இஸ்மாயில் ஹஸ்ரத்தின், ஒருநாள் இரவு

நான் A /L படிக்கும் காலம். ஏறாவூரில் ஒரு குடும்பத்தில் நடைபெற்ற ஒரு நிகழ்வுக்காக இஸ்மாயில் ஹஸ்ரத் வந்திருந்தார்கள். அன்று இரவு அவருடைய பணிவிடைக்காக நான் அமர்த்தப்பட்டேன்.

இதனால் அவருடன் குறிப்பிட்ட நேரத்தை செலவிடக்கூடிய சந்தர்ப்பம் கிடைத்தது அல்ஹம்துலில்லாஹ். ஹஸ்ரத் அவர்களுடன் இருந்த அந்த சொற்ப நேரத்திற்குள்ளால் ஹதீஸில் சொல்லப்பட்ட நிறைய சுன்னாக்கள் அவரால் உயிர்ப்பிக்கப்படுவதை என் கண்களால் பார்க்க கிடைத்தது. சுப்ஹானல்லாஹ்.

ஹஸ்ரத் அவர்கள் ஏறாவூருக்கு வரும்போது இரவு ஒரு 11.00மணி இருக்கும். பிறகு ஏற்பாடு செய்யப்பட்டிருந்த இரவு சாப்பாட்டை பிஸ்மியுடன் ஆரம்பித்தார்கள். ஒவ்வரு முறையும் உணவை வாயினுள் வைக்கும் போது அல்லாஹ்வுக்கு நன்றிசெலுத்தினார்கள்.

சாப்பாட்டுக்கு பின் குடும்ப உறுப்பினர் ஒருவர் தாடியை கிளீன் ஷேவ் செய்த நிலையில் வந்தார். அவரிடம் பணிவாக இதை வளர்த்தால் அல்லாஹ்வின் அன்பு கிடைக்கும் என்பதாக சொல்லிவிட்டு, பின்பு அவரை பலமுறை அழைத்து உங்களுக்கு நான் சொன்னது உங்களை பாதித்தால் அல்லாஹுக்காக என்னை மன்னியுங்கள் என்று மன்னிப்பும் கேட்டார். தாடி வைப்பது என்பது சுன்னத். ஆனால் ஒரு மனிதனுடைய உள்ளத்தை உடைப்பது ஹராம் என்பதாக எங்களிடம் சொன்னார்கள்.

பிறகு தூங்குவதற்காக வுழு செய்துவிட்டு வந்து துஆ செய்ய ஆரம்பித்தார்கள். பின்னர் தொழ எழுந்து நின்று (சரியாக நினைவில்லை) 2 றகத் தொழுதார்கள்.பின்பு என்னிடம் மகன், என்னை தகஜ்ஜத்துக்கு எழுப்பிவிடுங்கள் என்று கூறிவிட்டு (ஒரு தூங்கினார்கள். ஒரு அடிமையின் தூக்கம் போலவே அவர் தூங்கியது என் கண்ணில் இன்னும் நினைவில் இருக்கிறது.)

தூக்கமும் ஓரிரு மணித்தியாலம்தான் தூங்கி இருப்பார்கள்.( களைப்போடு வந்திருந்த அவர்களை எழுப்ப எனக்கு மனம் வரவில்லை.)

03.00மணிக்கு (சரியாக நினைவில்லை) ஹஸ்ரத் என்று ஒரு மெல்லிய சத்தம்வைக்க, பதட்டத்துடன் எழும்பி அல்லாஹ்வை புகழ்ந்து துஆவை ஓதிவிட்டு மிஸ்க்வாக் செய்து உளு செய்து தகஜ்ஜத்தொழ ஆரம்பித்தார்கள். என்ன ஆச்சிரியம் ஒரு ஸுஜூதில் 30நிமிடங்களை கழித்தார்கள். (இதுவரை நான் யாரையும் இப்படி பார்த்ததில்லை) யாருக்கும் இவருடைய வணக்கம் இடைஞ்சலாக இருக்கவில்லை.

