நான், இர்பான் ஹாபீஸ் - பகுதி 2
அவர் அந்த திட்டத்தில் எனது தந்தையின் சார்பில் எமது குடும்பத்தை பதிவு செய்தார். சில வாரங்களின் பின்னர் எனது தந்தைக்கு DMD வியாதி தொடர்பில் பயனுள்ள தகவல்களைக் கொண்ட பொதியொன்று பெற்றோர் திட்ட தலைவரிடமிருந்து கிடைக்கப்பெற்றது. அதன் பின்னர் டச்சு பெற்றோர் திட்ட தலைவி எலிசபத் ரூம் இடமிருந்து ஹோலந்து நாட்டில் இடம்பெறவுள்ள பெற்றோர் மாநாட்டில் கலந்துகொள்வதற்கான அழைப்புக் கடிதம் கிடைத்தது.
அவருக்கும் ஒரு DMD வியாதியுள்ள ஒரு மகன் இருக்கிறார். இந்த அனைத்து நிகழ்வுகளுடனும் சடுதியாக எனது தந்தையின் வாழ்வு மற்றும் வெளித்தோற்றம் என்பனவற்றில் மாற்றங்கள் தென்படத் தொடங்கின.
எனது தந்தை பெற்றோர் திட்டத்தின் அங்கத்தவரானதன் பின்னர் எனது தந்தையிடமிருந்து அதிக நம்பிக்கை மற்றும் தைரியம் என்பவற்றை என்னால் பெற முடிந்தது. அமெரிக்காவிலும் ஐரோப்பாவிலும் இடம்பெறும் பெற்றோர் மாநாடுகளில் பங்குகொள்வதன் மூலம் என்னைப் போல் நூற்றுக்கணக்கான பெற்றோரிடம் இருந்து DMD வியாதி பற்றி அதிக அறிவைப் பெறமுடியுமென்று அவர் கூறினார்.
செயற்கை சுவாசக் கருவியினை வாங்குவதற்கான போராட்டம்...
மிக விரைவில் எனக்கு ஒரு செயற்கை சுவாசக் கருவி தேவைப்படுமென எனது தந்தை புரிந்துகொண்டார். எனினும் புதிய செயற்கை சுவாசக் கருவியின் விலை 3000 அமெரிக்க டொலரிலும் அதிகமாகையால் அவரிடம் அந்த அளவு பணம் இருக்கவில்லை. எனது தந்தையின் வருமானம் எமது குடும்பத்தின் உணவுத் தேவையைப் பூர்த்தி செய்வதற்கே போதுமானதாக இருந்தது. எனினும், எனக்கு மிக விரைவில் அந்தக் கருவியின் அவசியம் ஏற்படும் என்பதை அறிந்திருந்ததால் எவ்வாறாவது செயற்கை சுவாசக் கருவியொன்றைப் பெறுவதற்கு மிகுந்த பிரயத்தனம் மேற்கொண்டார். எனவே அவர் அதிகமான செயற்கை சுவாசக் கருவி உற்பத்தியாளர்களைத் தொடர்பு கொண்டதுடன் உலகெங்குமுள்ள தனது நண்பர்களை உதவிகளைப் பெறும் நோக்கில் தொடர்புகொண்டார். நீண்ட போராட்டத்தின் பின்னர், டச்சு பெற்றோர் திட்டத்தின் தலைவியும் எனது தந்தையின் நண்பியுமான எலிசபத் எமக்கு உதவ முன்வந்தார். அவர் எமக்கு ஒரு புதிய செயற்கை சுவாசக் கருவியைப் பரிசளித்தார். நாம் மிகவும் ஆச்சரியம் அடைந்ததுடன் நீண்ட போராட்டத்தினடியாக ஒரு செயற்கை சுவாசக் கருவி கிடைத்ததையிட்டு எனது தந்தையால் நிம்மதிப் பெருமூச்சுவிட முடிந்தது. எனது செயற்கை சுவாசக்கருவி ஒரு புதிய வாழ்வை எனக்கு வழங்கியது. அது விடயங்களை இலகுவாக்கியதுடன் சுவாசப் பிரச்சினை தொடர்பான பயத்தை அகற்றியது. இது தொடர்பில் எனது தந்தைக்கும் கருவியைப் பரிசளித்த எலிசபத்துக்கும் நான் நன்றி உடையவனாவேன்.
