நிந்தவூரில் உள்ள அனல் மின் நிலையத்துக்கு எதிராக மக்கள் ஆர்ப்பாட்டம்

-மு.இ.உமர் அலி -

நிந்தவூர்  23ஆம் பிரிவு அட்டப்பள்ளம் கிராமத்தில்  உள்ள BIO MASS ENERGY  நிறுவனத்திற்கு சொந்தமான  அனல் மின்சார உற்பத்தி  நிலையத்துக்கு  எதிரான ஆர்ப்பாட்டம்  இன்று  ஜூம்மா தொழுகையினை  தொடர்ந்து நிந்தவூர் பெரிய பள்ளிவாசலில் ஆரம்பித்து  பிரதேச செயலகம் வரை கால்நடையாக தொடர்ந்தது.ஆண்கள்,பெண்கள் சிறுவர்கள் உட்பட ஆயிரக்கணக்கான மக்கள் கலந்துகொண்டனர் .மிகவும் அமைதியாக நடைபெற்ற இப்பேரணியில் மக்கள் தமது பாதிப்புக்களை வெளிக்காட்டும் வசனங்களடங்கிய பதாகைகளை ஏந்தியவண்ணம் சுலோகங்களையும் கோசித்தனர்.

குறித்த நிறுவனத்தினால் பல  சூழல் பிரச்சினைகள்  ஏற்படுவதாகவும்,தமது நாளாந்த வாழ்க்கைக்கு அப்பிரச்சினைகள் அச்சுறுத்தலாக  அமைவதாகவும்,எனவே இந்நிலையத்தை  அகற்றும்படி கோருகிறோம் என   நிந்தவூர் 23ஆம் பிரிவு  கிராம அபிவிருத்தி சங்கத்தலைவர்  AL  இப்ராஹீம் அவர்கள் பிரதேச செயலாளரிடம்  மகஜர்  கையளித்த பின்னர்  ஊடகங்களுக்கு  கருத்து தெரிவித்தார்.

நிந்தவூர் பிரதேச செயலாளர் அவர்களுடனான நேர்காணலின்போது “இந்த பிரச்சினை தொடர்பாக  அம்பாறை மாவட்ட  மேலதிக அரசாங்க  அதிபர் தலைமையில் ஒரு கூட்டம் நடைபெற்றது ,இக் கூட்டத்திபோது இதனை ஆராய ஒரு உயர்மட்டக்குழு  ஸ்தாபிக்கப்பட்டுள்ளது,மற்றும்  இரண்டு வாரங்களில்  இது சம்மந்தமான  தொழில்நுட்ப அறிக்கைககள்  கோரப்பட்டுள்ளன அவை கிடைக்கப்பெற்றதும் மேலதிக நடவடிக்கைகள்  எடுக்கப்படும்  என கருத்துக் கூறினார்.

நெல் உமியினால் இயங்கும் இந்த  அனல் மின் நிலையத்தினால் இரண்டு  மெகா வாட்  மின்சாரம் தேசிய மின்சார சுற்றுக்கு வழங்கப்படுகின்றது.அத்துடன் இந்த பிரதேச மக்கள்  குறைந்த வருமானம் உள்ளவர்கள். மரக்கறி உட்பட உணவுப்பயிர்செய்கையே  இங்கு வாழும் மக்களின் பிரதான தொழில் என்பது  குறிப்பிடத்தக்கது.