முஸ்லிம்கள் மீது, அடுக்கடுக்காக குற்றச்சாட்டு - ஜனாதிபதியை நேரில் சந்தித்து முன்வைப்பு
-ARA.Fareel-
கோட்டை மகா சங்க சபையினர் உள்ளிட்ட பிக்குகளால் முஸ்லிம்கள் மீதான அடுக்கடுக்கான குற்றச்சாட்டுகள் நேற்றுமுன்தினம் ஜனாதிபதியை நேரில் சந்தித்து முன்வைக்கப்பட்டுள்ளன.
அத்துடன், இலங்கையில் வாழும் அனைத்து இனங்களுக்கிடையிலும் மதங்களுக்கிடையிலும் உருவாகியுள்ள பிரச்சினைகள் மற்றும் முரண்பாடுகளுக்கான காரணங்களை அறிந்து அவற்றை தீர்த்து வைப்பதற்காக புத்திஜீவிகள் அடங்கிய சுயாதீன ஆணைக்குழுவொன்றினை நியமிக்கும் படியும் கோட்டே ஸ்ரீ கல்யாணி சாமஸ்ரீ தர்ம மகா சங்க சபை ஜனாதிபதி மைத்திரிபால சிறிசேனவிடம் கோரிக்கை விடுத்துள்ளது.
ஜனாதிபதி நியமிக்கும் சுயாதீன ஆணைக்குழு மேற்கொள்ளவேண்டிய செயற்பாடுகள் குறித்தும் மகஜர் ஒன்றினை நேற்று முன்தினம் கோட்டே ஸ்ரீ கல்யாணி சாமஸ்ரீ தர்ம மகா சங்க சபை ஜனாதிபதியிடம் கையளித்துள்ளது. மகா சங்க சபையின் மகா நாயக்க தேரர் இத்தேபான தம்மாலங்கார அவர்களின் கையெழுத்துடன் ஜனாதிபதிக்கு குறிப்பிட்ட கடிதம் அனுப்பி வைக்கப்பட்டுள்ளது.
சியம் மகா நிகாய கோட்டே ஸ்ரீ கல்யாணி சாமஸ்ரீ தர்ம மகா சங்க சபை இலங்கையில் தற்போது நிலவிவரும் இன, மத வேறுபாடுகள் குறித்து மிகவும் அவதானம் செலுத்தி வருவதாகவும் கடிதத்தில் தெரிவிக்கப்பட்டுள்ளது.
நியமிக்கப்படும் சுயாதீன ஆணைக்குழு பின்வரும் விடயங்களில் கவனம் செலுத்த வேண்டுமெனவும் கோரியுள்ளது.
பௌத்த தொல்பொருட்கள் அபகரிக்கப்படுகின்றமை மற்றும் அவற்றை அழிக்கின்றமை தொடர்பில் மேற்கொள்ளவேண்டிய நடவடிக்கைகள், பௌத்த பெண்கள் கருத்தரிக்க முடியாதவாறு சிகிச்சையளிக்கப்படுகின்றமை, பௌத்த கிராமங்களில் எவ்வித காரணமுமின்றி முஸ்லிம்கள் குடியேறுகின்றமை, பௌத்த வணக்கஸ்தலங்களை சிதைவுக்குள்ளாக்கின்றமை, முஸ்லிம்கள் இந்நாட்டுக்கு போதைப்பொருட்களை கொண்டு வருகின்றமை, முஸ்லிம் அடிப்படைவாதிகள் இலங்கையில் காலூன்று கின்றமை, முஸ்லிம்களின் சனத்தொகை அதிகரிக்கின்றமை, பௌத்தர்களின் வர்த்தகத்தை சூழ்ச்சியான முறையில் அபகரித்துக் கொள்கின்றமை, வடக்கு, கிழக்கில் வாழும் சில பிரிவினர் பௌத்த வணக்கஸ்தலங்களையும் புத்தர் சிலைகளையும் அழிக்கின்றமை, முஸ்லிம்களால் மேற்கொள்ளப்படும் வனபிரதேச அழிவுகள், கிறிஸ்தவர்களால் மேற்கொள்ளப்படும் மத மாற்றங்கள்.
மேலும் சிங்கள பௌத்தர்களால் முஸ்லிம் மக்களுக்கு இழைக்கப்படுவதாகக் கூறப்படும் நடவடிக்கைகள் குறிப்பாக முஸ்லிம்களின் வர்த்தக நிலையங்கள், பள்ளிவாசல்கள் பௌத்தர்களால் அழிக்கப்படுகின்றன என்று தெரிவிக்கப்படும் முறைப்பாடுகள் என்பன தொடர்பில் குறிப்பிட்ட ஆணைக்குழு ஆராய்ந்து இதற்கான உண்மையான காரணங்களைக் கண்டறிய வேண்டும்.
மேலும் நாட்டின் ஸ்திரத்தன்மையை பலவீனப்படுத்துவதற்காக செயற்படும் பல்வேறு தேசிய மற்றும் சர்வதேச அமைப்புகளை இனங்காணவேண்டும். அனைத்து இனங்களினதும் சனத்தொகை அதிகரிப்பு, சமய பரம்பல், ஒவ்வோர் இனமும் வாழும் பிரதேசங்கள் தொடர்பான விவரங்களும் திரட்டப்படவேண்டும்.
எந்தவொரு பிரச்சினை உருவாகுவதற்கும் காரணம் ஏதும் இருக்க வேண்டும். அந்த பிரச்சினைகளுக்கான காரணங்கள் சரியாக இனங்காணப்பட்டு அவற்றை இல்லாமற் செய்வதற்குத் தேவையான நடவடிக்கை எடுக்கப்பட வேண்டும் என்றும் தெரிவிக்கப்பட்டுள்ளது. இனங்கள், மதங்களுக்கிடையில் புரிந்துணர்வு இல்லாமையும் பிரச்சினைகளுக்குக் காரணமாகும்.
இனங்கள் மற்றும் மதங்களுக்கிடையில் புரிந்துணர்வினை ஏற்படுத்த ஆரம்ப கல்வியிலிருந்து உயர்தர கல்வி வரை ஏற்பாடுகள் செய்யப்பட வேண்டும். ஊடகங்கள் மூலமாகவும் புரிந்துணர்வு ஏற்படுத்தப்பட வேண்டும்.
அனைத்து மக்கள் மத்தியிலும் நிலவிவரும் மத கருத்து முரண்பாடுகள் இல்லாமற் செய்யப்படுவதுடன் அவர்கள் ஒன்றிணைக்கப்படவேண்டும்.
இலங்கையில் கட்டியெழுப்பப்பட்டுள்ள உயரிய கலாசாரத்துக்குள் அனைத்து மக்களும், அனைத்து மதங்களைச் சேர்ந்தவர்களும் நிம்மதியாக வாழ்வதற்கான சூழ்நிலையை உருவாக்க வேண்டியது அரசாங்கத்தின் பொறுப்பாகும் என்று தெரிவிக்கப்பட்டுள்ளது.
Post a Comment