முஸ்லிம்கள் மீது, தமிழர்களின் கலாச்சார அத்துமீறல்

இலங்கையில் பெரும்பான்மை இனம் சிறுபான்மைத் தமிழர்கள் மீது இனவாதத்தைக் கட்டவிழ்த்து விட்டதன் அடியாக இலங்கைத் தமிழர்கள் ஒடுக்கப்பட்டார்கள். தமிழ் மொழி கொச்சைப்படுத்தப்பட்டது. பொட்டு வைப்பதை இழிவாகக் கருதினார்கள். தமிழ்ப் பெண்கள் சேலை அணிந்து வெளியே வருவதற்கே அஞ்சினார்கள். சித்திரைப் புத்தாண்டில் கூட தமிழ்ப் பாரம்பரியங்ளை பகிரங்கமாகச் செய்வதற்கு முடியாத ஒரு சூழல் நாட்டில் உருவாகியிருந்தது. 83 ஜூலைக் கலவரத்தின் போது தமிழரின் மொழி உச்சரிப்பை வைத்தே தமிழரை அடையாளம் கண்டு தாக்கினார்கள்.

தமிழருக்கு எதிராகத் திணிக்கப்பட்ட கலாச்சார ஆதிக்கத்துக்கு எதிராக தமிழர்கள் போராடினார்கள். தமது கலாச்சாரத்தை பின்பற்றும் உரிமை மறுதலிக்கப்படுவதற்கு எதிராக அவர்கள் சர்வதேசமெங்கும் சென்று நியாயம் தேடினார்கள்.

இன்று தமக்கு வாய்ப்புக் கிடைத்திருக்கும் சூழலில் இதே கலாச்சார அத்துமீறலை அவர்களிலும் சிறுபான்மை இனமான முஸ்லிம் சமூகத்தின் மீது சில இனவாதச் சக்திகள் திணிக்கிறார்கள். இலங்கையில் இனத்துவ உணர்வுகள் கூர்மையடைந்திருப்பதையும் அது மனிதப் பண்பாடுகளைப் புதைகுழிக்குத் தள்ளிவருவதையும் தான் இந்தச் சம்பவங்கள் காட்டுகின்றன.

திருகோணமலை சண்முகா இந்து மகளிர் கல்லூரியில் கற்பித்தல் பணிகளில் ஈடுபட்டிருந்த முஸ்லிம் ஆசிரியர்களது ஆடைக்கு எதிராக தமிழ் ஆசிரியர்கள் மேற்கொண்ட ஆர்ப்பாட்டங்கள் தற்பொழுது இனமுறுகல்களைத் தோற்றுவித்திருக்கின்றன. தமிழ்க் கலாச்சார உடையை முஸ்லிம் ஆசிரியைகள் மீது திணிப்பதற்கு பாடசாலை நிர்வாகம் எடுத்த முயற்சியினால் அது இனங்களுக்கு இடையிலான முரண்பாடாக வளர்ச்சி பெற்றிருக்கிறது. இதனைப் பயன்படுத்திக் குளிர்காய நினைக்கும் சக்திகளை இரு சமூகங்களும் இணைந்து வெளிக் கொணர்வதற்கு முயற்சிக்க வேண்டும்.

இந்த விவகாரத்தில் தமிழ்த் தேசியக் கூட்டமைப்பின் தலைவர் இரா.சம்பந்தன் வெளியிட்டுள்ள கருத்துக்கள் தமிழ் முஸ்லிம் உறவினை கேள்விக்குள்ளாக்கியுள்ளாக்கியிருப்பது தான் வேதனைக்குரியது. கிழக்கை வடக்குடன் இணைப்பதற்கு முஸ்லிம்கள் ஆதரவு தர வேண்டும் என்ற அவரது அழைப்புக்குப் பின்னால் பல உள்நோக்கங்கள் இருப்பதை இது வெளிச்சத்துக்குக் கொண்டுவந்திருப்பதாக முஸ்லிம் சமூகம் கருதுகின்றது.

இந்த நிலையில் வடக்கு கிழக்கு இணைப்புக்குத் துணைபோகும் முஸ்லிம் தலைமைகள் தமிழ் இனவாதத்துக்கு முஸ்லிம்களை பலிக்கடாக்களாக்குவதற்காகவே தமது அரசியல் காய்நகர்த்தல்களை மேற்கொண்டு வருகிறார்கள் என்பதும் இந்த விவகாரத்தினூடாக வெளிச்சத்துக்கு வந்திருக்கிறது. சிங்கள இனவாதிகளிடமிருந்து முஸ்லிம் சமூகத்துக்குப் பாதுகாப்பு வழங்க மறந்தது போல தற்பொழுது தமிழ் இனவாதத்துக்குத் தீனியாக முஸ்லிம்களை தாரைவார்க்கும் இந்தத் தலைமைகளிடம் இருந்து முஸ்லிம் சமூகம் பாதுகாக்கப்பட வேண்டும்.

தனது இனத்தையோ, நிறத்தையோ, மதத்தையோ, மொழியையோ முற்படுத்தி நாட்டில் மற்றுமொரு இரத்தக்களரியை ஏற்படுத்துவதற்கு முயற்சிக்கின்ற சகல நடவடிக்கைகளையும் முறியடிப்பதற்கு நாட்டு மக்கள் அணிதிரள வேண்டும். சண்முகா மகளிர் கல்லூரி விவகாரம் வெறுமனே கலாச்சாரத் திணிப்பு மட்டுமல்ல. முன்வரும் மாகாண சபைத் தேர்தல், முஸ்லிம்கள் இல்லாத வட கிழக்கு மாகாணம், தேசிய அரசாங்கத்தின் எதிர்காலம், பூகோள அரசியல் சக்திகள் என பலவிடயங்களில் இது தொடர்புபட்டிருக்கின்றது என்ற வகையில் இந்த விவகாரத்தை இனங்களுக்கு இடையிலான முரண்பாடாக மாற்றாமல் கையாள்வது சமூகத்தின் பொறுப்பாகும்.

சக மனிதனை அனுசரித்து வாழ்வதற்குத் தயாரில்லாத எந்தக் கலாச்சாரமும் மனித குலத்தின் கலாச்சாரமாக அமைய முடியாது. அடுத்தவரது கலாச்சாரத்தையும் மதித்து நடப்பது தான் பண்பாடுள்ள சமூகங்களுக்குள்ள அழகாகும்.

மீள்பார்வை