ஆசிரியைக்கு இப்படியும் நடந்தது - ஓருவர் கைது
சிலாபம் பிரதேச பாடசாலை ஒன்றில் பணியாற்றும் ஆசிரியை ஒருவரின் பணம் மீளப் பெறும் அட்டையைத் திருடி பணத்தைப் பெற்றுக் கொண்டதாகக் கூறப்படும் விவசாயத் திணைக்களத்தின் அதிகாரி ஒருவரைக் கைது செய்துள்ளதாக சிலாபம் பொலிஸார் தெரிவித்தனர்.
பள்ளம பிரதேசத்தைச் சேர்ந்த 26 வயதான ஆசிரியையின் வங்கி அட்டையே இவ்வாறு திருடப்பட்டு பணம் மீளப் பெறப்பட்டுள்ளது.
குறித்த ஆசிரியை சிலாபம் பொலிஸ் நிலையத்தில் செய்த முறைப்பாட்டின் பிரகாரம், தனது பாடசாலையில் இல்ல விளையாட்டுப் போட்டிகள் நடைபெற்ற தினம் தான் விளையாட்டுப் போட்டி நடவடிக்கைகளில் ஈடுபட்டிருந்ததாகவும், தனது கைப்பையை பாடசாலையின் விளையாட்டு அறை யில் வைத்திருந்ததாகவும், அந்த பையில் தனது வங்கியின் ஏ.ரீ.எம் அட்டை உள்ளிட்டவை இருந்ததாகவும் தெரிவித்துள்ளார்.
விளையாட்டுப் போட்டிகள் முடிவடைந்து வந்து தனது கைப்பையை எடுத்துப் பார்த்த போது அதனுள்ளிருந்த வங்கி அட்டை காணாமல் போயிருந்ததாகவும் அதனைத் தேடிப் பார்த்த போதும் அது கிடைக்கவில்லை என்றும் அதே நேரம் தனது கைப்பேசிக்கு வங்கிக் கணக்கிலிருந்து பணம் பெறப்பட்டுள்ளதாக வங்கியிலிருந்து அனுப்பப்படும் குறுஞ்செய்தி கிடைத்திருந்ததனை அவதானித்து தனது வங்கி அட்டையை யாரோ திருடிச் சென்று பணம் பெற்றுள்ளதை உறுதி செய்து கொண்டதனையடுத்தே இந்த முறைப்பாட்டை செய்ததாகவும் அவர் தெரிவித்துள்ளார்.
இந்த முறைப்பாட்டையடுத்து குறித்த வங்கிக்குச் சென்ற பொலிஸார், ஆசிரியைக்கு வங்கியிலிருந்து குறுஞ்செய்தி வந்த நேரத்தில் அங்கு பொருத்தப்பட்டிருந்த கண்காணிப்பு கெமராவில் பதிவாகிய காட்சிகளை பார்வையிட்டுள்ளனர்.
அப்போது மூன்று சந்தர்ப்பங்களில் குறித்த பணம் மீளப் பெறும் அட்டையைப் பயன்படுத்தி ஒருவர் ஏ.ரி.எம் இயந்திரத்தில் பணம் பெறும் காட்சி பதிவாகியிருந்துள்ளது. ஆசிரியையின் வங்கிக் கணக்கில் அவரது பெப்ரவரி மாதச் சம்பளப் பணம் காணப்பட்டுள்ளது.
அதனை குறித்த நபர் பெற்றுக் கொண்டுள்ளமையும் குறித்த ஆசிரியை தனது ஏ.ரீ.எம் அட்டையில் பணம் பெறுவதற்கான இரகசிய குறியீட்டு இலக்கத்தையும் குறித்து வைத்திருந்தமை சந்தேக நபருக்கு வசதியாக அமைந்திருந்துள்ளமை தெரிய வந்துள்ளதாக பொலிஸார் தெரிவித்தனர்.
பின்னர் கண்காணிப்புக் கெமராக் காட்சிகளை அடிப்படையாக வைத்து மேற்கொண்ட விசாரணைகளின் பின்னர் முகுனுவட்டவான் பிரதேசத்தைச் சேர்ந்த 42 வயதான நபர் கைது செய்யப்பட்டுள்ளார். இச்சம்பவம் தொடர்பில் சிலாபம் பொலிஸார் மேலதிக விசாரணைகளை மேற்கொண்டு வருகின்றனர்.
Post a Comment