வாழ்வு அதிக சிரமமிக்கதாக மாறுகின்றது...
இதனிடையே, நான் படுத்த படுக்கையாக இருக்கும் வேளை படுக்கைப் புண்கள் ஏற்பட ஆரம்பித்தன. அவை எனது நெஞ்சின் மையப் பகுதியிலிருந்து விலாப்பகுதி வரை ஏற்பட்டது. படுக்கைப் புண்கள் தொந்தரவு மற்றும் வலிமிக்கதாகக் காணப்பட்டன. எனது தாயார் மற்றும் மூத்த சகோதரி ஆகியோர் புண்களைக் கழுவிய பின் அவற்றுக்கு மருந்திடுவார்கள். பின்னர் எனது முதல் இளைய சகோதரி இந்தப் பணியை எனது தாயாரிடமிருந்து பெற்றுக் கொண்டாள். மிகவும் கடினமான இந்த வலியை என்னால் முடிந்தவரை பொறுத்துக் கொண்டேன், முடியாத போதெல்லாம் கண்ணீர்விட்டு அழுவேன். இந்த அனைத்து சிரமங்களுடனும் வாழ்வு மிகவும் ஏமாற்றம் மிக்கதாக இருந்த போதும் நான் பொறுமையை மற்றும் தைரியத்தை இழக்கவில்லை. எனது உறுதியான மத நம்பிக்கை இந்த அனைத்து சவால்களுக்கும் முகம்கொடுக்க உதவியது.
செயற்கை சுவாசக் கருவியுடன் என்னால் இரவுகளில் நன்றாக உறங்க முடிந்தது. அந்தக் கருவியின் உதவியின்றி இரவில் தூங்க முடியாத அளவுக்கு அந்தக் கருவிக்கு அடிமையானவனாகவே நான் இருந்தேன். எனது செயற்கை சுவாசக் கருவி நாளொன்றுக்கு 8 மணித்தியாலங்கள் வரை வேலை செய்தது. பல வருடங்கள் இவ்வாறு நீண்ட நேரம் இயங்கியதன் காரணமாக அந்தக் கருவி அதிக சத்தம் ஏற்படுத்தக் கூடியதாகவும் அடிக்கடி பழுதடையக் கூடியதாகவும் மாறியது. ஒருநாள் அது இயங்கவில்லை, பின்னர் அதன் இயந்திரத் தொகுதி பழுதடைந்திருந்தது. எனினும் எனது மூத்த சகோதரர் இரண்டு நாட்களுக்குள் தனது தொழில்நுட்பவியல் நண்பர் ஒருவரின் மூலமாக திருத்திக் கொடுத்தார். சுவாசக் கருவி இன்றி தூக்கமற்ற இரவுகளைக் கழிக்க வேண்டி ஏற்படும் என்ற பயத்துடன் இருந்த எனக்கு இது நிம்மதியை வழங்கியது. அந்தக் கருவி திருத்தப்பட்டபோதும் எந்த நேரத்திலும் அது இயங்குவதை நிறுத்தலாம் என எனது சகோதரரின் நண்பர் எச்சரித்திருந்தார்.
வாழ்வு காக்கப்பட்டது...
