹ்ரான் காசீம் தலைமையிலான காத்தான்குடியை மையமாகக் கொண்ட கிழக்குப் பிராந்திய வலையமைப்பும், மேல்மாகாண வலையமைப்பும் உருவாக்கப்பட்டன. சஹ்ரானால் உருவாக்கப்பட்ட வலையமைப்பில் சுமார் 150 இளைஞர்கள் இணைத்துக்கொள்ளப்பட்டனர். இவ்வாறு இலங்கையில் உருவாக்கப்பட்ட வலையமைப்புக்களுக்கு தௌலா- – இஸ்லாமியா என்று பெயரிடப்பட்டது. இதற்கு இலங்கையிலுள்ள இஸ்லாமிய அரசின் கிளைகள் என்று பொருள்கொள்ள முடியும்.
இவ்வாறு இஸ்லாமிய அரசினால் ஈர்க்கப்பட்ட சஹ்ரான் காசீம் தலைமையிலான குழுவினரால் இலங்கையில் தொடர் குண்டுத்தாக்குதல்கள் மேற்கொள்ளப்பட்டதன் பின்னர், அந்தத் தாக்குதல்களுக்கு இஸ்லாமிய அரசு இயக்கம் பொறுப்பேற்றுக் கொண்டதுடன், தாக்குதல்களுக்கு முன்னர் சஹ்ரான் காசீம் தலைமையிலான குழுவினர் இஸ்லாமிய அரசின் தலைவர் அபூ பக்கர் அல்-பக்தாதியை முன்னிறுத்தி சத்தியப்பிரமாணம் எடுத்துக்கொண்ட காணொலியையும் வெளியிட்டது. எனவே அவர்களின் தலைவர் இலங்கையின் ஜனாதிபதியோ அல்லது பிரதமரோ அல்ல. ஈராக், சிரியாவிலிருக்கும் ஒரு மனிதனே அவர்களின் தலைவர். அவரை முன்னிறுத்தி சத்தியப்பிரமாணம் எடுத்துக்கொள்பவர்கள் மரணிப்பதற்குத் தயாராக இருப்பதுடன், அந்த மரணத்தின் மூலம் ஐந்து விடயங்கள் தமக்குக் கிட்டும் என்ற நம்பிக்கையைக் கொண்டிருக்கிறார்கள். சுவர்க்கத்தை சென்றடைய முடியும், இறைவனைக் காணமுடியும், மனிதர்களாக இருந்த போது இழைத்த பாவங்களுக்கு மன்னிப்பு வழங்கப்படும், பல உறவினர்களைப் பெற்றுக்கொள்ள முடியும் (அதனாலேயே பலர் தமது குடும்பத்தினரையும் தற்கொலைக் குண்டுதாரிகளாக மாற்றியிருப்பதுடன், சில குடும்ப அங்கத்தவர்கள் தம்மைச் சார்ந்தவர்களின் பயங்கரவாத செயற்பாடுகளுக்கு உதவுகின்றார்கள்), 72 கன்னிப் பெண்களைப் பெற்றுக்கொள்ள முடியும் ஆகியவை அந்த நம்பிக்கைகளாக இருக்கின்றன.
பாதுகாப்புப் பிரிவினரைக் குறைகூற முடியாது
அடுத்ததாக முன்கூட்டியே தெளிவான விபரங்களுடன் தாக்குதல் குறித்த எச்சரிக்கைகள் விடுக்கப்பட்டிருந்த நிலையில் இந்த அசம்பாவிதத்தை பாதுகாப்புப் பிரிவினால் தடுக்க முடியாமல் போனமைக்குக் காரணம் என்ன? இவ்விடயத்தில் ஒருபோதும் பாதுகாப்புப் பிரிவினரை குறைகூற முடியாது. மிகத்தெளிவான தூர நோக்கற்ற, பிளவடைந்த அரசியல் தலைமைத்துவமே இந்தத் தாக்குதல்கள் தடுக்கப்படாமைக்குக் காரணமாகும். அவர்கள் இதுவிடயத்தில் பொறுப்புக்கூற வேண்டியது அவசியம் என்பதுடன், சட்டத்தின் முன் நிறுத்தப்பட வேண்டும். எப்போதும் எச்சரிக்கை உணர்வுடனும், வேட்டையாடும் துடிப்புடனும் செயற்பட்டுவந்த பாதுகாப்புப் பிரிவினரின் உத்வேகம் 2015 ஆம் ஆண்டிலிருந்து பிடுங்கப்பட்டது. சாதாரண விடயங்களுக்கு வழங்கப்பட்ட அவதானம் கூட தேசிய பாதுகாப்பு சார்ந்த மிக முக்கிய விடயங்களுக்கு வழங்கப்படவில்லை. எனவே இந்தத் தாக்குதல்கள் புலனாய்வுப் பிரிவின் குறைபாடோ அல்லது பாதுகாப்புத் தரப்பின் குறைபாடோ அல்ல. மாறாக திறனற்ற அரசியல் தலைமைத்துவத்தின் குறைபாடேயாகும்.
