புர்காவை கழற்றாமல் வைத்திய பணியிலிருந்து, விலகியவருக்கு அல்லாஹ் நற்கூலி வழங்கட்டும்

ஹோமாகம வைத்தியாசாலையில் புர்காவை நீக்கி பணி  செய்யுங்கள் என்று கூறியதற்கு இராஜினாமா கடிதம் கொடுத்த எமது வைத்திய சகோதரி ஒருவரின் செய்தியைக் கேட்டு அதிர்ந்து போனேன் , 

குறித்த சகோதரியின் முடிவுக்கு கிடைக்கும் வரவேற்ப்பை காணும் போதும் அதிர்ச்சியால் உடம்பெல்லாம் புல்லரித்து போகின்றது.

குறித்த சகோதரியின் எண்ணத்திற்கு அல்லாஹ் நற்கூலி வழங்க வேண்டும்.

 இருந்த போதிலும் வைத்திய துறையில் இருக்கின்றவர்களோடும் , நாட்டின் புத்திஜீவிகளோடும் இன்னும் கலந்தாலோசித்த பின்னர் முடிவெடுத்திருக்கலாம்.

 ஏனெனில்

1. ஈமானை இழக்கின்ற , நம்பிக்கை கோட்பாட்டையே பாதிக்கின்ற ஒரு விடயமன்று.

நிகாப் , புர்காவை அகற்றிவிடுவது என்பது ஈமானை பாதிக்கின்ற ஒரு விடயம் அல்ல என்பதில் எல்லோரும் உடண்படுவார்கள்.

 நிகாபுக்கும் , புர்காவுக்கும் மார்க்கத்தில் எந்த சட்டநிலைப்பாட்டை கொடுப்பது என்பதிலையே சட்ட வல்லுனர்களுக்கிடையில் ஓர் உறுதியான நிலைப்பாடு கிடையாது , அரேபிய பாலைவனச் சூழ்நிலையில் குறித்த ஒரு சில தேவைகளுக்காக அணியப்பட்ட அரேபிய காலாச்சாரத்தோடு சம்பந்தப்பட்ட ஒரு அங்கி என்பதிலையே பல நவீன கால சட்ட வல்லுனர்கள் உடண்படுவது ஒரு பக்கம் ,

 நாட்டின் தேசிய பாதுகாப்புக்கும் அமைதிக்கும் அச்சுறுத்தலாக அடையாளப்படுத்தப்பட்டு தற்காலிகமாக தடைசெய்யப்பட்டும் , நாட்டிலே அமைதியின்மையை ஏற்படுத்துவதற்கு குறித்த அங்கியை முறைகேடாக பயன்படுத்தியுள்ளமை மிகத் தெளிவாக தெரிகின்ற போதும்  குறித்த அங்கியை தவிர்ந்திருப்பதே அறிவுடமை மாத்திரமல்ல, சன் மார்க்கக் கடைமையும் ஆகும் ,அகில இலங்கை ஜம்யதுல் உலமா இது தொடர்பான வழிகாட்டலை , அறிவூட்டலை இன்னும் விரிவுபடுத்த வேண்டும்.

2. மார்க்கத்தில் முன்னுரிமை படுத்தல் பற்றிய விளக்கமின்மை.

துறை சார்ந்த நிபுணர்கள் உருவாக்கப்படுவது என்பது ஓர் சமூக கடமை , அரசின் பல்வேறு துறைகளுக்கும் தேவையானவர்கள் புடம் போடப்பட்டு , அரசின் பல் வேறுபட்ட துறைகளில் நின்று நாட்டின் முன்னேற்றத்திற்கும் அபிவிருத்திக்கும் தேசிய நீரோட்டத்தில் நின்று தேசிய பங்களிப்புச் செய்தல் என்பது இலங்கை முஸ்லீம் சமூகத்தின் முதன்மை கடமையாகும். என்பது மாத்திரமன்றி எதிர்கால முஸ்லீம் சமூகத்தின் இருப்பை கூட தீர்மானிக்கும் விடயமாகும். …… 

இவ்வளவு முக்கியமான முதன்மை கடமையொன்றை நிறைவேற்றும் அந்த சகோதரி கடமை கூட இல்லாத அரேபியக் கலாச்சாரத்தோடு சம்பந்தப்பட்ட ஒரு அங்கிக்காக முதன்மைக் கடமையொன்றை தூக்கி போடவது என்பது மிகக் கவலைக்கிடமான ஒரு செயலாகும். (உயிரா? மார்க்கமா? என்று வந்தால் கூட போலியாக நடித்து உயிரை முற்படுத்துவதை (பலவீனமான சந்தர்பங்களில்)  வலியுறுத்தும் மார்க்கம் இது)….. முன்னுருமைப்படுத்தும் மார்க்க அறிவு சம்பந்தமான தெளிவூட்டல் இன்னும் சமூகத்தில் பேசப்பட வேண்டும்.

3. மிகமோசமான ஓர் முன் உதாரணம்

இஸ்லாமிய சட்ட வரம்புகளைப் பேணி தமக்குறிய ஆடை அணிகலன்களை அமைத்து கொள்வதற்கு இந்த நாட்டில் சட்ட பூர்வமான அங்கீகாரம் இருக்கும் போது இஸ்லாமிய சட்டதிட்டங்களுக்கு அப்பால் வருகின்ற ஒரு அங்கிக்காக பதவி துறப்பது என்பது , இது போன்ற பிரச்சினைகளை எதிர் கொள்கின்றவர்களுக்கு (மாணவிகள் , ஆசிரியர்கள்……) ஓர் மோசமான முன்ணுதாரனமாக அமைந்து விடக் கூடாது , அது சமூகத்தை இன்னும் பிற்போக்கான இக்கட்டான மிக மோசமான சூழ்நிலைக்கே கொண்டு போய் சேர்க்கும்.

4. நாட்டு சட்ட திட்டத்திற்கு முரணானவர்கள் அல்ல நாங்கள்

முஸ்லீம்கள் , நாட்டு சட்ட திட்டத்திற்கு அப்பாற்பட்டவர்கள் , சட்டத்தை மதிக்காதவர்கள் , என்ற விமர்சனத்தை யதார்த்தமாக்கும் வகையில் எமது செயற்பாடுகளும் முடிவுகளும் அமைந்து விடக்கூடாது.

எனவே குறித்த அந்த சகோதரியை உத்தியோக பூர்வமாகவும் , கண்ணியமாகவும் அணுகி குறித்த முடிவின் பாரதூரங்களை எடுத்துச் சொல்லி உள ரீதியாக தைரியமூட்டி தனது பணியை தொடர்வதற்கு தேவையான வழிகாட்டல்களை வழங்குவது சமூகக் கடமையாகும்.

@ஹுஸ்னி ஹனீபா (நளீமி)