DMD வியாதி காரணமாக ஏற்படும் அதிகரிக்கும் தசை நார் வலுவிழப்பு குறிப்பாக, இதயம் மற்றும் நுரையீரல் தொடர்பான பாரிய மருத்துவப் பிரச்சினைகளுக்கு இட்டுச் செல்லும். எனது நுரையீரல்கள் நலிவுற்றதன் காரணமாக எனக்கு காய்ச்சல் மற்றும் சளி என்பன ஏற்படும்போது அனைத்து விடயங்களும் சிரமம் மிக்கதாக மாறும். எனது நுரையீரல்கள் நலிவுற்றிருப்பதன் காரணமாக இருமுவது மிகவும் கடினமானதாக இருக்கும். இந்த சுவாசக் கருவியின் உதவியினால் எனது உயிர் காக்கப்பட்டது. ஒரு முறை சளி மற்றும் காய்ச்சல் ஏற்பட்டபோது மிகவும் கடினமாக இருந்தது. இந்த நேரங்களில் சளி காரணமாக சுவாசிப்பதற்கு மிகவும் சிரமப்படுவதால் ஒரு நிமிடம்கூட சுவாசக் கருவியின் உதவியின்றி என்னால் வாழ முடியாது. எனவே, இரண்டு வாரங்களுக்கு சுவாசக்கருவி ஓய்வின்றி இயங்கியது. எனது குடும்பத்திலுள்ள ஒவ்வொருவரும் அந்த இரவுகளில் எனக்கு அருகில் இருந்தனர். நீண்ட நாட்கள் சிரமத்தின் பின்னர் நான் குணமடைந்தேன்.
பாரிய அதிர்ச்சி...
எனது மூத்த சகோதரரை நான் இழந்தபோது எனது வாழ்வில் பாரிய அதிர்ச்சியையும் சோகத்தையும் சந்தித்தேன். அவர் என்னுடன் மிகவும் நெருக்கமாக இருந்ததுடன் நான் மகிழ்வாக இருக்க அனைத்தையும் செய்தார். ஒரு உண்மையான சகோதரராக எனது அனைத்து துன்பங்களிலும் பங்கெடுத்து எனது நலனுக்காக தனது வாழ்வைத் தியாகம் செய்தார். அவரது அன்பும் கவனிப்பும் எனது வாழ்வை ஆறுதல்படுத்தியது. அவர் புதிதாக எதை அறிந்தாலும் அதை எனக்கும் கற்றுக் கொடுத்தார். எனது ஏனைய குடும்ப உறுப்பினர்கள் சுற்றுலாக்கள் மற்றும் வெளியில் செல்லும் போதெல்லாம் என்னுடன் இருப்பதற்காக அவற்றை எல்லாம் தியாகம் செய்தார்.
குருதிப் புற்றுநோய் அடையாளம் காணப்படும் வரை அவர் உறுதியானவராகவும் சக்திமிக்கவராகவும் இருந்தார். அந்த செய்தி எங்களுக்கு பாரிய அதிர்ச்சியாகவும் சோகம்மிக்க காலப்பகுதியாகவும் அமைந்தது. அவர் சிகிச்சைக்காக இந்தியாவுக்கு அழைத்துச் செல்லப்பட்டார். அங்கு இரண்டு முறை கதிரியக்க சிகிச்சை மேற்கொள்ளப்பட்ட பின்னர் அவரது உடல் நிலையில் முன்னேற்றம் ஏற்பட்டதுடன் அவர் வீட்டுக்குக் கூட வந்தார். எனினும் மூன்றாவது கதிரியக்க சிகிச்சைக்காக இந்தியாவுக்கு கொண்டு செல்லப்பட்ட பின்னர் அவரது நிலை மோசமடைந்தது. எனது சகோதரர் இந்த அனைத்து வேதனைகளையும் வலிகளையும் சகித்துக்கொண்டு இந்த துன்பங்களுக்கு மத்தியிலும் நேர்மையானவராக இருந்தார்.
