இப்படியும் நடக்கிறது
மாமி மலம் கழித்ததற்காக வெளியே இழுத்து தள்ளிய மருமகள்; மரண நிதிக்காக உயிரிழந்த தாயின் சடலத்தை கோரும் மகன்!
தனது தாய் உயிருடன் இருக்கும்போது அவருக்கு உதவி செய்யாத நபரொருவர், அந்தத் தாய் உயிரிழந்ததன் பின்னர் மரண நிதியமாக தனது நிறுவனத்தினால் வழங்கப்படும் கொடுப்பனவு தொகையை பெற்றுக் கொள்வதற்காக அவரது பூதவுடலை கேட்டு, இதுநாள் வரை தாயை கவனித்து வந்த தனது சகோதரியிடம் சண்டையிட்ட சம்பவமொன்று கல்கமுவ பிரதேசத்தில் இடம்பெற்றுள்ளது.
கல்கமுவ, மஹ எம்போகம பிரதேசத்தை சேர்ந்த மேற்படி தாய், சில காலம் நோய்வாய்ப்பட்டிருந்த நிலையில் உயிரிழந்தார். நோய்வாய்ப்பட்டிருந்த தாய், அவரது இளைய மகன் வீட்டில் வசித்து வந்த நிலையில் நோயாளி மாமியாரை கவனித்துக் கொள்வதற்கு அருவருப்பாக உள்ளதாக கூறி இளைய மகனின் மனைவி கூறியுள்ளார்.
இவ்வாறிருக்கையில் ஒரு நாள் குறித்த தாய் படுக்கையில் மலம் கழித்தமைக்காக அவரது மருமகள் அவரை வீட்டிலிருந்து வெளியே இழுத்து தள்ளியுள்ளார்.
அதனையடுத்து அத் தாய், மஹவ, நெத்திப்பலகம பிரதேசத்திலுள்ள தனது மகளின் வீட்டுக்கு தனியாக சென்றுள்ளார். அதன்போது அவர் கடுமையாக நோய்வாய்ப்பட்டிருந்தமையினால் அவரது மகளால் சிகிச்சையளித்து அரவணைக்கப்பட்டார். எனினும் ஐந்து பிள்ளைகளின் தாயான அவரை ஏனைய பிள்ளைகள் நலம் விசாரித்ததுடன் உதவிகளை செய்திருந்த போதிலும் அவரின் இளைய மகனும், மூத்த மகனும் தாய் தொடர்பில் எவ்வித கரிசனையும் காட்டியிருக்கவில்லை.
இந்நிலையில், அண்மையில் மகளின் வீட்டில் வைத்து தாய் உயிரிழந்திருந்த நிலையில் அவரது மூத்த மகன், இளைய மகன் ஆகியோர் தாயின் சடலத்தை தமது ஊருக்கு கொண்டு செல்ல வேண்டுமெனக் கூறி சகோதரியுடன் சண்டையிட்டுச் சென்றுள்ளனர்.
பின்னர் மறுநாள் காலையில் திரும்பிவந்த மேற்படி சகோதரர்கள் சடலத்தை கோரியிருந்தபோது சகோதரி சடலத்தை தர மறுத்ததால் முறுகல் நிலை ஏற்பட்டிருந்ததுடன் அச்சகோதரிக்காக பரிந்து பேசிவந்த பெண்ணொருவரை உயிரிழந்த பெண்ணின் இளைய மருமகள் காயமடையும் அளவுக்கு தாக்கியுள்ளார். அதன்போது காயமடைந்த பெண் குருணாகல் போதனா வைத்தியசாலையில் அனுமதிக்கப்பட்டுள்ளார்.
Post a Comment