ஜிந்தோட்ட முஸ்லிம்களின், கண்ணீர் வாக்குமூலம் (நேரடி றிப்போர்ட்)
-MBM.Fairooz-
பொலிஸாரும் விசேட அதிரடிப் படையினரும் பார்த்திருக்க, அவர்கள் முன்னிலையிலேயே குண்டர்கள் தமது வீடுகளைத் தாக்கியதாகக் குற்றம்சாட்டும் கிந்தோட்டை பிரதேச முஸ்லிம் மக்கள், பிரதேசத்தில் பதற்றமான சூழ்நிலை நிலவிய நிலையில் பாதுகாப்புப் படையினரை பின்வாங்கச் செய்துவிட்டே இந்தத் தாக்குதல் முஸ்லிம்கள் மீது நடத்தப்பட்டதாகவும் அவ்வாறெனில் இதன் பின்னணியில் செயற்பட்ட மறைகரம் யார் என்பதை கண்டறிந்து அரசாங்கம் நடவடிக்கை எடுக்க வேண்டும் எனவும் கோரிக்கை விடுக்கின்றனர்.
காலி மாவட்டத்தின் கிந்தோட்டை பிரதேசத்தில் கடந்த வெள்ளிக்கிழமை இரவு இடம்பெற்ற வன்முறைச் சம்பவங்களைத் தொடர்ந்து அப் பகுதிக்கு விஜயம் செய்த பிரதமர், அமைச்சர்கள், பொலிஸ் மா அதிபர், பாராளுமன்ற உறுப்பினர்கள் ஆகியோரிடமே பாதிக்கப்பட்ட மக்கள் நேரில் இந்தக் குற்றச்சாட்டுக்களை முன்வைத்தனர்.
இதன்போது இப் பிரதேச மக்கள் மேலும் கருத்து தெரிவிக்கையில், இந்த தாக்குதல்களின் பின்னணியில் அரசியல்வாதிகளும் பாதுகாப்பு உயரதிகாரிகளும் பௌத்த மத குருக்களும் இருப்பதாகவே நாம் நம்புகிறோம். இப் பகுதியில் கடந்த சில நாட்களாக இடம்பெற்ற சம்பவங்கள் காரணமாக நாம் அச்சத்திலேயே காலத்தைக் கடத்தினோம். பிரதேசத்தில் பதற்றம் நிலவியதைத் தொடர்ந்து வியாழக்கிழமை முதல் பொலிசாரும் விசேட அதிரடிப் படையினரும் பாதுகாப்புக் கடமையில் ஈடுபடுத்தப்பட்டிருந்தனர். இதனால் முஸ்லிம்கள் பாதுகாப்பு உறுதிப்படுத்தப்பட்டுள்ளதாக நம்பினர்.
எனினும், வியாழக்கிழமை மாலை பொலிசாரும் விசேட அதிரடிப் படையினரும் திருப்பியழைக்கப்பட்டனர். ஓரிரு சந்திகளில் மாத்திரம் சிலர் கடமையில் இருந்தனர். இந் நிலையிலேயே இரவு 7.30 மணியளவில் சுமார் 200 பேரடங்கிய குண்டர்கள் கிந்தோட்டையின் பல பகுதிகளுக்குள்ளும் புகுந்து முஸ்லிம்களின் வீடுகளை இலக்கு வைத்து தாக்குதல் நடத்தினர்.
நாம் இவர்களைத் தடுத்து நிறுத்தி எமது வீடுகளையும் வர்த்தக நிலையங்களையும் பாதுகாக்குமாறு கெஞ்சிக் கேட்டுக் கொண்ட போதிலும் பொலிசாரோ இராணுவத்தினரோ தமது கடமையைச் செய்ய முன்வராது வேடிக்கை பார்த்தனர். சுமார் இரண்டு மணித்தியாலங்களுக்கும் மேலாக எமது பகுதிகளில், ஒவ்வொரு வீடுகளிலும் இருபது நிமிடங்களுக்கும் மேல் தரித்து நின்று தாக்குதல் நடத்தினர்.
தாக்குதல் நடத்த வந்தவர்களின் பிரதான நோக்கம் எமது பணத்தையும் நகைகளையும் பெறுமதிமிக்க பொருட்களையும் கொள்ளையடிப்பதாகும். நாங்கள் எங்கள் வீடுகளுக்குள் உயிருக்கு அஞ்சி மறைந்திருந்த நிலையில் எங்கள் கண் முன்னாலேயே கொள்ளையடித்துச் சென்றனர். தளபாடங்களை உடைத்து நொறுக்கினர். வாகனங்களைத் தீயிட்டுக் கொளுத்தினர். சிலரது கழுத்தில் கத்திகளை வைத்து கொல்லப் போவதாக அச்சுறுத்தினர்.
இத்தனை சம்பவங்கள் நடந்த போதிலும் விசேட அதிரடிப் படையினரும் பொலிசாரும் வேடிக்கை பார்த்தமையும் பதற்றமான சூழல் நிலவிய போதிலும் திடீரென பாதுகாப்பு படையினர் வாபஸ் பெறப்பட்டமையும் எமக்கு சந்தேகத்தை ஏற்படுத்துகிறது. இது தொடர்பில் விசாரணைகள் நடத்தப்பட்டு குற்றவாளிகள் தண்டிக்கப்பட வேண்டும் என்றும் கிந்தோட்டை பிரதேச முஸ்லிம்கள் மேலும் வேண்டுகோள் விடுத்தமை குறிப்பிடத்தக்கது.
Post a Comment