புதுவருடப் பிறப்புக்கு முன், அமைச்சரவை மாற்றம் - அசாத் சாலி

நம்பிக்கையில்லாத் தீர்மானத்தின் பின்னரான சூழ்நிலையில் புதுவருடப் பிறப்புக்கு முன் அமைச்சரவை மாற்றம் இடம்பெறலாமென தெரிவிக்கப்படுகின்றது.

இந்த அமைச்சரவை மாற்றத்தில் இரு முன்னாள் அமைச்சர்களுக்கு மீண்டும் அமைச்சுப் பதவி வழங்கப்படவுள்ளதாக தேசிய ஐக்கிய முன்னணியின் தலைவர் அசாத்சாலி தெரிவித்தார்.

இது தொடர்பில் அசாத்சாலி கருத்துத் தெரிவிக்கையில்; நம்பிக்கையில்லாத் தீர்மானத்தில் ஜனாதிபதியின் ஒரு பிரிவினர் எதிர்த்து பிரதமரை காப்பாற்றியுள்ளனர். இவ்வாறான நிலையில் ஐ.தே.க உறுப்பினர்கள் சிலர் பிரேரணைக்கு ஆதரவு அளித்த அமைச்சர்களை நீக்க வேண்டுமெனக் கோரி நம்பிக்கையில்லாத் தீர்மானத்தைக் கொண்டுவர முயற்சித்தனர்.

இந்நிலையில் பிரதமர் இது கட்சியின் தீர்மானம் இல்லையென்பதால் இதனை கைவிட வேண்டுமென கோரியுள்ளார். இவ்வாறு பாராளுமன்ற உறுப்பினர்கள் நம்பிக்கையில்லாத் தீர்மானத்தைக் கொண்டு வரக் காரணம் தமக்கு பிரதியமைச்சை பெறும் எண்ணமேயாகும்.

இதேவேளை சுதந்திர கட்சி மற்றும் ஐ.தே.க இணைந்து அமைச்சரவை மாற்றம் தொடர்பில் குழுவொன்று அமைத்துள்ளது. இதன் பிரகாரம் அமைச்சரவை மாற்றம் புதுவருடப் பிறப்பிற்கு முன்னர் இடம்பெறும் என நம்பிக்கை வெளியிட்ட அசாத்சாலி இரு முன்னாள் அமைச்சர்களுக்கு மீண்டும் அமைச்சுப் பதவி வழங்கப்படவுள்ளதாகவும் தெரிவித்தார்.