இணைந்த வடக்கு கிழக்கு என்பது, எமது அசைக்க முடியாத கோரிக்கை - அனந்தி

வடக்கு, கிழக்கு இணைந்த சுயநிர்ணயத்தைத்தான் கோரிநிற்கின்றோம். அரசு விரும்பினாலும், விரும்பாவிட்டாலும் இணைந்த வடக்கு கிழக்கு என்பது எமது அசைக்க முடியாத கோரிக்கை என வடமாகாண அமைச்சர் அனந்தி சசிதரன் தெரிவித்துள்ளார்.

கிழக்கு மாகாணத்திலுள்ள கல்முனை குருந்தையடி மக்களை நேற்று சந்தித்த போது அவர் இவ்வாறு கூறியுள்ளார். தொடர்ந்தும் கருத்து தெரிவிக்கையில்,

வடக்கு கிழக்கு என்பது எமது தாயக பூமி. வடக்கு மக்களைவிட கிழக்கு மக்கள் கடந்த கொடிய யுத்தத்தில் அதிகம் பாதிக்கப்பட்டிருக்கலாம்.

இருப்பினும் வடக்கு கிழக்கு மக்கள் இருசாராரும் இணைந்தே போராட்டத்தை முன்னெடுத்திருந்தனர். ஒன்றாகவே அனைத்தையும் சந்தித்தோம்.

கல்முனையில் ஒரு இனம் இன்னொரு இனத்தை அடக்கி ஆள முற்பட அனுமதிக்க முடியாது. சாய்ந்தமருது மக்கள் அவர்களது சபைக்காகப் போராடுவதும், அதனைப்பெறுவதும் நியாயமே.

அவர்களுக்கான தனியான சபையை நல்லாட்சி அரசின் ஜனாதிபதி வழங்க முன்வரவேண்டும். ஆனால் மிகுதியைப் பிரிப்பது அல்லது அதனூடாக தமிழர்களை அடக்கி ஆள முற்படுவதை அனுமதிக்க முடியாது.

கல்முனை மாகநரசபைத் தேர்தலில் நீங்களும் போட்டியிட்டு தங்கள் பிரதிநிதித்துவத்தை காப்பாற்றி உரிய அபிவிருத்தியை பெற்றுக்கொள்ள வேண்டும்.

அத்துடன், புதிய தேர்தல் சட்டத்தின்படி பெண்களிற்கான அரசியல் பங்குபற்றலென்பது 25 வீதமாக்கப்பட்டிருப்பது வரவேற்புக்குரியது. அதுவும் அதிகரிக்கப்பட வேண்டும் என குறிப்பிட்டுள்ளார்.