முஸ்லிம்களுக்கான தலைமைத்துவம் ஒன்று தென்கிழக்குப் பல்கலைக்கழகத்தில் இருந்து உருவாக வேண்டும்

(மபாஸ் சனூன்)

இலங்கை முஸ்லிம் சமுகத்துக்கு சிறந்த தலமைத்துவம் ஒன்று வழங்குகின்ற தலமை தென்கிழக்குப் பல்கலைக்கழகத்தில் இருந்து உருவாக வேண்டும் என்று கனவு காணுகின்றேன். இன்றைய முஸ்லிம் தலமைகள் முஸ்லிம் சமுகத்தை நாட்டாற்றில் கைவிட்டுள்ளன. அவர்களுக்கு முக்கியம் பதவிகளும் சலுகைகலும் மட்டுமே என்று தென்கிழக்குப் பல்கலைக்கழக ஸ்தாபக உபவேந்தர் பேராசிரியர் ஏ. ஆர். எம். ஏ காதர் குறிப்பிட்டார்.

தென்கிழக்குப் பல்கலைக்கழகத்தில் இடம் பெற்ற இப்தார் நிகழ்வு ஒன்றில் கலந்து கொண்டு உரையாற்றும் போதே அவர் மேற்கண்டவாறு குறிப்பிட்டார். தொடர்ந்தும் உரையாற்றிய அவர்,

தென்கிழக்குப் பல்கலைக்கழகத்தின் உருவாக்கத்துக்கான காரணம் சிறீலங்கா முஸ்லிம் காங்கிரஸாகும். இலங்கையின் தென்கிழக்குப் பிரதேசத்தில் காணப்படுகின்ற கலை, கலாசார, சமூகம் சார்ந்த பிரச்சினைகளுக்கு திர்வு காணும் நோக்கிலேயே இப்பல்கலைக்கழகம் உருவாக்கப்பட்டது. ஆரம்பத்தில் இதில் மூன்று பீடங்களே காணப்பட்டன. தற்போது இப்பல்கலைக் கழகத்தில் ஐந்து பீடங்கள் இருப்பது இதன் வளர்ச்சியைக் காட்டுகிறது. அது மகிழ்ச்சி அளிக்கிறது. அன்று இதில் இளம் விரிவுரையாளர்களாக இருந்தவர்கள் இன்று முக்கியமான வளவாளர்களாக மாறியுள்ளனர்.

முஸ்லிம் சமுகத்துக்கு சிறந்த தலமைத்துவம் வழங்கிய ஒரு சிரேஷ்ட தலைவர் மர்ஹூம் ஏ. எச். எம். அஷ்ரப் என்றும் அவர் குறிப்பிட்டார்.