24 மணித்தியாலத்துக்குள் பறிபோன முஸ்லிம்களின் காணிகள் - முஸ்லிம் Mp கள் நித்திரை

சம்மாந்துறைக்கு இரண்டு பாராளுமன்ற பிரதிநிதிகள் இருந்தும், மாவட்டத்துக்கு ஐந்து பாராளுமன்ற பிரதிநிதிகள் இருந்தும், இம்மாவட்டத்தின் பிரதேச சபைகளை சமமாக பகிர்ந்துகொண்ட கட்சிகளின் இரண்டு கெபினட் மந்திரிகள் இருந்தும் பலவெளி வாய்க்கால் மேற்குப்புறம் சுமார் 836 ஏக்கர் காணிகளின் ஆவணங்கள் சம்மாந்துறை பிரதேசத்தில் இருந்து அம்பாறை பிரதேசத்திற்கு எவ்வாறு 24 மணித்தியாலயத்திற்குள் மாற்றப்பட்டது என்று உறுதிக்கணிகளை கொண்ட இம்மக்கள் கேள்வியெழுப்பியுள்ளனர். 

அதுமாத்திரமல்லாமல் முஸ்லிம், தமிழ் மக்களுக்கு சொந்தமான இக்கணிகளில் சிங்கள இனத்தவர்கள் நேற்றும் இன்றும் விவசாய செய்கையில் ஈடுபட்டுள்ளனர். இந்நாடவடிக்கைகளை சம்மாந்துறை பொலீஸில் முறைப்பாடு செய்ய முடியாமல், அம்பாறை பொலீஸில் முறைப்பாடு செய்யவேண்டிய துர்ப்பாக்கிய நிலைக்கு இம்மக்கள் தள்ளப்பட்டுள்ளனர். 1943 ஆம் ஆண்டின் நில அளவை சான்றுகளுடன், தொடர்ச்சியாக விவசாயம் செய்துவந்த காணிகள், யுத்த காலத்திலும் எவ்வித தடங்களும்மின்றி விவசாயம் செய்துவந்த காணிகள், நல்லாட்சியில் பறிக்கப்பட்டதற்கு யார் காரணம்?

அண்மையில் பாராளுமன்றத்தில் தோற்கடிக்கப்பட்ட எல்லை நிர்ணயத்தில் சம்மாந்துறையின் 10.28 ச.கி. பரப்பை கொண்ட 89 C, 89 B கிராம சேவகர் பிரிவுகள் அட்டாளச்சேனை தொகுதியுடன் சேர்க்கப்பட்டதை யாரும் மறந்திருக்கமாட்டீர்கள். தற்போது அம்பாரைக்கு மாற்றப்பட்டுள்ள காணிகள் இப்பிரதேசத்திற்கு உரியது என்பது மிக முக்கியமான விடயமாகும். பாராளுமன்றத்தில் ஒன்றை காட்டி, கச்சேரியில் எல்லைகளை மாற்றும் நடவடிக்கைக்கு துணைபோனது மக்கள் பிரதிநிதிகளா? அல்லது சம்மாந்துறை அரச அதிகாரிகளா? ஏற்கெனவே கொண்டவட்டுவன் வரை இருந்த சம்மாந்துறை எல்லை சுருங்குவதற்கு எவ்வாறு செயற்பட்டதோ அவ்வாறே இன்றும் மன்சூர் எம். பி. கோ சேர்மனாக இருக்கும் நிலையில் காய்நகர்த்தியுள்ளது அம்பாறை கச்சேரி.

இது சம்மாந்துறை காணிகளை இழந்த விவசாயிகளின் பிரச்சினை மாத்திரமல்ல, சம்மாந்துறை மக்களின் பிரச்சினை மாத்திரமல்ல, முஸ்லிம் சமூகத்தின் இருப்பு சம்மந்தமான பிரச்சினையாகும். முஸ்லிம் சமூகத்தின் பிரச்சினை மாத்திரமல்ல தமிழ் பேசும் சமூகத்தின் பிரச்சினையுமாக்கும். கரையோர மாவட்டத்தை பெறாமல் தடுப்பதில் பேரினவாதம் திட்டமிட்டு செயலாற்றும் இவ்வேளையில் முஸ்லிம் கட்சிகள் அபிவிருத்தி விழாக்கள் என்று பொன்னாடை கூத்தாட்டங்களை நடத்துவது வேடிக்கையாகவும், வேதனையாகவும் உள்ளது.

சாய்ந்தமருது பள்ளிவாசலின் முன்மாதிரியினை பின்பற்றி சம்மாந்துறையின் 52 பள்ளிகளுக்கு தலைமை தாங்கும் பள்ளிவாசல் தலைவர் முன்வர வேண்டும், சம்மாந்துறையில் இருந்து பறிபோகும் காணிகளை மீட்டு கரையோர மாவட்டத்தை பிரகடனப்படுத்துவதர்கு. பொன்னாடை போர்த்தி குத்தாட்டம் நடத்தும் அரசியல் வாதிகளை நம்பவேண்டாம். தமிழ் மக்களின் முன்மாதிரியை பின்பற்றி உங்கள் அரசியலை உங்கள் உரிமைக்காக பயன்படுத்த அம்பாறை ஜம்மியதுல் உலமா இம்மக்களை வழிநடத்த முன்வர வேண்டும்.

-Alif Sabri-