பராக்கிரம மன்னரின் காலம்முதல் முஸ்லிம்கள், முசலியில் வசிக்கின்றனர் - கலாநிதி விக்ரமபாகு

- எம்.ஆர்.எம்.வஸீம் -

முசலி பிரதேசத்தில் 6 ஆம் பராக்கிரம மன்னர் காலத்தில் இருந்து முஸ்லிம்கள் அங்கு குடியிருந்து வருகின்றனர். எனவே வில்பத்து வன பாதுகாப்பு வலயம் தொடர்பாக ஊடகங்கள் ஒருதலைப்பட்சமாக நடக்கக்கூடாது. இரு தரப்பினரதும் விளக்கங்களையும் பொது மக்களுக்கு வெளிப்படுத்தவேண்டும் என நவ சமசமாஜ கட்சியின் தலைவர் விக்ரமபாகு கருணாரத்ன தெரிவித்தார்.

அதிகாரத்தை பகிர்ந்து ஐக்கியப்படுத்தும் இயக்கம் நேற்று -05 கொழும்பில் நடத்திய செய்தியாளர் சந்திப்பில் கலந்துகொண்டு கருத்துதெரிவிக்கையிலேயே அவர் இவ்வாறு தெரிவித்தார். அவர் அங்கு தொடர்ந்து கூறுகையில்,

முசலி பிரதேசத்தில் 6 ஆம் பராக்கிரம மன்னர் காலத்தில் இருந்து முஸ்லிம்கள் அங்கு குடியிருந்து வருகின்றனர்.அந்த காலப்பகுதியில் போர்த்து கீசர்கள் முஸ்லிகளின் பள்ளிவாசல்களை உடைத்து அந்த மக்களை விரட்டினர். அப்போது முஸ்லிம்கள் மன்னரின் அனுமதியைப்பெற்று வில்பத்து மற்றும் கண்டி போன்ற பிரதேசங்களில் குடியேறினர்.அதனால் அந்த மக்களின் இருப்பிடத்தை பாதுகாப்பது அரசாங்கத்தின் கடமை.

அத்தடன் வில்பத்து பிரதேசத்தை சுற்றியுள்ள பிரதேசங்களில் மக்கள் வாழ்ந்து வந்துள்ளனர். யுத்த காலப்பகுதியில் விடுதலை புலிகளால் அங்கிருந்த மக்கள் வெளியேற்றப்பட்டனர். யுத்தம் முடிவடைந்ததன் பின்னர் அந்த மக்களை மீள குடியேற்றுவதற்கு கடந்த அரசாங்கத்தில் இருந்த அதிகாரிகள் நடவடிக்கை எடுத்து வந்ததன் அடிப்படையிலேயே மக்கள் குடியேற்றப்பட்டுள்ளனர்.

ஆனால் வில்பத்து வன பாதுகாப்பு வலயம் தொடர்பாக ஜனாதிபதியின் வர்த்தமானி அறிவித்தல் மூலம் அங்கு மீள்குடியேற்றப்பட்ட மக்கள் தற்போது மனவேதனை அடைந்துள்ளனர்.

மேலும் வில்பத்து வன பிரதேசம் தொடர்பாக இன்று மிகவும் அக்கறையுடன் சிலர் கருத்து தெரிவித்து வருகின்றனர். வன பிரதேசங்கள் பாதுகாக்கப்படவேண்டும்.

அதில் எந்தப்பிரச்சினையும் இல்லை. ஆனால் ஏற்கனவே குடியிருந்த மக்கள் பாதிக்கப்பட்டு அங்கிருந்து வெளியேறிய நிலையில் அந்த பிதேசம் தற்போது வனாந்திரமாக இருந்ததனால் அதனையும் வன பாதுகாப்பு வலயத்துக்குள் சேர்க்க முடியாது.

அத்துடன் இந்த விடயம் தொடர்பாக சில தனியார் ஊடகங்கள் வில்பத்து தொடர்பாக கருத்து பரிமாறுவதற்காக ஒரு பக்கத்தைச்சேர்ந்தவர்களை மாத்திரம் அழைத்து வந்து உரையாடுகின்றனர்.

இது முறையாகாது.மாறாக இரு தரப்பினரையும் அழைத்து தங்கள் விளங்கங்களை மக்களுக்கு தெரிவிக்க சந்தர்ப்பம் வழங்கப்பட வேண்டும் அப்போதுதான் பொது மக்கள் அதன் உண்மைத்தன்மை தொடர்பாக அறிந்துகொள்ள முடியும் என்றார்.