(சரியாக நினைவில்லை) பின்பு அல்லாஹ்வை திக்ர் செய்து துஆவுடன் தன்னுடைய தஹஜ்ஜுத்துடைய அமல்களை பூர்த்தி செய்தார்கள்.

சுபஹ் தொழுகைக்கான அதான் நேரம் நெருங்கியதும் (அதான் நேரத்திற்கு முன்பு), தாஹா ஹுசைன் சேர் உட்பட ஏறாவூர் ஏரியாவின் மர்கஸ் பொறுப்புதாரிகளை சந்திக்க வேன்டும் என்று சொன்னார்கள். நான் மர்கஸ் பொறுப்புதாரிகளுக்கு அறிவித்துட்டு ஹஸ்ரத் அவர்களிடம் அவர்களுடைய பிரயானம் காலை 5 மணிக்கு என்று ஞாபகப்படுத்தினேன். எல்லோரிடமும் அறிவித்து விட்டேன்.

சுப்ஹு தொழுகைக்கு பிறகு ஏறாவூர் ஜிப்பிரி தைக்கா பள்ளியில் ஒன்று சேர்ந்து ஒரு சிறிய பயான் செய்ய ஆரம்பிக்கும் போது நான் மீண்டும் பஸ் யாருக்காகவும் WAIT பன்ன மாட்டார்கள் என்று சொல்லிவிட்டு உரையை கேட்க ஆரம்பித்தேன்.

30நிமிடம் வரை பேசினார்கள். நான் பஸ் போயிருக்கும் என்று நினைத்துக் கொண்டு வந்தேன். அங்கே அப்போதான் அந்த பஸ் வந்தது. விசாரித்தபோது ட்ரைவர் லேட் என்று சொன்னார்கள். சுமார் வழமையாக புறப்படும் நேரத்தை விட 1மணி நேரம் தாமதமாகவே அன்று பஸ்ஸும் புறப்புட்டது.

அல்லாஹ் தனக்கு கட்டுப்பட்டு வாழும் தன்னுடைய நல்லடியார்களுக்கு என்றும் உதவி செய்வான்.

நானும் பலமுறை அவர் தொழுகையை போல தொழுவதற்கு நேரம் எடுத்து முயறசி செய்துள்ளேன். அனால் முடியவில்லை .

முக்கியமான விடயம், இவ்விடத்தில் நான் அவரிடத்தில் பார்த்ததை எழுதி இருக்கின்றேன். அவருடைய அந்தரங்கமும் முடிவுகளும் அல்லாஹ்விடமே. அல்லாஹ் அவரை கபூல் செய்வானாக !!!! ஆமீன்.

அவர் எங்களிடம் ஒரு திக்ர் சொன்னர்.

"அல்லாஹ் என்னை பார்க்கிறான். அல்லாஹ் என்னோடு இருக்குறான்." (இதனை நாம் வாழ்வில் எந்த சந்தர்ப்பத்திலும் மறந்துவிடக்கூடாது.)

விடிய விடிய பாவத்தில் கழிக்கும் மனிதர்கள் இருப்பதை போல, இரவை அல்லாஹ்வின் வணக்கத்தில் கழிக்கும் நல்லடியார்களும் இந்த பாவங்களால் நிறைந்த குழப்பங்களால் சூழப்பட்ட உலகத்தில் வாழ்கிறார்கள்.

நாம் செய்கின்ற எத்தனையோ மார்க்கத்திற்கு முறனான விடயங்களுக்கு தற்கால உலகத்தின் போக்கையும் சூழலையும் சொல்லி மக்களிடம் தப்பிவிடுகின்றோம். ஆனால் இதே உலகத்தின் போக்கில் இதே சூழலில் இதே காலப்பகுதியில் மார்க்கத்திற்கு முறன்படாமல் வாழ்ந்த நல்லடியார்களை முன்னிறுத்தி உதாரணத்திற்காக நாளை மறுமையில் அழ்ழாஹ் நம்மிடம் கேட்கும்போது என்ன பதில் சொல்லப்போகின்றோம்?? 

மக்களிடம் சொன்ன அதே காரணங்களை சொல்லமுடியுமா???

ஏறாவூர் அக்ரம்