22 இலட்சம் முஸ்லிம்களை பிரதிநித்துவம் செய்யும், ஜம்இயத்துல் உலமா மறுசீரமைக்கப்பட வேண்டும்

-நஜீப் பின் கபூர்-

அன்பார்ந்த உலமாக்களைப் பிரதிநித்துவம் செய்கின்ற உங்கள் அமைப்பின் பொதுக் கூட்டமும் நிருவாக சபைத் தெரிவும் இன்னும் சில தினங்களில் நடக்க இருப்பது பற்றி ஊடகங்களில் பார்க்க முடிந்தது. தற்போதய சூழ்நிலையில் இந்த ஜம்இயத்துல் உலமா சபை மிகவும் பொறுப்பு வாய்ந்த ஒரு சபையாக நமது நாட்டில் பார்க்கப்படுகின்றது. இதனை நீங்கள் அண்மைக்காலமாக புரிந்து கொண்டிருப்பீர்கள் என நம்புகின்றோம். இதனால் உங்கள் பார்வைக்கு சில விடயங்களை முன்வைக்கலாம் என்று எண்ணுக்கின்றோம்.

1.இந்த சபை என்பது இந்த நாட்டில் வாழ்கின்ற 22 இலட்சம் முஸ்லிம்களைப் பிரதிநித்துவம் செய்கின்ற ஒரு சபை என்பதனை நீங்கள் புரிந்து கொள்ள வேண்டும். 

2.உங்களுக்குள்லேயே கருத்து முரண்பாடுகள் ஏற்படுவதைப்போல் உங்களுடன் முரண்படுகின்ற பல குழுக்கள் இந்த நாட்டில் இருப்பதையும் நீங்கள் புரிந்து கொள்ள வேண்டும். விரும்பியோ விரும்பாமலோ அவர்களையும் இந்த அமைப்பின் கீழ் ஒரு பொது வேலைத் திட்டத்தின் கீழ் நீங்கள் உள்வாங்கிக் கொள்வது தொடர்பாகவும் தீர்மானங்களை எடுக்க வேண்டி இருக்கின்றது.

3.பேராசிரியர் இஸ்மாயில் தனக்கு சுமக்க முடியாத ஒரு சுமையை இந்த சபை சுமக்கின்றது என்ற கருத்தை ஒரு குரோதத்துடன் பார்க்காது அதில் உள்ள அர்த்தத்தைப் பற்றி நீங்கள் யோசிக்க வேண்டும். சுமை என்ற வார்த்தைக்கு அங்கே பல அர்த்தங்கள். நேரடியாக சொல்வதானால் அறிவியல் விவகாரத்தை சுட்டிக்காட்ட முடியும்.

4.இன்று சில முஸ்லிம் நாடுகளில் வெறும் நான்கு ஐந்து இலட்சம் பேருக்கு ஒரு தேசத் தலைவர் அமைச்சரவை என்று இருக்கின்றார்கள். பக்கத்திலுள்ள மாலை தீவுவைக் கூட எடுத்துக் கொள்ள முடியும். எனவே 22 இலட்சம் என்பது ஒரு கணிசமான தொகை. இவர்களை நிருவாகிப்பது என்பது சாதாரண விடயமல்ல என்பதனை நீங்கள் புரிந்து கொள்ள வேண்டும்.

5.இந்த சபையின் நிருவாகிகளாக வருகின்றவர்களுக்கு உள்நாட்டு வெளிநாட்டு விவகாரங்களில் மட்டுமல்லாது அனைத்து சமூக விவகாரங்களில் பரந்த அறிவு அவசியம். இது விடயத்தில் பலயீனங்கள் இருந்தாலும் அறிவூட்டல்கள் மூலம் இதனைச் சரி செய்ய முடியும். எதிர்காலத்திலாவது இதற்கான ஏற்பாடுகளைச் செய்ய வேண்டும். 

