July 02, 2017

'கஃபாவை கண் தேடுதே, உனை காணத்தான் மனம் வாடுதே..!


20 வருடங்களுக்கு முன்பு கேரளாவைச் சேர்ந்த வர்கீஸ் என்ற நண்பர் என்னிடம் 'நஜீர் பாய்.... என் வாழ்நாளில் ஒரு முறையாவது கஃபாவை பார்க்க வேண்டும்' என்று சொல்வார். அவரிடம் 'உனக்கு ஏம்பா இந்த வேண்டாத வேலை. முஸ்லிம் அல்லாதவர்கள் அங்கு சென்று மாட்டிக் கொண்டால் பெரும் பிரச்னையாகி விடும்' என்று அறிவுறுத்தினேன்.

ஆறு மாதத்துக்குப் பிறகு திடீரென ஒரு நாள் 'நான் காஃபாவை பார்த்து விட்டேன். எனது கனவு நனவாகியது' என்றார். 'எப்படி சென்றாய்?' என்று கேட்டதற்கு கம்பெனி வண்டி ஜெத்தாவிலிருந்து மெக்கா சென்றது. மூடிய வண்டியாக இருந்ததால் பழக் கூடைகளுக்கு மத்தியில் மறைந்து கொண்டேன். டிரைவர் கச்சிதமாக என்னை மெக்கா அழைத்து சென்று விட்டார். அவரே கஃபாவுக்கு அருகிலும் கூட்டிச் சென்றார். அந்த அனுபவத்தை என்னால் விவரிக்க வார்த்தை இல்லை' என்றார்.

வர்கீஸூக்கு மட்டுமல்ல உலகில் பல நபர்களுக்கும் இந்த ஆவல் இயற்கையிலேயே உள்ளதை பலரிடம் நான் பார்த்திருக்கிறேன். அதற்கு காரணமாக நான் நினைப்பது உலக மக்களின் மூதாதையர்களான ஆதமும் ஹவ்வாவும் முதன் முதலாக இறை இல்லத்தை நிர்மாணித்து இறைவனை தொழுது வந்ததாக இருக்கலாம். அவர்களின் சந்ததிகளான உலக மக்களுக்கு இயற்கையிலேயே கஃபாவின் மீது ஒரு பற்று வந்து விடுகிறது.

இந்த காணொளியில் கூட டி.ராஜேந்தர் கஃபாவின் மீது உள்ள தனது பிரியத்தை விவரிக்கிறார். அங்கு சென்று இறைவனை வழிபட மாட்டோமா என்று ஏங்குகிறார். மெக்காவின் நுழைவாயிலில் நின்று டி.ஆர் எழுதிய பாடல் வரிகளை பார்போம்.

'கஃபாவை கண் தேடுதே....

உனை காணத்தான் மனம் வாடுதே....

நுழைவாசல் ஓரம் நுழையாமல் நானும்.....

தவிக்கின்ற நேரம்... தடுமாறும் பாதம்.....

இருந்தும்தான் பிடிக்குதந்த வேதம்....

இதய சோகத்தை வடித்தேனே நானும்...

அல்லாஹ்.... அல்லாஹ்.... அல்லாஹ்.....'

என்று பாடி தனது தலையை தரையில் வைத்து படைத்த இறைவனிடம் கோரிக்கையை வைக்கிறார்.

இதனை பப்ளிக்காக சொல்வதால் டி.ஆர் ஏதும் இஸ்லாமியர்களிடம் எதிர்பார்க்கிறார் என்று சொல்ல முடியாது. ஏனெனில் இஸ்லாத்துக்கும் சினிமாவுக்கும் ஏழாம் பொருத்தம். மேலும் தற்போது மோடியின் ஆட்சியில் இஸ்லாமியர்களுக்கு பல தொல்லைகளும் பல ஆண்டுகளாக கொடுக்கப்பட்டு வருகிறது. எனவே டி.ஆர் நடிக்கிறாரா.... அல்லது உளமாற கஃபாவையும் படைத்த இறைவனையும் நேசிக்கிறாரா என்பதை இறைவனே அறிவான். பழைய வீடியோவாக இருந்தாலும் முக்கியத்துவம் கருதி மீண்டும் பதிகிறேன். கேட்டுப் பாருங்கள்.


0 கருத்துரைகள்:

Post a Comment