தென்கிழக்கு மாகாணத்திற்கு ஆதரவானவர்களை எதிரியாகவும், துரோகியாகவும் பார்ப்போம் - கோடீஸ்வரன் Mp

வடக்கு கிழக்கு இணைந்த சமஷ்டி ஆட்சியில் அம்பாறை மாவட்டத்தை புறந்தள்ளி எடுக்கப்படும் எந்ததீர்வுக்கும் அம்பாறைத்தமிழர்கள் உடன்படமாட்டார்கள். அப்படி எதாவது நடந்தால் அதற்கெதிராக போராடவும் தயங்கமாட்டோம் அம்பாறை மாவட்டத் தமிழர்கள் எந்நேரமும் விழிப்பாயிருக்கவேண்டும். இவ்வாறு தமிழ்த்தேசியக்கூட்டமைப்பின் அம்பாறை மாவட்ட பாராளுமன்ற உறுப்பினர் ஏ.கே. கோடீஸ்வரன்  காரைதீவு  விபுலானந்த மகா வித்தியாலய  தொழில்நுட்ப விஞ்ஞான ஆய்வுகூடத்தின் மொழியியல் பிரிவைத் திறந்துவைத்து உரையாற்றுகையில் தெரிவித்தார்.

இத்திறப்புவிழா  கல்லூரி அதிபர் தி. வித்யாராஜன் தலைமையில் இடம்பெற்றது. அவர் அங்கு மேலும் உரையாற்றுகையில்: 

நாட்டில் எடுக்கப்படும் எந்த தீர்வும் அம்பாறைமாவட்ட தமிழர்க்கு எதிராக எடுக்கப்படுமானால் அதற்கெதிராக வீதியில் இறங்கிப் போராடத் தயங்கமாட்டோம். எதிரானவர்களை எதிர்ப்போம்!

அம்பாறைமாவட்ட தமிழர்க்கெதிரான தீர்வுத்திட்டத்தை ஆட்சியாளரோ எந்தகட்சியோ எந்த தலைவர்களோ முன்னெடுத்தாலும் அதனை வன்மையாக எதிர்ப்போம். அம்பாறை மாவட்ட தமிழர்கள் இதுவரை அனுபவித்து வந்த அடக்குமுறைகள் ஒடுக்குமுறைகள் பாரபட்சங்கள் அநீதிகள் துன்பதுயரங்கள் வேதனைகள் இழப்புகள் எண்ணிலடங்காதவை.

அம்பாறைத் தமிழர்க்கான பிரச்சினைகளை அம்பாறை மாவட்டத் தமிழரே அறிவார்.

ஓற்றுமை பற்றி மேடைகளில் வாய் கிழியப் பேசுவார்கள். ஆனால் செயற்பாடுகளில் தன்னிச்சையாக நடந்துகொள்வார்கள். இவர்களை இனியும் நாம் நம்பத்தயாரில்லை. அவர்களை நம்புவர்களையும் நாம் நம்பத்தயாரில்லை என்ற செய்தியை இங்கு பகிரங்கமாகக் கூறிவைக்க விரும்புகின்றேன்.

அம்பாறைத் தமிழ் மக்களை புறக்கணித்து எடுக்கப்படும் தீர்மானத்திற்கெதிராகவும் அணிதிரள்வோம். எந்த அரசியல்கட்சித்  தலைவரானாலும் சரி எந்தக் கொம்பனென்றாலும் சரி அவருக்கெதிராக போர்க்கொடி தூக்குவோம்.

அம்பாறை கரையோர மாவட்டத்தை தமிழ்மக்கள் ஒருபோதும் ஏற்றுக்கொள்ளப்போவதில்லை. அதனை தென் அலகாக உள்ளடக்கப்படுவதனையும் நாம் வன்மையாக எதிர்ப்போம். இதற்காதரவாக எமது எந்த அரசியல்வாதியானாலும் சரி புத்திஜீவியானாலும் சரி எமது எதிர்ப்பைத் தெரிவிப்போம். எதிரியாகப் பார்ப்போம். துரோகியாகப் பார்ப்போம்.

அம்பாறை மாவட்ட தமிழ் மக்கள் மட்டக்களப்பிலுள்ள திருமலையிலுள்ள யாழ்ப்பாணத்திலுள்ள தமிழ் மக்களுடன் இரண்டறக்கலந்து வாழவே விரும்புகின்றனர். இது ஆண்ட பரம்பரை.

வடக்கு கிழக்கில் மூன்றாவது சிறுபான்மையினமாக தமிழர்கள் வாழ்வது அம்பாறை மாவட்டத்திலாகும். அதற்காக அவர்களை யாராவது புறந்தள்ள நினைத்தால் எந்தக்கட்சியானாலும் எந்த தலைவரானாலும் அவர்களை தூக்கிவீசுவோம்.

அம்பாறை மாவட்டத்தில் ஒலு இலட்சத்து 40ஆயிரம் தமிழ் மக்கள் வாழ்ந்து வருகின்றனர். அவர்களை புறந்தள்ளி எந்த தீர்வையும் எந்தக் கட்சியும் முன்னெடுக்க விடமாட்டோம்.

எமது மக்களின் உரிமைகள்  காணிகள் பொருளாதாரங்கள் பாதுகாக்கப்பட வேண்டும். கல்விக்கான சுகாதாரத்திற்கான ஒதுக்கீடுகள் சமத்துவமாகப்பெறப்பட வேண்டும். ஆனால் இவற்றைத் திட்டமிட்டு முடக்க ஒருசாரார் திரை மறைவில் சதிமுயற்சிகளில் ஈடுபட்டுவருவதை நாமறிவோம் என்றார்.