இந்நிலையில் நாட்டிலிருந்து இந்தப் பயங்கரவாதத்தை முற்றாகக் களைவதற்கு தூரநோக்கில் சிந்தித்து, நீண்டகால திட்டங்களை நடைமுறைப்படுத்த வேண்டும். தற்போது பாதுகாப்பைப் பலப்படுத்துவதும், சந்தேக நபர்களைக் கைது செய்வதும் குறுங்கியகாலத் தீர்வையே பெற்றுத்தரும். ஒரேயொரு இரவில் ஒரு பயங்கரவாதி உருவாகி விடுவதில்லை. அவ்வாறு உருவாகுவதற்கான வட்ட செயற்பாட்டை முழுமையாக முறியடிக்க வேண்டும். அதேபோன்று இஸ்லாமிய அரசினால் ஈர்க்கப்பட்ட அடிப்படைவாதிகள் தமது குடும்பங்கள், உறவினர்களையும் அதற்குள் உள்ளீர்க்கிறார்கள். எனவே அத்தகைய நபர்கள் தொடர்பில் கண்டறிந்து அவர்களைச் சார்ந்தோருக்கும் முறையான உளவள ஆலோசனைகள் வழங்கப்பட வேண்டும். தற்போது கைது செய்யப்பட்டு சிறையில் அடைக்கப்பட்டவர்களுக்கான திட்டமிடப்பட்ட புனர்வாழ்வு செயற்றிட்டமொன்று உருவாக்கப்பட வேண்டும். வெளிநாடுகளிலிருந்து வருகைதருவோர், இங்கிருந்து வெளிநாடுகளுக்குச் செல்வோர் குறித்து நிலையாகக் கண்காணிக்கும் ஒரு கட்டமைப்பை உருவாக்க வேண்டும். அத்தோடு இன, மதம் சார்ந்த தனியான பாடசாலைகளைத் தவிர்த்து, பல்லினப் பாடசாலைகளை உருவாக்குவது காலத்தின் தேவையாக மாறியிருக்கிறது. அதனூடாகவே இன, மத அடிப்படையிலான அடையாளங்களைப் புறந்தள்ளி, இலங்கையர் என்ற அடையாளத்தைக் கொண்ட இளைய தலைமுறையை உருவாக்க முடியும். அதேபோன்று எமது நாட்டில் இத்தகைய அடிப்படைவாதிகளைத் தண்டிப்பதற்கான சட்டங்கள் போதுமானவையாக இல்லை. எனவே அவசியமான சட்டங்கள் விரைவாக நிறைவேற்றப்பட வேண்டும். அதற்குரிய பொறுப்பை அரசியல் தலைவர்கள் ஏற்றுக்கொள்ள வேண்டும். காரணம் அவர்கள் அதனை முன்னரேயே செயற்படுத்தியிருந்தால் இத்தகைய தாக்குதலே இடம்பெற்றிருக்காது.
சமூக இணைப்பு வேலைத்திட்டம்
மேலும் சமூகங்களுக்கு இடையில் இணைப்பை உருவாக்கத்தக்க வேலைத்திட்டங்களைக் கட்டியெழுப்ப வேண்டும். குண்டுத்தாக்குதல்கள் இடம்பெற்று, பல்வேறு பாதிப்புக்கள் ஏற்பட்டதன் பின்னர் முஸ்லிம் தலைவர்கள் தமது பெண்களைப் பாதுகாப்பதற்கு வாளை வைத்திருக்கிறோம் என்பது போன்ற பொருத்தமற்ற கருத்துக்களைத் தெரிவித்தார்கள். இது தேசிய பாதுகாப்பு குறித்த அவர்களின் தெளிவின்மையையே காட்டுகின்றது. இத்தகைய கருத்துக்கள் மக்களின் மத்தியில் அதிருப்தியை ஏற்படுத்தியிருக்கின்றன. சிங்களவர்களுக்கும், முஸ்லிம்களுக்கும் இடையில் பிளவொன்று உருவாகியிருக்கிறது. எமக்கான அச்சுறுத்தல் இஸ்லாமிய அரசு என்பதை விடவும், இத்தனை வருடகாலமாக சிங்கள மற்றும் முஸ்லிம் சமூகங்களுக்கு இடையில் காணப்பட்ட நெருக்கமான பிணைப்பு சேதப்படுத்தப்பட்டு விட்டது. அதுவே தற்போது எமக்குள்ள பாரிய அச்சுறுத்தலாகும். எனவே சமூகங்களை இணைக்கும் வேலைத்திட்டமொன்று தற்போது மிகவும் அவசியமானதாகும் என்பதைப் புரிந்துகொள்ள வேண்டும்.-Vidivelli
Post a Comment