"ஞானசாரரே உனக்காக நாங்கள், அவசரப்படப் போவதில்லை"

-Aqil Ahmad Sharifuddeen-

ஞானசாரரே,

உனக்காக நாங்கள் அவசரப்படப் போவதில்லை.

உனக்கு

வாழ்வையும் மரணத்தையும் படைத்து

இரண்டுக்கும் இடையே

வாழ்வாதாரத்தையும் அமைத்த

உனது எஜமான்

உன்னை அவதானித்துக்கொண்டிருக்கின்றான்

என்பதனை அறிந்துகொள்.

அவன் உன்னை

உன் வழியில் விட்டுவைத்திருப்பதெல்லாம்

உன்னை கிடுக்கிப்பிடிப்பதற்குத்தான்.

கேவலம் உன்னைச் சூழ்ந்து கொள்வதற்குள்

நீ திரும்பிவிடு

அல்லது

உன் முடிவுக்காக நீ காத்திரு.

'நான்தான் உங்களது மேலான ரட்சகன்'

என்று சொன்னவன்

உப்புக் கருவாடானதையே பார்த்தவர் நாங்கள்

நீ எம்மாத்திரம்!

மண்ணில் தாழ்ந்த தலைகளும்

விண்ணில் உயர்ந்த கரங்களும்

பின்னிரவில் சிந்தும் கண்களும்

இருக்கும் எங்களுக்கு

எஜமானிடம் முறையிட

எழுத்துக்கள் தேவையில்லை.

இந்த மொழி புரியாது உனக்கு.

கலவரத் தீயில்

குளிர் காய நீ செய்யும் சூழ்ச்சிக்காய்

நாங்கள் அவசரப்படப் போவதில்லை.

நீ காத்திரு.

நாங்களும் காத்திருக்கிறோம்.