"வெளியூர் அழகனைவிட, உள்ளூர் முடவன் சிறந்தவன்"

-S. Sabraz Nawaz-

தென்கிழக்குப் பல்கலைக்கழகத்தின் ஐந்தாவது பீடமாக உருவாக்கப்பட்ட பொறியியல் பீடத்தைப்பற்றி சில இணையச் செய்தித் தளங்களில் பொறுப்பில்லாத முறையில் அடிப்படையும் ஆதாரமில்லாத செய்திகள் வெளிவந்து கொண்டிருக்கின்றனவென்பது வருத்தத்திற்குரியதும் கண்டிக்கத் தக்கதுமான ஒரு சமகால உண்மையாகும். இவ்வாறான செய்திகளைப் பிரசுரிக்க முன்னர் உரிய அதிகாரிகளைத் தொடர்பு கொண்டு இவ்வாறான செய்திகளின் உண்மை நிலவரத்தையும் இற்றைத் தன்மையினையும் அறிந்து கொள்வது ஊடக தர்மமாகும்.

இந்த பொறியியல் பீடமானது வெறுமனே அரசியல்வாதிகளின் பரிந்துரைகள் மூலமோ அல்லது வேறு எந்தப் பின்கதவு வேலைகளாலோ பெற்றுக் கொள்ளப்பட்டதொன்றல்ல. பொறியியல் பீடமொன்றினைக் கொண்டுவர வேண்டும் என்று பல்கலைக் கழத்தின் வேந்தர் பேராசிரியர் இஸ்ஹாக் அவர்களிடமும் முன்னாள் உபவேந்தர் கலாநிதி எஸ்.எம்.எம். இஸ்மாயில் அவர்களிடமு்ம் அடிமனதிலிருந்த தீராத ஆசையும் பொறியியல் பீடத்திற்கு அதிகமான மாணவர்களை உள்ளவாங்க வேண்டும் என்ற அரசாங்கத்தின் நிலைப்பாடும் காலத்தைக் கனியவைத்துக் கொடுத்ததன் மூலமாகவே இப்பீடத்தை இங்கு உருவாக்க வேண்டும் என்ற பேச்சையே ஆரம்பிப்பதற்கு வழிகோலியது.

இப்பீடத்தைப் பெற்றுக்கொள்வதற்கான முன்மொழிவுகளும் பிரேரனைகளும் உயர்கல்வி அமைச்சினாலும் பல்கலைக் கழக மானியங்கள் ஆணைக் குழுவினாலும் நிபுணர்களின் மூலமாக ஆழமான, நேர்த்தியான முறையான மதிப்பீடுகளும் பரிசீலனைகளும் செய்யப்பட்டதன் பின்னர்தான் தென்கிழக்குப் பல்கலைக் கழகத்திற்கு வழங்கப்பட்டது. 

இதற்கான ஏராளமானவர்கள் இரவுபகல் பாராது அயராது உழைத்தனர் என்பதை எவராலும் மறுக்க முடியாது. பொறியியல் பீடம் தென்கிழக்குப் பல்கலைக் கழகத்திற்கு வரக்கூடாதென்று உழைத்தவர்களும் வழங்கப்படுவதையறிந்து இது ஒலுவிலுக்குக் கொண்டு வரப்படாமல் அம்பாறைக்கோ அல்லது வேறு பகுதிக்கோ கொண்டு செல்லப்பட வேண்டும் என இரவுபகல் பாராது துரோகச் செயலில் ஈடுபட்டு சிற்றுள்ளங் கொண்ட அரசியல்வாதிகளும் தனவந்தர்களும் ஏராளமானோர். இறைவனின் நாட்டத்தாலும் இப்பல்கலைக் கழகத்தில் பாக்கியதை கொண்டோரது சுயநலமில்லாத உழைப்பினாலும் ஒலுவில் வளாகத்திற்கே இது கொண்டு வரப்பட்டதிலிருந்து இன்றுவரை அவர்கள் சந்தர்ப்பம் காத்திருந்தனர்.

புதிதாக உருவாக்கப்பட்ட ஒரு பீடத்தினது பௌதீக மற்றும் மனித வளங்களானது பூரணத்துவமானதாக இருப்பதென்பது கற்பனைக்கெட்டாத ஒன்று. தென்கிழக்குப் பல்கலைக்கழகம் உருவாக்கப்பட்டபோது இடமேயில்லாமல் அட்டாளைச்சேனை அரசினர் கல்விக் கல்லூரியில்தான் பல்கலைக்கழகம் இயங்கிவந்தது. அச்சமயத்தில் எத்தனை விரிவுரையாளர்கள் கலாநிதிப்பட்டம் கொண்டிருந்தனர்? எத்தனை தட்டச்சு இயந்திரங்கள் இருந்தன? என்ன வசதிகள் இருந்தன? எத்தியாகம் செய்தேனும் படி்க்க வேண்டும் என்ற மாணவர்களும் எக்கஷ்டம் வந்தாலும் கற்றுக்கொடுக்க வேண்டும் என்ற விரிவுரையாளர்களும்தான் இருந்தார்கள்.