எனது தந்தையும் இளைய சகோதரரும் அவருடன் இந்தியாவில் இருந்தனர். அவர்கள் உளவியல் ரீதியாக பாரிய தாக்கத்துடனான காலப்பகுதியை அங்கு கழித்தனர். உளவியல் ரீதியாகப் பல பாரிய சவால்களைச் சந்தித்த எனது தந்தை எனது மூத்த சகோதரரின் துன்பங்களைக் கண்டு உளவியல் ரீதியாக நொறுங்கிப் போனார். எனினும் இறுதித் தருணம்வரை நம்பிக்கையை இழக்கவில்லை. எவ்வாறாயினும் 2006 ஏப்ரல் 14 ஆம் திகதி வெள்ளிக்கிழமை காலை எனது சகோதரரின் இதயத் துடிப்பு அமைதியாக நின்றதுடன் அனைத்தும் முடிவுக்கு வந்தது. எங்களது சகோதரர் எங்களையும் இந்த உலகத்தையும் விட்டு சென்றுவிட்டார் என்பதை செவியுற்றதுடன் எங்களின் இதயங்களில் ஏற்பட்ட வேதனையைத் தாங்கிக் கொள்ள முடியவில்லை. அழுவதைத் தவிர எங்களால் வேறு எதனையும் செய்ய முடியவில்லை. எனினும் என் வாழ்நாளில் அதுவரை நான் அந்தளவுக்கு அழுததில்லை. நான் அவரின் அன்பையும் கவனிப்பையும் இழந்துவிட்டேன். ஒரு சிறந்த சகோதரரை நான் இழந்து விட்டேன். எனது அன்புக்குரிய சகோதரருக்கு சுவர்க்கத்தை வழங்கும்படி எல்லாம் வல்ல இறைவனை வேண்டி என்னை நானே தேற்றிக்கொண்டேன்.
அவரது இழப்பின் சோகத்திலிருந்து மீள எமக்கு நீண்ட காலம் எடுத்தது. தனது அன்பு மகனின் இழப்பால் மிகவும் உடைந்து போயிருந்த என் தந்தை, தனது மகனின் நினைவு தோன்றும் போதெல்லாம் அழுவார். எனினும் எங்களது உறுதியான மத நம்பிக்கை அனைத்து துன்பங்கள் மற்றும் இழப்புகளைத் தாங்கிக் கொள்ளக்கூடிய போதுமான தைரியத்தை வழங்கியது. நான் அவரை அதிகம் இழந்திருக்கிறேன்.
மிகவும் சிறப்பான தீர்வு...
வருடங்கள் நகர நகரப் பகல் வேளைகளில்கூட சுவாசிப்பதில் சிரமங்களை எதிர்நோக்க ஆரம்பித்தேன். இது எனக்கு அசாதாரணமான விடயம். இந்த சுவாசச் சிக்கல் எனது படுக்கை நிலையிலிருந்து சிறிய மாற்றம் செய்தாலும் உடன் ஏற்படத் தொடங்கியதுடன் நிலைமை மேலும் மோசமடையத் தொடங்கியது. எனவே இந்த சுவாசச் சிக்கல் ஏற்படும் போதெல்லாம் எனக்கு மிகவும் சிரமமாக இருக்கும். எனது தந்தை இந்தப் பிரச்சினைக்குத் தீர்வொன்றைக் காண மிகவும் முயற்சித்தார். அதிர்ஷ்டவசமாக அது அமெரிக்காவில் பெற்றோர் மாநாட்டில் பங்குபெற அண்மித்த சமயமாக இருந்தது. அங்கு அவர் ஒரு வைத்தியரிடம் எனது பிரச்சினையைக் கூறவும் அந்த வைத்தியர் லிசினோப்ரில் என்ற மாத்திரையை பரிந்துரைத்தார். நான் அந்த மாத்திரையை உட்கொள்ள ஆரம்பித்ததுடன் நான் மிகவும் ஆறுதலாக உணர ஆரம்பித்ததுடன் எனது சுவாசச் சிக்கல் மெதுவாக ஆனால் உறுதியாக, இலகுவாக மாறியது. மிகவும் நிம்மதியடைந்த நான் அந்த மாத்திரையின் வினைத்திறன் கண்டு மிகவும் ஆச்சரியமடைந்தேன். நாளொன்றுக்கு இரண்டு மாத்திரைகள் உட்கொள்கிறேன். மீண்டும் எனது வாழ்வு சாதாரண நிலைக்குத் திரும்பியது.
