வாக்கு போடவில்லையா..? தண்டம் அறவிட வேண்டும் - மேலதிக ஆணையாளர் MM மொகமட்

சில வெளிநாடுகளில் உள்ளதைப்போன்று வாக்களிக்காதவர்கள் தண்டப்பணம் செலுத்தும் சட்ட ரீதியிலான முறையொன்றை இலங்கையிலும் அறிமுகப்படுத்த வேண்டும் என்று தேர்தல்கள் ஆணைக்குழுவின் மேலதிக ஆணையாளர் எம்.எம்.மொகமட் வாரமஞ்சரிக்குத் தெரிவித்தார்.

மொத்த வாக்காளர்களுள் 60 சதவீதமானவர்களே வாக்களிக்கின்றனர். ஆனால், மொத்த வாக்காளர்களும் வாக்களிப்பார்கள் என்ற அடிப்படையில் தேர்தல்கள் ஆணைக்குழு செலவு செய்கின்றது. இதனால், வீண் செலவு ஏற்படுகின்றது. எனவே, அவ்வாறு வாக்களிக்காதவர்களிடம் இந்தப் பணத்தை அறவிடுவதற்கான சட்ட ஏற்பாடு ஒன்று அவசியம் என்று மொகமட் தெரிவித்தார். அவுஸ்திரேலியா உள்ளிட்ட சில நாடுகளில் இவ்வாறான சட்டங்கள் இருக்கின்றன. அதுபோன்று இலங்கையில் வாக்காளர்களுக்குத் தண்டனை வழங்கும் சட்டங்கள் கொண்டுவரப்பட வேண்டும் என்று அவர் கூறினார்.

2017 ஆம் ஆண்டு வாக்காளர் இடாப்பே தற்போது செல்லுபடியான, வலுவிலுள்ள வாக்காளர் இடாப்பாகும்.

அதன்படி, ஒரு கோடியே 57இலட்சத்து 60ஆயிரத்து 767 வாக்காளர்கள் பதிவு செய்யப்பட்டுள்ளார்கள். எனவே, இந்தத் தேர்தலில் அனைத்து வாக்காளர்களும் வாக்களிக்க வேண்டும் என்று அவர் கேட்டுக்ெகாண்டார்.

பெரும்பாலான நாடுகளில் ஒரு தொகையினர் 18 வருடத்திற்கு குறைந்தவர்கள். இலங்கையை எடுத்துக் கொண்டால் இலங்கையின் சனத்தொகை 2 கோடியே 10 லட்சம். இதில் ஒரு கோடியே 50 லட்சம் பேர் வாக்காளராக பதிவுசெய்யப்பட்டுள்ளார்கள். எனவே 75 சதவீதத்தினர் வாக்காளர்களாக பதிவு செய்யப்பட்டுள்ளார்கள். மொத்த சனத்தொகையில் சாதாரணமாக 66 வீதத்தினரே வாக்காளராக இருப்பார்கள். இவ்வீதத்தினையும் தாண்டிய நிலையில் இருக்கின்றதென்றால் இலங்கையில் தகைமை பெற்றிருக்கின்ற வாக்காளர்களில் பெரும்பாலானவர்கள் பதிவு செய்யப்பட்டுள்ளார்கள் என்று அர்த்தம். தேர்தலின் போது வாக்களிக்காமல் இருப்பவர்களும் இலங்கையில் உள்ளார்கள்.

இது இலங்கையில் மாத்திரமல்ல எல்லா உலக நாடுகளிலும் காணக் கூடியதொரு நிலைமை. இலங்கையில் ஜனாதிபதித் தேர்தலிலும் பாராளுமன்றத் தேர்தலிலும் ஏறத்தாழ 75 சதவீதத்தினர் வாக்களிக்கிறார்கள். ஆனால் மாகாண சபைத் தேர்தலிலும் உள்ளூராட்சி சபைத் தேர்தலிலும் 60 சதவீமானவர்களே வாக்களிக்கின்றனர். வாக்குரிமையை வழங்குவது இலங்கையில் அடிப்படை மனித உரிமையாக கருதப்பட்டாலும் வாக்களிப்பது அவரவர் விருப்பத்தின் அடிப்படையில் செய்யப்பட வேண்டும். இலங்கையில் வாக்காளராக பதிவுசெய்யப்பட்ட ஒருவருக்கு வாக்களிக்கவில்லை என்பதற்காக தண்டனை கிடையாது. அவுஸ்திரேலியா போன்ற நாடுகளில் தண்டனை வழங்குவார்கள். உண்மையில் இதில் அர்த்தமுள்ளது.

ஏனெனில், தேர்தல் ஆணைக்குழு தேர்தலொன்றுக்கு தயாராகின்ற போது இந்த ஒரு கோடியே 57 இலட்சம் மக்களும் வாக்களிப்பார்பார்கள் என்ற ஊகத்தின் அடிப்படையில் அதே எண்ணிக்கையிலான வாக்குச் சீட்டுக்கள் மற்றும் அவர்களுக்கு தேவையான அனைத்து வசதிகளையும் செய்துகொடுக்கின்றது. இவ்வெண்ணிக்கையை அடிப்படையாக வைத்தே தேர்தல் அலுவலர்கள், வாக்கெண்ணும் பணியாளர்கள் நியமிக்கப்படுகிறார்கள்.

இவ்வாறு இருக்கின்ற போது இதில் 50 சதவீதத்தினர் ஒரேயடியாக வாக்களிக்காமல் இருந்தால் இதற்குச் செலவழித்த பணம் உண்மையில் வீணாகும். வாக்களிக்காதவர்களுக்கு தண்டப்பணம் செலுத்தும் சட்டம் எதிர்வரும் காலங்களில் இலங்கையிலும் கொண்டு வரப்பட்டால் அது மிகச்சிறப்பாக இருக்கும் என்றும் அவர் கூறினார்.

ஹெட்டி றம்ஸி