இலங்கை முஸ்லிம்களுக்கு எதிரான நிலவரம், ஐ.நா. பிரதிநிதியிடம் நேரில் முறையீடு

(ஏ.ஏ.எம். அன்ஸிர்)

இலங்கை முஸ்லிம்கள் சட்டத்தின் மீதும்இ நீதித்துறை மீதும் நம்பிக்கையிழக்கும் செயற்பாடுகள் திட்டமிட்டு மேற்கொள்ளப்படுவதாக உண்மையை ஊக்குவித்தல், நீதி, இழப்பீடு மற்றும் மீள நிகழாமையை உறுதிப்படுத்தல் தொடர்பான ஐ.நாவின் சிறப்பு அறிக்கையாளர் பப்லோ டி கிரெய்பிடம் மூத்த சட்டத்தரணி சிராஸ் நூர்தீன் நேரில் முறைப்பாடு செய்துள்ளார்.

ஐ.நா. சிறப்பு அறிக்கையாளருக்கும், சிராஸ் நூர்தீன் உள்ளடங்கலான சிவில், சட்ட ஆலோசகர்களுக்கும் இடையிலான முக்கிய  சந்திப்பொன்று நேற்று வியாழக்கிழமை, 19 ஆம் திகதி கொழும்பில் நடைபெற்ற போதே இந்த முறைப்பாடு செய்யப்பட்டுள்ளது.

1990 ஆம் ஆண்டு வடக்கிலிருந்து  புலிகளினால் இனச்சுத்திகரிப்பு செய்யப்பட்ட முஸ்லிம்களின் நிலவரம், அவர்களுக்காக நஷ்டஈடு இதுவரை வழங்கப்படாமை, மீள்குடியேற்றத்தில் காண்பிக்கப்படும் பாரபட்சம், தர்காடவுன் முஸ்லிம்களுக்கு இழப்பீடு வழங்குவதில் காண்பிக்கப்படும் அநீதி, முஸ்லிம்களுக்கு எதிரான வன்முறைகளுடன் தொடர்புடையவர்களை கைது செய்வதில் காண்பிக்கப்படும் கால தாமதம், கைது செய்யப்பட்டாலும் அவர்கள் அவசர அவசரமாக பிணையில் வெளியே வருகின்றமை, கொழும்பில் ரோஹின்ய முஸ்லிம்களுக்கு எதிரான அச்சுறுத்தல் என நீண்ட விவகாரங்களை ஐ.நா அறிக்கையாளரின் கவனத்திற்கு கொண்டு வந்துள்ளார் சிராஸ் நூர்தீன்.

மேலும் சட்டத்தின் மீதும், நீதித்துறை மீதும் முஸ்லிம்களை நம்பிக்கையற்றவர்களாக்கி முஸ்லிம் சமூகத்தை வன்முறைக்கு தள்ளிவிடும் சூழ்நிலை உருவாகி வருவதையும் சிராஸ் நூர்தீன் சுட்டிக்காட்டினார்.

இவற்றை கவனமாக செவிமடுத்த ஐ.நா. தூதுவர் பப்லோ டி கிரெய், தற்போதுதான் தாம் இலங்கை முஸ்லிம்கள் பற்றிய நிலவரத்தை முழுமையாக அறிந்துகொள்வதாகவும், அடுத்தவருடம் மார்ச் மாதம் ஜெனீவாவில் நடைபெறும் மனித உரிமைகள் ஆணைக்குழு அமர்வில் இதுபற்றி தாம் ஒரு அறிக்கையை சமர்ப்பித்து, இலங்கை அரசாங்கத்திற்கு அழுத்தம் கொடுக்க முயற்சிப்பதாகவும் இதன்போது வாக்குறுதி வழங்கியுள்ளார்.