எனது வாழ்வின் மிகச் சிறந்த பரிசு...
காலம் செல்லச் செல்ல எனது செயற்கை சுவாசக் கருவி மிகுந்த சத்தத்தை ஏற்படுத்தியதுடன் ஏற்கனவே அந்த தொழில்நுட்பவியலாளர் எச்சரித்ததைப் போல் எந்த நேரத்திலும் இயங்குவதை நிறுத்தலாம் என்ற நிலையில் புதிய சுவாசக் கருவியின் தேவை அதீதமாக உணரப்பட்டது. எனது வாழ்வு அந்த சுவாசக் கருவியில் தொங்கிக் கொண்டிருக்கும் நிலையில் பழுதடைந்து வரும் இந்த சுவாசக் கருவியில் தங்கியிருப்பது அபாயம்மிக்க ஒன்றாகக் காணப்பட்டது. எனவே எனது தந்தை அந்த கருவிக்கு மாற்றீடு ஒன்றைத் தேட ஆரம்பித்தார். புதிய சுவாசக் கருவி ஒன்றை கொள்வனவு செய்வதற்கு நிதி வளமற்ற நிலையில் பாவித்த கருவி ஒன்றை ஐரோப்பா மற்றும் அமெரிக்காவில் உள்ள தனது நண்பர்களின் ஊடாகப் பெற முயற்சித்தார். எனது தந்தையின் நண்பர்கள் தங்களால் முடியுமான அளவு முயற்சித்தபோதும் அவர்களால் பொருத்தமான செயற்கை சுவாசக் கருவியொன்றைப் பெற முடியவில்லை.
இதனிடையே எனது இளைய சகோதரன் எனக்கு மாற்று செயற்கை சுவாசக் கருவி ஒன்றைப் பெறுவது தொடர்பில் கவலைமிக்கவராகக் காணப்பட்டார். கொழும்பில் கல்லூரியில் கட்டடக் கணியவியல் கற்கையை மேற்கொள்ளும் அவருக்கு அங்கு இணையப் பாவனை வசதி காணப்பட்டது. அந்த நேரத்தில் எங்களது வீட்டில் இணைய வசதி இருக்கவில்லை. எனவே இணையத்தில் உலாவும்போது எனது சுவாசக் கருவி தயாரிப்பு நிறுவனத்தின் இணையத்தளத்தை அவரால் கண்டறிய முடிந்தது. அதனைத் தொடர்ந்து அந்தக் கருவி தயாரிப்பு நிறுவனமான BREAS அமைப்புக்கு கடிதம் ஒன்றை எழுதும்படி என்னை தொடர்ந்து கேட்டுக் கொண்டிருந்தார். ஒரு காகிதத்தில் நான் அனுபவிக்கும் துயரம் பற்றி விளக்கமாக எழுதிக் கொடுத்தேன். அடுத்த நாள் எனது இளைய சகோதரர் அந்தக் கடிதத்தை தட்டச்சு செய்து கல்லூரிக் கணினி ஊடாக மின்னஞ்சல் செய்தார். அவர்களிடம் எந்தப் பதிலும் கிடைக்கவில்லை. எனினும் தவறுதலான முகவரிக்கு அனுப்பப்பட்ட மின்னஞ்சல் தொடர்பில் அங்கு சந்தைப்படுத்தல் அதிகாரியாகப் பணியாற்றும் மேரி என்ற பெண் தொலைபேசி அழைப்பொன்றை எமக்கு மேற்கொண்டார். அதன்பிறகு அவர் தனது தவறு தொடர்பில் எம்மிடம் மன்னிப்புக் கோரி மின்னஞ்சல் ஒன்றை அனுப்பினார். அதற்கு நாம் அது பரவாயில்லை எனப் பதிலளித்ததுடன் எமது மின்னஞ்சல் தொடர்பிலும் நினைவூட்டினோம். மாதங்கள் கடந்தன அவர்களிடமிருந்து எந்தப் பதிலும் கிடைக்கவில்லை. நானும் எனது இளைய சகோதரனும் நம்பிக்கையிழக்க ஆரம்பித்திருந்தோம்.
