காங்கேசன்துறையில் 32 மியன்மார் முஸ்லிம்கள் மீட்பு - JMC - I களத்தில் இறங்கி உடனடி உதவி

-மொஹமட் ஜவாமில் + பாருக் சிஹான்-

காங்கேசன்துறைக் கடற்பரப்பில் தத்தளித்துக் கொண்டிருந்த 32 மியன்மார் அகதிகள் கடற்படையினரால் இன்று (30) மீட்கப்பட்டு காங்கேசந்துறைப்  பொலிஸாரிடம் ஒப்படைக்கப்பட்டுள்ளனர்.

இவ்வாறு மீட்கப்பட்டவர்களில் சிறுவர்கள் தாய்மார்கள் வயோதிகர்கள் உள்ளடங்குவதாக தெரிவிக்கப்படுகின்றது. மியன்மார்  நாட்டில் தற்போது ஏற்பட்டுள்ள  கலவரங்கள் காரணமான   அங்கிருந்து  வேறு நாடுகளுக்கு கடல் வழியாக  செல்வதற்கு வந்ததாக  அவர்கள் குறிப்பிட்டுள்ளனர்.

இது தொடர்பில் காங்கேசந்துறைப் பொலிஸார் விசாரணைகளை மேற்கொண்டு வருகின்றனர்.

அதேவேளை கடலில் இருந்து மீட்கப்பட்ட மியன்மார் முஸ்லிம்களுக்கு சர்வதேச யாழ்ப்பாண முஸ்லிம் அமைப்பு (jmc-i) சார்பில் அதன் பிரதிநிதி எம்.எம். மொஹமட் ரமீஸ் உலருணவு பொருட்களையும் மற்றும் அத்தியாவசிய உதவிகளை வழங்கியுள்ளார்.

அத்துடன் சம்பவ இடத்திற்கு யாழ்ப்பாணத்தைச் சேர்ந்த மற்றும் சிலரும் விரைந்துள்ளதுடன், மியன்மார் முஸ்லிம் சகோதரர்களை சிறைச்சாலையில் தடுத்துவைக்காது, யாழ்ப்பாணத்திலுள்ள பள்ளிவாசல்களில் தங்கவைக்க நடவடிக்கை மேற்கொள்ளப்பட்டுள்ளதாகவும் அறியவருகிறது.