சட்டத்தரணி ஷிராஸ் நூர்தீன் மீள்வருகை, சமுதாயத்தின் சட்டப் போராட்ட இடைவெளியை நிரப்பும்

இனவாதம் உச்சத்தை தொட்டிருந்த கடந்த காலத்தில், முஸ்லிம்களுக்கு எதிரான திட்டமிட்ட தாக்குதல்கள், பள்ளிகள் மீதான தாக்குதல்கள், முஸ்லிம் உரிமைப் பறிப்பு மற்றும் கலாசாத்தின் மீதான திட்டமிட்ட உரிமை பறிப்புகள் என இனவாதத்தின் கோர முகம் தலை விரித்தாடியது.

மாற்று சமுதாயத்தினரின் பிரச்சினைகளின் போது அவர்களுக்காக குரல் கொடுப்பதற்கும், சட்ட ரீதியாக பிரச்சினைகளை எதிர்கொண்டு சமுதாயத்தை பாதுகாப்பதற்கும் பல சட்டத்தரணிகள் களத்திலிருக்கும் நிலையில் முஸ்லிம் சமுதாயத்தின், சமுதாய பிரச்சினைகளின் போது சமூக நலன் கருதி சட்ட ரீதியாக நீதி மன்றில் போராடும் சட்டப் போராளிகளின் கையறு நிலை தொடர்ந்து கொண்டேயிருக்கிறது.

இந்நிலைமையில் தான் கடந்த கால இனவாத செயல்பாடுகளின் போது இனவாதிகளுக்கு எதிராக இறைவனின் உதவியினால் சட்டத்தரணி ஷிராஸ் நூர்தீன் தலைமையிலான சட்டத்தரணிகள் குழு கடும் சட்டப் போராட்டத்தை நடத்தியது.

இந்தப் போராட்டத்தினால் இனவாதிகளின் கடும் எதிர்ப்பினை பல சந்தர்ப்பங்களில் நேரடியாகவே சட்டத்தரணி ஷிராஸ் நூர்தீன் தலைமையிலான குழு சந்திக்கவும் ஏற்பட்டது.

குறிப்பாக அளுத்கமை கலவரத்தில் பாதிக்கப்பட்ட முஸ்லிம்கள் சார்பாக நூற்றுக்கும் மேற்பட்ட புகார்களை இனவாதிகள் மீது ஆதாரத்துடன் பதிவு செய்தார்கள்.

முஸ்லிம் சமுதாயத்திற்கு ஏற்பட்ட பல பிரச்சினைகளின் போது பல சட்டத்தரணிகள் அது பற்றி வாய் திறக்க பயந்த நிலையில் அல்லாஹ்வின் உதவியினால் இவர்கள் அவற்றை எதிர்கொண்டார்கள்.

பல பள்ளிவாயல் பிரச்சினைகளின் போதும் நீதி மன்றம் சென்று போராடினார்கள்.

முஸ்லிம்கள் தாக்கப்பட்ட சந்தர்பங்களில் மக்களை நேரடியாக சந்தித்து சட்ட உதவிகளை செய்தார்கள்.

இலங்கையில் தஞ்சமடைந்த ரோஹிங்யா முஸ்லிம்கள் மீது இனவாதிகள் தாக்குதல் நடத்திய நேரத்தில் இனவாதிகளுக்கு எதிராக சட்டப் போராட்டம் நடத்தினார்கள். இப்படி பல சந்தர்பங்களை நினைவு கூறலாம்.

பொது பல சேனாவினால் சிலோன் தவ்ஹீத் ஜமாஅத்தின் பொதுச் செயலாளர் சகோ. அப்துர் ராசிக் மீது மத நிந்தனை வழக்கு தாக்கள் செய்யப்பட்ட நேரத்தில் குறித்த வழக்கை எடுத்து நடத்துவதற்கு முஸ்லிம் சட்டத்தரணிகள் பலரும் அச்சம் வெளியிட்ட நேரத்தில் சகோ. ஷிராஸ் நூர்த்தீன் குறித்த வழக்கை கையில் எடுத்தார். வழக்கின் முதல் நாள் அமர்வில் சகோ. சட்டத்தரணி ருஷ்தி ஹபீப் அவர்கள் மன்றில் ஆஜராகியதை இந்நேரத்தில் நன்றியுடன் நினைவுகூற வேண்டிக் கடமைப்படுகிறேன்.

GSP+ வரிச் சலுகையை இலங்கைக்கு பெற்றுக் கொள்வதற்காக வேண்டி, முஸ்லிம் தனியார் சட்டத்தில் கை வைக்க முயன்ற ஆளும் ஐ.தே.க அரசாங்கத்திற்கு எதிராக ஆர்பாட்டம் நடத்தவிருந்த நேரத்தில், அல்லாஹ்வையும், இஸ்லாத்தையும் அசிங்கப்படுத்தும் நோக்கில் பொது பல சேனாவின் செயலாளர் ஞானசார தேரர் பேசியிருந்தார்.

அல்லாஹ்வை அவமானப்படுத்தும் வகையில் பேசிய ஞானசாரருக்கு எதிராக முஸ்லிம்கள் தரப்பில் யாரும் பதிலளிக்க முன்வராமல் மவ்னித்துப் போயிருந்தார்கள்.

