அரபுக் கல்லூரிகளை முடக்க திட்டமா..? சம்பிக்கவும் பரிந்துரை சமர்ப்பிப்பு

அஞ்சல் சேவைகள் மற்றும் முஸ்லிம் சமய விவகார அமைச்சர் எம்.எச்.ஏ. ஹலீமினால் அமைச்சரவையின் அங்கீகாரத்துக்காக சமர்ப்பிக்கப்பட்டிருந்த இஸ்லாமிய கல்வி (அரபுக் கல்லூரிகள்) சட்ட வரைபு அமைச்சரவையினால் மறு ஆய்வுக்காக மீண்டும் முஸ்லிம் சமய விவகார அமைச்சுக்கு அனுப்பி வைக்கப்பட்டுள்ளது.

சட்ட வரைபை மறு ஆய்வு செய்து திருத்தங்களைச் செய்வதற்காக ஜனாதிபதிமைத்திரிபால சிறிசேன, பெருநகரங்கள், மேல்மாகாண அபிவிருத்தி அமைச்சர் சம்பிக்க ரணவக்க, நீதி மற்றும் சிறைச்சாலைகள் மறுசீரமைப்பு அமைச்சர் தலதா அத்துகோரள மற்றும் பெருந்தோட்ட கைத்தொழில் அமைச்சர் நவீன் திசாநாயக்க ஆகியோர் சட்டவரைபில் உள்ளடங்கப்பட வேண்டிய தங்களது பரிந்துரைகளைச் சமர்ப்பித்துள்ளார்கள்.

ஜனாதிபதி உட்பட குறிப்பிட்ட மூன்று அமைச்சர்களும் இஸ்லாமிய கல்வி (அரபுக் கல்லூரிகள்) கல்வி அமைச்சின் கீழ் கொண்டுவரப்பட வேண்டுமென பரிந்துரைத்திருக்கிறார்கள். அமைச்சர் சம்பிக்க ரணவக்க அரபுக் கல்லூரிகளுக்கென (இஸ்லாமிய கல்வி) தனியான சட்டமொன்று தேவையற்றதென்றும் இஸ்லாமிய கல்வி சில திருத்தங்களுடன் கல்வி அமைச்சுடன் இணைக்கப்பட வேண்டுமெனவும் ஆலோசனை தெரிவித்துள்ளார்.

ஏப்ரல் உயிர்த்த ஞாயிறு தற்கொலைக் குண்டுத்தாக்குதல்களையடுத்து அரபுக் கல்லூரிகளில் அடிப்படைவாதம் போதிக்கப்படுவதாகவும் அரபுக் கல்லூரிகள் தடை செய்யப்பட வேண்டுமெனவும் பெரும்பான்மை இனத்தவர்களால் கோரிக்கை விடுக்கப்பட்ட நிலையில் அரபுக் கல்லூரிகளுக்கென தனியான சட்ட மூலமொன்றினைத் தயாரிக்குமாறு பிரதமர் ரணில் விக்கிரமசிங்க முஸ்லிம் சமய விவகார அமைச்சர் எம்.எச்.ஏ. ஹலீமுக்கு பணித்திருந்தார்.

அதற்கமைவாக இஸ்லாமிய கல்வி (அரபுக் கல்லூரிகள்) சட்ட வரைபு துரிதமாக தயாரிக்கப்பட்டு அமைச்சரவையின் அங்கீகாரத்துக்காக சமர்ப்பிக்கப்பட்டிருந்தமை குறிப்பிடத்தக்கது. இது தொடர்பில் முஸ்லிம் சமய விவகார அமைச்சின் பணிப்பாளர் ஏ.பி.எம். அஸ்ரபைத் தொடர்பு கொண்டு வினவியபோது, சட்டவரைபு மறு ஆய்வு செய்து திருத்தங்களைச் செய்வதற்காக அமைச்சின் அவதானிப்புக்கு அனுப்பப்பட்டுள்ளது. அமைச்சரவையினால் அனுப்பி வைக்கப்பட்டுள்ள பரிந்துரைகளில் நாம் எதிர்பார்க்காத பல நல்ல விடயங்கள் உள்ளடங்கியுள்ளன என்றார்.