ரவூப் ஹக்கீம் மட்டுமே எதிர்க்கின்றார் - சீறுகிறது ஹெல உறுமய
ஸ்ரீலங்கா முஸ்லிம் காங்கிரஸின் தேவைக்காக 62 இலட்சம் மக்களின் வாக்குகளை தாரைவார்க்க முடியாது எனத் தெரிவிக்கும் அரசின் பங்காளிக் கட்சியான ஜாதிக ஹெல உறுமய, தேர்தல் முறை மாற்றத்தை எதிர்க்கும் முஸ்லிம் காங்கிரஸின் பின்னணியில் சதித்திட்டம் இருப்பதாகவும் தெரிவித்தது.
பத்தரமுல்லையிலுள்ள ஜாதிக ஹெல உறுமயவின் அலுவலகத்தில் இடம்பெற்ற ஊடகவியலாளர்மாநாட்டில் உரையாற்றும் போதே கட்சி யின் ஊடகப்பேச்சாளரும் மேல் மாகாண சபை உறுப்பினருமானநிஷாந்த ஸ்ரீ வர்ணசிங்க இவ்வாறு தெரிவித்தார். இங்கு அவர் மேலும் உரையாற்றுகையில்,
ஜனாதிபதி மைத்திரிபால சிறிசேன தனது தேர்தல் விஞ்ஞாபனத்தில் தேர்தல் முறைமை மாற்றப்படுமென மக்களுக்கு உறுதியளித்திருந்தார். அதற்கமைய இன்று அனைத்து கட்சிகளும் கலந்து பேசி பல்வேறுபட்ட யோசனைகள் முன்வைக்கப்பட்டு ஆராயப்பட்டு சிறுபான்மை இனத்தினருக்கோ சிறு கட்சிகளுக்கோ பாதிப்பு ஏற்படாத விதத்தில் புதிய தேர்தல் முறைமை மாற்றம் தயாரிக்கப்பட்டுள்ளது. இது தொடர்பான பேச்சுவார்த்தைகளில் முஸ்லிம் காங்கிரஸின் பிரதி செயலாளர் நாயகம் நிசாம் காரியப்பர் கலந்து கொண்டு யோசனைகளை முன்வைப்பது மட்டுமன்றி இணக்கப்பாட்டையும் தெரிவித்திருக்கின்றார்.
ஆனால் முஸ்லிம் காங்கிரஸ் தலைவர் ரவூப் ஹக்கீம் எதிர்க்கின்றார்.
இது என்ன நியாயம்? மனோ கணேசன், திகாம்பரம், தமிழ் தேசியக்கூட்டமைப்பு உட்பட சிறுபான்மை கட்சிகள் அனைத்தும் தேர்தல் முறைமை மாற்றத்திற்கு ஆதரவு தெரிவித்துள்ளன. புதிய தேர்தல் முறைமை மாற்றத்தில் சிறுபான்மை இன மக்களுக்கோ சிறு கட்சிகளுக்கோ எவ்விதமான பாதிப்பும் இல்லை. எனவேதான் அக்கட்சிகள் அனைத்தும் இணக்கம் தெரிவித்துள்ளன.
ஆனால் ஹக்கீம் மட்டும் எதிர்க்கின்றார். அமைச்சரவை கூட்டத்திலும் எதிர்ப்பு வெளியிடுகின்றார். தனியொருவரின் எதிர்ப்பில் இன்று நாட்டுக்கு தேவையான முக்கியமான விடயம் தள்ளிப்போடப்பட்டுள்ளது.
தேர்தல் முறைமை மாற்றத்தை எதிர்க்கும் ஹக்கீம் அதற்கான காரணங்கள் என்னவென்பதை வெளிப்படுத்தாமல் உள்ளார். எனவே இதற்கு பின்னணியில் யாரோ உள்ளனர். சதி இடம்பெறுகின்றது என்ற சந்தேகம் எமக்கு ஏற்படுகின்றது. இன்று சிலர் நம்பிக்கையில்லா பிரேரணைகளை கொண்டு வருவதில் அதிக அக்கறை செலுத்துகின்றனர்.
சிலர் பாராளுமன்றம் கலைக்கப்பட வேண்டுமென்கின்றனர். இக்கூட்டத்தினரும் தேர்தல் முறைமையை மாற்றத்தை எதிர்ப்பவர்கள் என்றும் நிஷாந்த ஸ்ரீ வர்ணசிங்க தெரிவித்தார்.
Post a Comment