பெருநாள் விடயத்தில் சமூகத்தை மலினப்படுத்தாது மனப்பாங்குகளை மாற்றுங்கள்...!

நோன்பை நோற்பதிலும் பெருநாட்களைக் கொண்டாடுவதிலும் நாம் இன்னும் பிளவுபட்டுக்கொண்டே இருக்கிறோம். ஏன் இந்த நிலை. நமது ஒவ்வொரு பலவீனத்தையும்; பலமாக்குவதற்காக இஸ்லாத்தின் எதிரிகள், முஸ்லிம்களின் துரோகிகள் திட்டமிட்டுச் செயற்பட்டுக்கொண்டிருக்கையில் நாம் நமக்குள் அரசியல் ரீதியாகவும், கோட்பாடு ரீதியாகவும், கொள்கை ரீதியாகவும், இயக்கங்கள் ரீதியாகவும் இன்னும் இன்னும் பல்வேறு கோணங்களில் நமக்குள் ஒற்றுமை இல்லை என்பதை வெளிப்படையாக வெளிப்படுத்திக் கொண்டிருக்கின்றோம்.

ஒரு சமூகத்தின் கட்டுக்கோப்பை உடைத்து அதைக் கேவலப்படுத்தி ஏனைய சமூங்களின் பார்வையில் ஒரு  மலினமான எண்ணங்களைத் தோற்றுவித்து தொடர்ந்தும் எமது  சமூகத்தின் நிலை இதுதான் என்பதைக் காண்பித்துக் கொண்ருக்கின்றோம்.

ஆமாம், இன்று 8-8-2013 நம்மில் ஒருதொகையினருக்கு நோன்பு. மற்றும் ஒருதொகையினருக்கு பெருநாள்.  நாங்கள் பிளவுபட்டவர்கள் எங்களுக்குள் ஒற்றுமையில்லை. நாங்கள் இப்படித்தான் வாழ்கிறோம் என்று ஏனையவர்களுக்கு புடம்போடுகிறார்கள். இவர்கள் மனங்களில் ஏற்றுக்கொள்ளும், விட்டுக்கொடுக்கும் புரிந்து கொள்ளும் மனப்பாங்கு உருவாக வேண்டும். அந்த நேர்மறை மனப்பாங்கை உருவாக்க முயற்சிக்க வேண்டும்.

07-08-2013 பிறை தென்பட்டதா இல்லையா பெருநாளா இல்லையா எனத் தீர்மானிப்பதற்கென்று ஒரு குழு நம்மாட்டில் சகல அமைப்புக்களையும் சார்ந்ததாக உருவாக்கப்பட்டு அது அதன் முடிவைஅறிவித்துள்ளது.

அந்த முடிவு உண்மையில் உண்மையை மறைத்து யாரோ ஒரு கூட்டத்தின் தேவைக்காக அவர்களின் நலனுக்காக வெளியிடப்பட்டிருந்தால் அதற்கான முழுத் தண்டனையையும் அவர்கள் வல்ல அல்லாஹ்விடம் நிச்சயம் பெற்றுக்கொள்ளவார்கள். அதற்கு நாம் பொறுப்பாளிகள் அல்ல. அதற்குரிய தீர்ப்பை வல்ல அல்லாஹ்விடம் ஒப்படைத்து விடுவோம்.

இவ்வாறான நிலைமைகள் இந்நாட்டில் வாழும் முஸ்லிம் சமூகத்தின் முகத்திரையை கிழியச் செய்து, மேலும் மலினப்படுத்தும் செயலாகவே அமைகிறது. நமது பொல்லை நாமே கொடுத்து அடிவாங்கும் நிலையை  இந்த ஏற்றுக் கொள்ளா மனப்பாங்குகள் நிச்சயம் உருவாக்கும். 

சமூக ஒற்றுமைக்காக முழு நோன்பு நாட்களிலும் இப்தார் வைபவம் நடத்திய நாம் நமக்குக்குள் ஒற்றுமைப்படாது நாம் விரும்பியோ விரும்பாமலோ பிரிவினையை வெளிப்படுத்தியுள்ளோம்.

முஸ்லிம் சமூகத்திடையே பிளவைத் தோற்றுவித்து இஸ்லாத்தின் எதிரிகளுக்கு தீனி போடுகிறார்கள். நிச்சயம் இவர்களும் சமூகத்தின் ஒற்றுமையை சீர்குழைத்து சல்லடையாக்கும் குற்றத்துக்கான தண்டனையை நிச்சயம் வல்ல அல்லாஹ்விடம் பெற்றுக்கொள்வார்கள். அல்லாஹ் இவர்களின் மனப்பாங்கில் மாற்றத்தை உருவாக்குவானாக.

பிரிவினைகள் ஏற்றுக்கொள்ளாத மனப்பாங்குகள் நம்மை மட்டும் மாத்திரமின்றி நமது எதிர்கால சந்ததிகளையும் பாதிக்கும் என்பதை மனதில் இவர்கள் நிறுத்திக்கொள்ள வேண்டும்.

நாம் நமது மனப்பாங்குகளை மாற்றிக்கொள்வதன் மூலம் நமது வாழ்கையின் ஒவ்வொரு படியையும் மாற்றிக்கொள்ள முடியும் ஒவ்வொரு தனிநபரும் ஒரு  ஒரு சமூகத்தின் அங்கத்தவராகிறார். அந்தவகையில், ஓவ்வொரு தனி மனிதனும் தமது மனப்பாங்கில் மாற்றத்தை ஏற்படுத்தி மாறுகின்றபோது அவர் அங்கம் வகிக்கும் குழுவிலும், இயக்கத்திலும் அவன் சமூகத்திலும் மாற்றத்தை ஏற்படுத்த முடியும். ஆனால் உளவியல் தத்துவ அறிஞர் லியோ டால்ஸ்டாய் கூறுவது போன்று 'ஒவ்வொரு மனிதனும் உலகத்தை மாற்ற வேண்டும் என நினைக்கிறான். ஆனால் ஒருவர் கூட தன்னை மாற்றிக்கொள்ள வேண்டுமென நினைப்பதில்லை.' இதுதான் இச்சமூகத்தின் ஒற்றுமையை சீர்குழைத்து சின்னாபின்னமாக்கும் நிலையாகும். 

அல்லாஹ் ஏனையோரையும் பாதுகாப்பானாக 

அல்லாஹ் அக்பர்