6.வெள்ளி குத்பா பேருரைகள் விடயத்திலும் அதனை தேசிய மட்டத்தில் பரப்புரைகள் செய்வதிலும் ஒரு சரிபார்த்தல் இருக்க வேண்டும். இந்த இடத்தில் ஒரு சம்பவத்தை நினைவு படுத்த விரும்புகின்றோம். உயிர்த்த நாள் தாக்குதலுக்கு முன்னய வெள்ளி ஒரு வானொலி அலைவரிசையில் ஒரு உலமா உலக வரட்சி பற்றித் தனது பிரசங்கத்தில் உலக சனத் தொகை பற்றி அல்லது வரட்சி பற்றி சொல்கின்ற  போது அங்கு குறிப்பிட்ட சனத் தொகை மிகவும் அதிர்ச்சியான எண்ணிக்கையாக இருந்தது. இது உலக சனத் தொகையுடனும் பொருந்தாது வரட்சிபற்றி புள்ளி விபரங்களுடனும் பொருந்தாது. இது போன்ற நிறைய பிழையான தகவல்கள் சொல்லப்படுகின்றன. இதனை எவரும் காதில் போட்டுக் கொள்ளவதில்லை என்பது வேறு விடயம். ஆனால் இப்படி கருத்துக்களை பகிரங்கமாக அறிவிப்பது நமது சமயத் தலைவர்களின் அறிவுத் தன்மையை நகைப்பிற்கு இடமாக்கி விடும்.

7.குர் ஆன் சிங்கள மொழி பெயர்ப்பில் ராவய பத்திரிகைக் செய்தி பற்றியும் நீங்கள் ஒரு பதில் கொடுக்க வேண்டும். சிங்கள மொழியில் ஒரு வார்த்தை இருக்கின்றது கோயதோ யன்னே மல்லே பொல் என்று பதில் அப்படி இருக்கக்கூடாது.

8.மிகமுக்கியமாக குறிப்பாக தலைமை செயலாளர் பதவிகளுக்கு வருகின்றவர்கள் நிதானமானவர்களாகவும் சகல துறைகளிலும் நல்ல அறிவுள்ளவர்களாகவும் பேச்சாற்றல் உள்ளவர்களாக வும் ஆளுமை உள்ளவர்களாகவும் இருக்க வேண்டும். இது காலத்தின் தேவை. ஆடைகளினால் ஆளுமையைச் சரி செய்ய முடியாது அது அறிவியல் இராஜதந்திரத்துடன் சம்பந்தப்பட்ட விடயம்.

9.பிர சமூகங்களுடன் புரிந்துணர்வுக்கான ஒரு வேலைத் திட்டத்தையும் வடிவமைக்க வேண்டி இருக்கின்றது.

10.சர்வதேச உறவுகள் விடயத்திலும் இந்த அமைப்பு தனது கவனத்தைச் செலுத்த வேண்டும். முஸ்லிம் நாடுகளை மட்டும் மையப்படுத்தியதாக இந்த வேலைத் திட்டம் அமையாது பரந்துபட்டதாக அது இருக்க வேண்டும். 

11.தலைமைத்துவம் என்பது கோலைகளின் கூடாரமாக இருக்கக்கூடாது. நெருக்கடியான நேரங்களில் அதற்கு துணிச்சலுடன் இராஜதந்திர ரீதியில் முகம் கொடுக்கின்ற வல்லமை அதற்கு இருக்க வேண்டும்.

12.இது போன்று இன்னும் எத்தனையோ விடயங்களைப் பேசலாம். சில விடயங்களுக்கு இது விடயத்தில் தமக்குள் ஆளணி பற்றாக் குறை இருப்பின் அமைப்புக்குப் புறம்பாக துறைவாரியாக வெளியிலிருந்து ஆலோசனை சபைகளை அமைத்துக் கொள்ள முடியும்.

13.பிரசமூகத்தினருடன் திறந்த மனதுடன் நல்லுறவு என்ற விடயம் பற்றியும் சிந்திக்க வேண்டும்.

14.தமது தலைமையகம் முற்றிலும் மறுசீரமைக்கப்பட்டு அது ஒரு அரச - சமூகத் தலைவரின் செயலகம் போல் வடிவமைக்கப்பட வேண்டும். அதனை புத்திஜீவிகளான ஆளணி நிருவாகிக்க வேண்டும். 

15.சமூக ரீதியிலான தவறுகள் இனங்காணப்பட்டு அவை சரி செய்யப்பட வேண்டும்.

16.நிதி விடயங்களில் தூய்மையும் பகிரங்கத் தன்மையும் தேவை.

16.தமது கருத்துக்களை (நடுநிலையான) சமூக மயப்படுத்துவதற்காக ஒரு ஊடகமொன்றை இந்த அமைப்பு வைத்திருக்க வேண்டியது காலத்தின் தேவை அது எப்படி நெறிப்படுத்தப்பட வேண்டும் என்ற விடயத்தில் நிறைய பேச வேண்டி இருக்கின்றது.