ஒருநாள் தொலைபேசி அழைப்பு ஒன்று வந்தது, தந்தை வெளியில் சென்றிருந்ததால் அதற்கு நான் பதிலளித்தேன். மறுமுனையில் ஒரு நபர் சொல்வதை கேட்ட எனது காதுகள் அந்த விடயத்தை நம்ப மறுத்தன. அந்த தொலைபேசி அழைப்பு சுவீடன் நாட்டின் BREAS நிறுவனத்தின் உள்ளூர் முகவர் அமைப்பில் இருந்து வந்திருந்தது. அந்த நபர் எனக்கு ஒரு புத்தம் புதிய செயற்கை சுவாசக் கருவியை BREAS கம்பனியிடம் இருந்து கிடைக்கப் பெற்றுள்ளதாகவும் அதனை நேரில் வந்து பெற்றுக் கொள்ளுமாறும் கூறினார். அப்போதுதான் சில மாதங்களுக்கு முன்னர் அனுப்பிய மின்னஞ்சல் பற்றிய நினைவு எனக்கு ஏற்பட்டது. இந்த உன்னதமான செய்தியால் தூக்கிவாரிப் போடப்பட்ட நான் நொடியும் தாமதிக்காது எனது தந்தையை தொலைபேசியில் அழைத்து எனது வாழ்வில் கிட்டிய மிகப்பெரிய பரிசு பற்றிக் கூறினேன். அனைத்து வழிகளிலும் முயற்சித்தும் பாவித்த செயற்கை சுவாசக் கருவி ஒன்றைப் பெறுவது தொடர்பில் கிட்டத்தட்ட முழுதாக நம்பிக்கையிழந்த நிலையில் இருந்த என் தந்தை இந்த விடயத்தை செவியுற்றதும் மிகவும் நிம்மதியடைந்தார். அந்த நேரத்தில் கொழும்பிலிருந்த எனது இளைய சகோதரனிடம் தந்தை இந்த மகிழ்வான விடயத்தை தொலைபேசி மூலம் அறிவித்து வரும் வழியில் செயற்கை சுவாசக் கருவியை எடுத்துக் கொண்டு வருமாறு கூறினார். எனது இளைய சகோதரன் இது தொடர்பில் மிகுந்த மகிழ்ச்சி அடைந்தான். இந்த வழியில் செயற்கை சுவாசக் கருவியை பெறுவதில் நம்பிக்கையற்றிருந்த என்னை அவன்தான் வற்புறுத்தி அந்த மின்னஞ்சலை எழுத வைத்தான்.
இந்த அனைத்து நடவடிக்கைகளுக்கும் பின்புலத்தில் இருந்து செயற்பட்ட செல்வி மேரி நிக்ரேன் அவர்களுக்கு நான் தொலைபேசி அழைப்பை மேற்கொண்டு எனது மிகுந்த நன்றியை அறிவித்த போது அவர் மிகவும் மகிழ்ச்சியடைந்தார். இந்த நிகழ்வுகள் எனக்கு மிகுந்த ஆச்சரியத்தை ஏற்படுத்தின. எனது வாழ்வில் அந்த நாளில் ஏற்பட்ட சம்பவங்களை இன்னும் என்னால் நம்ப முடியவில்லை. எனது வாழ்வில் கிடைத்த மிகப் பெரிய பரிசை வழங்கிய அந்த நபர்களின் தாராள மனம் தொடர்பில் நான் ஆச்சரியமடைந்தேன். புதிய சுவாசக் கருவியை பயன்படுத்த தொடங்கிய எனக்கு மிகுந்த நிம்மதி கிடைத்தது. புதிய உபகரணம் தனது எஜமானனுக்கு பணிபுரியத் தொடங்கி ஒரு வருடமாகின்றது. தற்பொழுது எந்த பிரச்சினையுமில்லை; கவலையுமில்லை.
