கோத்தபாயவுடன் எவ்வித, ஒப்பந்தமும் இல்லை - ஜம்மியத்துல் உலமா அடியோடு மறுப்பு

-AA. Mohamed Anzir-

அகில இலங்கை ஜம்மியத்துல் உலமாவுக்கும், பாதுகாப்பு அமைச்சின் முன்னாள் செயலாளர் கோத்தபய ராஜபக்ஸவுக்கும் இடையே நடந்த சந்திப்பு தொடர்பில் தமிழ் இணையமொன்றில் முஸ்லிம் ஒருவரின் பெயரில் எழுதப்பட்டுள்ள கட்டுரைக்கு ஜம்மியத்துல் உலமா தனது கடும் கண்டனத்தை வெளிப்படுத்தியுள்ளது.

இதுதொடர்பில் ஜம்மியத்துல் உலமாவின் செயலாளர் முபாரக் மௌலவி கூறுகையில்,

பல தடவைகள் ஜம்மியத்துல் உலமா பிரதிநிதிகளை வந்து சந்திப்பதற்கு கோத்தபாய ராஜபக்ஸ முயன்றார். அதற்கான சந்தர்ப்பம் அண்மையிலேயே எமக்கும், அவருக்கும் வாய்த்தது.

குறித்த சந்திப்பில் பேசப்பட்ட விடயங்கள் யாவும் வெளிப்படையானவை. மறைப்பதற்கு எதுவுமில்லை. அல்குர்ஆன் மத்ரஸாக்கள் தொடர்பில் அவருக்கிருந்த சில சந்தேகங்கள் இதன்போது நீக்கப்பட்டன என்பதில் ஜம்மியத்துல் உலமா திருப்திபடுகிறது.

மேலும் சீனாவில் கோத்தபாய கற்கும் பாடநெறி, அவரது அரசியல் வருகை, பாகிஸ்தான் பற்றிய அவரது அனுபவமும், நல்லெண்ணமும், இஸ்ரேலுக்கு அவர் மேற்கொண்ட 2 தடவை அரச பயணங்கள், அங்கு கற்றுக்கொண்ட பாடங்களை புலிகளுக்கு எதிராக பயன்படுத்தியமை உள்ளிட்ட விடயங்கள் பற்றியும் இதன்போது கலந்துரையாடப்பட்டன.

இதைவிடுத்து வேறு எதுவும் எமக்கிடையிலான கலந்துரையாடலின் போது நடைபெறவில்லை என்பதை மிகுந்த பொறுப்புடன் கூறிக்கொள்ள விரும்புகிறேன்.

ஜம்மியத்துல் உலமா கோத்தாபாயவுடன் எந்தவித ஒப்பந்தமும் செய்யவில்லை. நாட்டின் ஆட்சியாளர்களோடு சிறந்த முறையில் செயற்பட்டுவரும் ஜம்மியத்துல் உலமா அவர்களுக்கு சொல்லவேண்டியதை எந்தவித தயக்கமும் இன்றி சொல்லத் தவறுவதுமில்லை.

எனவே சகோதர ஊடகங்களில், முஸ்லிம் பெயர்களில் கட்டுரைகளை எழுதுவோருக்கு ஜம்மியத்துல் உலமா பற்றி, சந்தேகங்கள் இருப்பின் அவர்கள் எம்முடன் தொடர்பு கொண்டிருந்தால் அழகான விளக்கத்தை நாம் அவர்களுக்கு வழங்கியிருப்போம்.

அதை விட்டுவிட்டு கற்பனைக்கு எட்டியதை எல்லாம் வடித்து, சமூகங்களிடையே சந்தேகங்களை ஏற்படுத்தும் கைங்காரியத்தை விட்டுவிடும்படி நாம் வேண்டிக்கொள்கிறோம் எனவும் ஜம்மியத்துல் உலமாவின்  செயலாளர் முபாரக் மௌலவி மேலும் தெரிவித்தார்.