முஸ்லிம் தனியார் சட்டத்தில் அரசு தன்னிச்சையாக திருத்தம் கொண்டுவர முனைவதற்கு எதிராக நடத்தப்பட்ட ஆர்பாட்டத்தில் ஞானசார தேரரின் இஸ்லாம் விரோத இனவாத, அபத்தமான கருத்துக்கு எதிராக சகோ. அப்துர் ராசிக் பகிரங்கமாக பதிலளித்து உரையாற்றினார்.

ஞானசாரருக்கு எதிராக பேசியதற்காக சகோ. அப்துர் ராசிக் கைது செய்யப்பட்டு 24 நாட்கள் சிறையிலடைக்கப்பட்டார். 

இந்த சந்தர்ப்பத்திலும் சமுதாயம் சார்பில் வழக்காடுவற்கோ, நீதிமன்றப் படியேறுவதற்கோ சட்டத்தரணிகளின் பலர் பின்வாங்கிய நேரத்தில் தைரியமாக நீதி மன்றம் வந்தார் சகோ. ஷிராஸ் நூர்தீன் அவர்கள்.

இந்த நேரத்தில் சட்டத்தரணி மைத்திரி குணரத்ன அவர்களும் பிரதானமாக நினைவு கூறத் தக்கவர். மாற்று சமுதாயத்தை சேர்ந்தவராக இருப்பினும், இனவாதத்திற்கு எதிராக பல வழக்குகளில் ஷிராஸ் நூர்த்தீன் அவர்களுடன் ஆஜரானார். 

அப்துர் ராசிக் அவர்களுக்கு எதிரான பொது பல சேனாவின் மத நிந்தனை வழக்கு மற்றும் ஞானசாரவுக்கு எதிராக பேசியதற்காக கைது செய்யப்பட்ட வழக்கு என பல வழக்குகளில் ஷிராஸ் நூர்தீன் அவர்களுடன் இணைந்து வழக்காடினார். 

சமூக நலனுக்காக இனவாத பிரச்சினைகளின் போது தானாக முன்வந்து சட்ட உதவிகளை சமுதாயத்திற்காக செய்து வந்த சட்டத்தரணி ஷிராஸ் நூர்தீன் அவர்களை இதிலிருந்து ஓரம் கட்டுவதே இனவாதத்தை வைத்து அரசியல் இலாபம் அடையும் சிலருக்கு தேவையானதாக இருந்தது. 

பொது பல சேனாவின் தேவைக்காக முஸ்லிம்களை காட்டிக் கொடுத்து, பின் வாசல் வழியாக இனவாதிகளுடன் கைகோர்த்து முஸ்லிம்களுக்கு துரோகம் இழைத்து, பதவிகளுக்காக பல்லிழித்துக் கொண்டு திரியும் சில அரசியல் வாதிகளும், போலி ஆன்மீக வாதிகளும், பணத்திற்காக எதனையும் செய்யும் சில லெட்டர் பேட் இயக்க வாதிகளும் இணைந்து செய்த சில காரியங்களினால் சில காலம் சமுதாய சட்டப் போராட்டத்தை விட்டும் ஒதுங்கியிருந்தார் சகோதரர் ஷிராஸ் நூர்தீன் அவர்கள்.

அல்ஹம்து லில்லாஹ். மீண்டும் சட்டப் போராட்டக் களத்தில் இறங்கியுள்ளார் சகோதரர் ஷிராஸ் அவர்கள். 

தூபி மீதேறி புகைப்படம் எடுத்தமைக்காக கைது செய்யப்பட்டுள்ள 07 மாணவர்கள் பற்றிய வழக்கு விசாரனையில் சட்டத்தரணி ஷிராஸ் களமிறங்கவுள்ளதான செய்தி மகிழ்ச்சியளிக்கிறது. தொடர்ந்தும் முஸ்லிம் சமுதாய பிரச்சினைகள் விவகாரங்களில் சட்டப் போராட்டத்தின் மூலம் நீதி வெற்றிபெற ஷிராஸ் நூர்தீன் அவர்கள் போராட வேண்டும்.

உச்சகட்ட இனவாத சூழலில், இனவாதிகளுக்கு எதிராக சட்ட ரீதியாக களமிறங்க பலரும் அஞ்சிய நேரத்தில் களமிறங்கி சமுதாயத்திற்காக போராடிய சட்டத்தரணிகளான ஷிராஸ் நூர்தீன், ருஷ்தி ஹபீப், ஷாஹினாஸ், ஸரூக், நுஸ்ரா ஸரூக் போன்றோருடன் சட்டத்தரணி மைத்திரி குணரத்ன அவர்களையும் சமுதாயம் மறந்து விடக் கூடாது என்பதுடன் தற்போது குரல்கள் அமைப்பும் சட்ட ரீதியாக முஸ்லிம் சமுதாயம் எதிர்கொள்ளும் பிரச்சினைகளுக்கு களம் கண்டு வருவது பாராட்டத் தக்கதாகும். 

மீண்டும் சமுதாயத்திற்காக சட்டப் போராட்டக் களத்தில் சங்கமிக்கும் சட்டத்தரணி ஷிராஸ் அவர்களுக்கு அல்லாஹ் அருள் புரிய வேண்டும் என பிரார்த்திப்பதுடன், அவருடைய குழுவினருக்கும், சமுதாயத்திற்காக போராடும் அனைத்து சகோதரர்களுக்கும் அல்லாஹ் அருள் புரிய வேண்டும் என பிரார்த்திக்கிறோம்.

-ரஸ்மின் MISc