தலதா அத்துகோரளவின் சபதம்

எப்படியான எதிர்ப்புகளை வெளியிட்டாலும் ஒழுங்கு முறைப்படி செயற்பாடுகள் முன்னெடுக்கப்படுமே அன்றி அதில் மாற்றங்களை செய்ய முடியாது என நீதி மற்றும் சிறைச்சாலைகள் மறுசீரமைப்பு அமைச்சர் தலதா அத்துகோரள தெரிவித்துள்ளார்.

வெலிகடை சிறைச்சாலையில் பெண் கைதிகள் கூரை மீது ஏறி ஆர்ப்பாட்டம் ஒன்றை ஆரம்பித்துள்ளமை தொடர்பில் இரத்தினபுரி, நிவித்திகலை, துத்திரிபிட்டிகம பாலத்திற்கு அடிக்கல் நாட்டிய பின்னர், ஊடகவியலாளர்கள் எழுப்பிய கேள்விக்கு பதிலளிக்கும் போதே அவர் இதனை கூறியுள்ளார்.

“ கூரை மீது அல்ல எதில் ஏறினாலும் தற்போது முன்னெடுக்கப்படும் ஒழுங்கு முறைக்கு அமைய செயற்பாடுகள் முன்னெடுக்கப்படும். அதில் மாற்றங்களை செய்ய முடியாது.

எவருக்கும் ஆர்ப்பாட்டங்களை நடத்தும் உரிமை நாட்டில் தற்போது ஏற்படுத்தப்பட்டுள்ளது. ஆர்ப்பாட்டங்களை நடத்தினால், முன்புபோல் துப்பாக்கிச் சூடு நடத்தப்படுவதில்லை.

சிறைச்சாலைகளுக்குள் இன்னும் சட்டவிரோத வேலைகள் நடைபெறுகின்றன என்பதை அனைவரும் ஏற்றுக்கொண்டுள்ளனர். இதனை நான் எப்படியாவது கட்டுப்பாட்டுக்குள் கொண்டு வருவேன்” என அமைச்சர் தலதா அத்துகோரள குறிப்பிட்டுள்ளார்.