தற்போது இப்பல்கலைக்கழகத்தின் நிலை என்ன? சர்வதேச ஆய்வரங்குகளை ஏனையவர்கள் வியக்குமளவிற்கு நடாத்திக் கொண்டிருக்கின்றது. எமது மாணவ வெளியீடுகள் இலங்கையில் மட்டுமல்லாத ஏனைய உலகநாடுகளிலெல்லாம் சிறந்துமிளிர்கின்றார்கள். இவர்களுக்கு எந்த industry exposure கிடைத்தது? 

இப்பல்கலைக்கழகத்தின் பொறியியல் பீடத்தின் சமகால நிலையும் இப்பல்கலைக்கழகத்தின் ஆரம்பம்போன்றதுதான். முழுமையாக எல்லா வசதிகளும் கிடைப்பதென்பது ஆரம்பத்தில் சற்று கடினம் ஆனால் நாளடைவில் அது பூரணத்துவமடைந்துவிடும். பிறந்தவுடன் பிள்ளை ஓடிவிளையாட வேண்டுமென்று அடம்பிடிப்பது நியாயமற்றது.

தகவல் தொழில்நுட்பம் அளவுக்கதிகமான முறையில் வளர்ச்சியடைந்து காணப்படுகின்ற இக்காலகட்டத்தில் வருகைதரு விரிவுரையாளர்கள் ஒவ்வொரு நாளும் இங்குவந்துதான் கற்பிக்க வேண்டும் என்ற அவசியம் இருக்க வேண்டியதில்லை. செயல்முறை சார்ந்தவற்றைத் தவிர ஏனையவற்றை மெய்நிகர் விரிவுரையறைகள் மூலமாகவும் கொண்டு செல்லலாம். 

இப்பல்கலைக் கழகத்தின் பௌதீக மற்றும் மனித வளங்கள் தொடர்பான குறைபாடுகள் நீண்டகாலமாக முறைப்பாடுகளுக்கு உட்பட்டு வருகின்றதென்பது மறுக்க முடியாதது. ஆனால் அதனை ஒரு துருப்புச் சீட்டாக வைத்துக்கொண்டு அரசியல்வாதிகள் இப்பல்கலைக் கழகத்தினையும் இப்பிராந்தியத்தில் வாழும் மக்களையும் இரண்டாம் தரமானதாக நோக்குவது ஏற்றுக்கொள்ள முடியாதது. அதிலும் ஒலுவிலுக்கே வராதவர்கள் ஒலுவிலைப் பற்றிக்குறை பேசுவது கேளிக்கைக்குரியது.

இருக்கின்ற வளங்களைவைத்து பீடத்தைக் கொண்டுசெல்லும் அதேவேளை கட்டமைப்புசார் வசதிகளையும் மனிதவள அபிவிருத்தியையும் ஏற்படுத்துவதில் நிருவாகம் மிகவும் பிரயத்தனங்கள் எடுத்துவருகின்றதென்ற உண்மை மறுக்க முடியாதது. இப்பீடத்தின் மாணவர்கள் தியாகங்களுக்கு மத்தியில்தான் தங்களது கல்வி நடவடிக்கைகளை மேற்கொள்கின்றார்கள் என்பது தெளிவான உண்மை ஆனால் இந்த கஷ்டங்கள் நிரந்தரமானதல்ல. இவர்களுக்குப் பின்னர் வருபவர்கள் இக்கஷ்டத்தை அனுபவிக்கப் போவதுமில்லை.

இத்தியாகங்கள் செய்துகொண்டிருக்கும் இந்த இளம் மாணவர்களின் பதப்படுத்தப்பட்ட நிலையில் இருக்கும் மனங்களில் ஒருசில விசமிகளினால் பின்புலப்படுத்தப்பட்ட குழுக்கள் இலகுவில் அழிக்க முடியாதவாறு பேராசைகளை ஊட்டி வழிகெடுத்து இந்த இளரத்தங்களை நெறிபுரளச் செய்து தற்போது இப்பீடத்திற்கெதிரான கோஷமாக மாற்றியிருப்பது மிகவும் மனவருத்தத்திற்குரிய ஒரு உண்மையாகும்.

இப்பீட மாணவர்களின் பெற்றோர்களிடமும் இவ்வாறான மனநிலையை இவர்கள் உருவாக்கியிருப்பது மிகவும் கவலையளிக்கின்ற விடயமாகும். தனது பிள்ளைக்கு தரமான கல்வி கிடைக்க வேண்டும் என்பது எந்தப் பெற்றோரதும் அவாவாகும். இதனைச் சாதகமாகப் பயன்படுத்திப் பாதகமான எண்ணங்களை வளர்த்திருக்கின்றனர் இந்தக் குள்ளநரிக்கூட்டம்.

எனவே இருக்கின்ற குறைபாடுகளை வெகுவிரைவாக நிவர்த்தி செய்து இப்பீடத்தைத் தொடர்ந்தியங்கவைத்து எமது அன்பு மாணவர்களுக்குத் தரமான பொறியியல் கல்வியை தென்கிழக்குப் பல்கலைக் கழகத்திலேயே பெற்றுக் கொடுப்பதற்கு அரசியல், இன, மத வேறுபாடின்றி அனைவரும் ஒன்றிணைந்து செயற்படுவோம்.

Senior Lecturer in MIT

South Eastern University of Sri Lanka

Oluvil, Sri Lanka