பாவம் அவர்கள் பச்சைக் குழந்தைகள், விட்டுவிடுங்கள் ஞானசாரரே

ஞானசார தேரரே!

நான் உங்களைக் கேட்கிறேன்.

ஏன் எங்கள் தலைவர்களை

ஏசி நீங்கள் தூஷிக்கிறீர்கள்?

------------------------

அப்பாவிகள் அவர்கள் 

யாதும் அறியாத குழந்தைகள்

பாவம் அவர்கள் மீது

பழிகள் சுமத்தி விடாதீர்கள்…!

------------------------

பாசமிகு எங்கள் தலைவர்களை

நேசிக்க வேண்டிய நீங்களே

தூஷிப்பது என்ன நியாயம்? 

------------------------

நீங்கள் அநியாயம் செய்யும் 

போதெல்லாம் அவர்கள்

நியாயம்தானே பேணுகிறார்கள்

நிதர்சனங்களைச் சற்று 

நினைத்துப் பாருங்கள்…!

------------------------

அளுத்கமையில் ஆடினீர்கள்

தம்புள்ளையில் தாண்டவம் புரிந்தீர்கள்

ஆனால்… 

எங்கள் தலைவர்கள் 

உங்களுக்கு எதிராக

எதனையும் செய்யாத போது

ஏன் அவர்களைத் தூஷிக்கிறீர்கள்..?

------------------------

பள்ளிகளை உடைத்தீர்கள் 

பல கடைகளை காலி செய்தீர்கள்

உயிர்களைப் பறித்தீர்கள் ஆனால்

உங்களுக்கு எதிராக 

எங்கள் தலைவர்கள்

எதுவுமே செய்யாத போது

ஏன் அவர்களை தூற்றுகிறீர்கள்..

------------------------

பாவம் அவர்கள் 

பச்சைக் குழந்தைகள்

விட்டு விடுங்கள் தேரரே

------------------------

உங்கள் காட்டுத் தர்பார்கள்

கடைக்கு வரும் போதெல்லாம் 

எங்கள் மோட்டு தலைவர்கள்

ஏதோ காட்டமாய், கனதியாய் 

அறிக்கை விட்டு

காரியம் எல்லாம்

கச்சிதமாக முடிந்தது போல் 

எழுந்து நிற்பார்கள்…!

------------------------ 

இடுப்பு வலிக்கு 

இஞ்சி போட்ட தேநீர் குடித்தால்

கடுப்புக் குறையும் எனக் கூறும்

கை வைத்தியக்கார்கள்தான்

எங்கள் முஸ்லிம் தலைமைகள்

அது எங்கள் தலையெழுத்து!

------------------------

விகாரை கட்டி நீங்கள்

விரும்பிய இடங்களில் 

சிலைகள் வைத்தாலும் 

எங்கள் துரைமார்களால் 

எந்தச் சிக்கலும் இல்லை! 

ஏனெனில் அவர்களும்

வெறும் சிலைகள்தான்! 

------------------------ 

ஒன்று மட்டும் உண்மை..

உங்களின் அடாவடிகளால்

எங்கள் தலைவர்கள் சிலரின்

ஆகாதா தனங்களைச்

சமூகம் உணர 

அரிய சந்தர்ப்பம் கிடைத்துள்ளது.

------------------------

உங்களுக்காக அவர்கள்

அவர்களுக்காக நீங்கள்

ஞானம் புரிகிறதா

ஞானசாரரே!

-கவிஞர் ஏ.எச்.சித்தீக் காரியப்பர்-