'மக்களின் அடிப்படை உரிமைகளை, நசுக்குவதை அரசாங்கம் நிறுத்த வேண்டும்'

"யுத்தம் முடிவடைந்து இத்தனை வருடங்கள் கழிந்து விட்ட நிலையிலும் அரசாங்கம் மக்களின் காணிகளைப் பறித்து அவர்களை வீதியில் அலைய விட்டிருப்பது  பரிதாபமானது. சொந்த இடங்களில் குடியேறி வாழுவதற்கான அடிப்படை உரிமைகளை வழங்காத நிலையில் தேசிய நல்லிணக்கத்தை எவ்வாறு உருவாக்க முடியும்.  வனபாதுகாப்பு பிரதேசமாக அறிவிக்கப்பட்ட எல்லைகளுக்குள் மக்கள் விவசாயம் செய்வதனை தடுத்து விட்டு, படையினரே அங்கு விவசாயம் செய்கின்றனர். வன பாதுகாப்பு பிரதேசத்தில் விவசாயம் செய்வது குற்றம் என்றால் படையினருக்கு அந்த உரிமையை வழங்கியது யார்..? படையினரின் கடமை பயிர்ச்செய்கை செய்வதா அல்லது மக்களை பாதுகாப்பதா..?  எனவே, மக்களின் அடிப்படை உரிமைகளை நசுக்குகின்ற நடவடிக்கைகளை அரசாங்கம் உடனடியாக நிறுத்தி மக்களின் காணிகளை அவர்களிடமே ஒப்படைக்க வேண்டும்" நல்லாட்சிக்கான தேசிய முன்னணி(NFGG)யின் தவிசாளர் பொறியலாளர் அப்துர் ரஹ்மான் தெரிவித்தார்.

மன்னார்- முசலி பிரதேச காணிகள் தொடர்பில் வெளியிடப்பட்டுள்ள சர்ச்சைக்குரிய வர்த்தமானி அறிவித்தல் தொடர்பாக  நல்லாட்சிசக்கான தேசிய முன்னணி விசேட ஊடகவியலாளர் சந்திப்பொன்றினை நேற்று  (06.04.2017) காலை கொழும்பில் நடாத்தியது. சர்ச்சைக்குரிய வர்த்தமானி அறிவித்தல் தொடர்பாக கருத்துத் தெரிவிக்கும் போது பொறியியலாளர் அப்துர் ரஹ்மான் தெரிவித்ததாவது.

    

 முஸ்லிம்-தமிழ் மக்களுக்குச் சொந்தமான காணிகளை அரச படையினர் கையகப்படுத்தி முகாமிட்டிருக்கிறார்கள் முல்லிக்குளம் எனப்படும் தமிழ் மக்களுக்குச் சொந்தமான முழுக்கிராமமுமே கடற்படையினரால் அபகரிக்கப்பட்டிருக்கிறது. இவ்வாறு காணிகளை இழந்த ஏழைத்தமிழ் மக்கள் தமது சொந்த இடங்களை தம்மிடம் மீளவும் கையளிக்குமாறு கோரி கடந்த இரண்டு வாரங்களாக பல கஸ்டங்களுக்கு மத்தியில் போராடி வருகிறார்கள். அதேபோலவே சிலாபத்துறைப் பகுதியில் உள்ள முஸ்லிம்களுக்குச் சொந்தமான காணிகளையும் கடற்படையினர் கையகப்படுத்தி இருக்கிறார்கள். இன்னும் பல இடங்களிலும் இது நடந்திருக்கிறது. 

இதில் ஆச்சர்யமான விடயம் என்னவென்றால் தமது சொந்த இடங்களில் மக்கள் குடியேறுவதற்கான அனுமதியினை மறுத்து விட்டு அக்காணிகளில் படையினர் விவசாயம் செய்து வருகிறார்கள். மக்களுக்குச் சொந்தமான தென்னந்தோப்புகளின் அறுவடைகளையும் அவர்கள் பயன்படுத்தி வருகிறார்கள். வனபாதுகாப்பு பிரதேசமாக அறிவிக்கப்பட்ட எல்லைகளுக்குள் மக்கள் விவசாயம் செய்வதனை தடுத்து விட்டு, படையினரே அங்கு விவசாயம் செய்கின்றனர். இதனை நாம் எமது கள விஜயத்தின் போது நேரடியாகக் கண்டோம்.

   

முசலி பிரதேச மக்களின் காணிகளை அபகரிக்கும் வகையில் உருவாக்கப்பட்டுள்ள வர்த்தமானி அறிவித்தலை உடனடியாக அரசாங்கம் இரத்து செய்ய வேண்டும். மக்களின் நியாயங்களையும் உரிமைகளையும் கேட்டறிந்து பிரச்சினைளை நீதியாக தீர்க்கக் கூடிய வகையில் அதிகாரமுள்ள ஒரு ஆணைக்குழுவினை நிறுவி இபிபிரச்சினைக்க சுமூகமான ஒரு முடிவினை காண ஜனாதிபதி உடனடியாக முன்வர வேண்டும்."