இன்னொரு கிளர்ச்சி...
எனது புதிய சுவாசக் கருவியைப் பெற்றுக் கொண்டவுடன் எமது வீட்டுக்கு இணைய வசதி கிடைத்தது மற்றொமொரு சந்தோசமாக இருந்தது. நீண்ட நாட்களாக இணையப் பாவனையை மேற்கொள்ள வேண்டுமென்ற எனது ஆவலை தந்தையால் பூர்த்தி செய்ய இயலவில்லை. நான் கணினியை முழு நேரமும் பயன்படுத்த ஆரம்பித்தேன். தற்பொழுது இணைய உலாவலில் நீண்ட நேரம் செலவிடுவதோடு எனது நேரம் இணையத்துடன் பறந்து செல்கின்றது. இணைய உரையாடல் மூலம் சிறந்த நண்பர்கள் சிலரைப் பெற்றுக் கொண்டேன். உலகின் பிந்திய செய்திகளை என்னால் அறிய முடிவதுடன் நிறைய விடயங்களை மேற்கொள்ள முடிகின்றது. நான் எவற்றை தேட நினைக்கிறேனோ அவற்றை எல்லாம் என்னால் பெற முடிகின்றது. எனவே இதன் மூலம் கிளர்வுற்றுள்ள நான் இணையம் எனது வாழ்வில் மிகுந்த மகிழ்ச்சியைக் கொண்டுவர முடியும் என உணர்வதுடன் அது எனது இயலாமை மற்றும் சோகங்களை ஓரளவுக்கு மறக்க உதவுகின்றது.
'டுசென்னே' வியாதி எனக்கு எவற்றை வழங்கியுள்ளது...-?
எமது வாழ்வில் உறுதியான மனம் மற்றும் தைரியம் என்பவற்றைக் கட்டியெழுப்ப முடியுமானால் வாழ்வில் நாம் முகம்கொடுக்கும் எவ்வகை கஷ்டங்களையும் சோகங்களையும் எம்மால் வெற்றிகொள்ள முடியும் என்பதை நான் எனது வாழ்விலிருந்து கற்றுக் கொண்டேன். அதே நேரத்தில் உங்களிடம் உறுதியான மத நம்பிக்கை காணப்பட வேண்டும். அத்துடன் உங்களது வாழ்வின் மிகவும் இக்கட்டான நிலைகளில் நீங்கள் நம்பிக்கையிழக்கக் கூடாது.
'டுசென்னே' எனக்குப் பொறுமை மற்றும் சகிப்புத்தன்மையைக் கற்றுக் கொடுத்தது என நான் உண்மையாக நினைக்கிறேன். டுசென்னே உலகளாவிய ரீதியில் பெற்றோரை இணைத்துள்ளது. டுசென்னே எமக்கு உலகின் சிறந்த மனிதர்களை அடையாளம் காண உதவியுள்ளது. டுசென்னே இந்த உலகில் இன்னும் உன்னதமான தாராள மனம் கொண்ட ஆண்களும் பெண்களும் உள்ளனர் என நாம் அறிய வழி சமைத்துள்ளது. டுசென்னே விசேடமாக எனது உண்மையான நண்பர்களை எனக்கு அடையாளம் காண உதவியுள்ளது.
நன்றி!
-VIdivelli
இவ் உலகம் தான் தனது வாழக்கை என நினைப்பவர்களும், நான் எனும் மமதை கொண்டவர்களும், இனவாத பித்துப் பிடித்தவர்களும் இது போன்ற வாழ்க்கைப் போராட்டப் பாடங்களைப் படிப்பார்களா?
ReplyDelete