குனூத் ஓதும்போது ஆயுதம் கேட்பீர்களா..? ஜனாதிபதி மஹிந்தவிற்கு ஏற்பட்டுள்ள சந்தேகம்

ஜனாதிபதி மஹிந்த ராஜபக்ஸ தலைமையிலான சிறப்பு அமைச்ரவை கூட்டம் வியாழக்கிழமை, 14-02-2013 அலரி மாளிகையில் நடைபெற்றுள்ளது.

முஸ்லிம் அமைச்சர்களும் பங்கேற்றுள்ள இக்கூட்டத்தில் ஜனாதிபதி மஹிந்த ராஜபக்ஸ எழுப்பிய கேள்வியொன்று முஸ்லிம் அமைச்சர்களை விசனமடையச் செய்துள்ளதுடன், அவர்கள் இதுதொடர்பில் தமது வேதனைகளையும் ஜப்னா முஸ்லிம் இணையத்துடன் பகிர்ந்துகொண்டனர்.

நாட்டில் முஸ்லிம்களுக்கு நெருக்கடி ஏற்பட்டுள்ளதாகவும், இதனால் முஸ்லிம்கள் பள்ளிவாசல்களில் தொழுகை நேரங்களில் குனூத் ஓதுமாறும் ஜம்மியத்துல் உலமா சபை முஸ்லிம்களிடம் வேண்டுகோள் விடுத்திருந்தது. இந்நிலையில் ஜனாதிபதி மஹிந்த ராஜபக்ஸ முஸ்லிம் அமைச்சர்களை பார்த்து, குனூத் ஓதும்போது ''ஆயுதங்களையும் தாருங்கள் என முஸ்லிம்கள் பிரார்த்தனை செய்ய மாட்டார்களா..? என கேள்வியெழுப்பியுள்ளார்.

ஜனாதிபதி மஹிந்த ராஜபக்ஸவிடமிருந்து எழுந்த இந்தக் கேள்வியை சற்றும் எதிர்பார்க்காத முஸ்லிம் அமைச்சர்கள் வாயடைத்து நின்றுள்ளனர்.

ஜனாதிபதி மஹிந்த ராஜபக்ஸவிடமிருந்து எழுந்த இந்தக் கேள்வியை சற்றும் எதிர்பார்க்காத முஸ்லிம் அமைச்சர்கள் வாயடைத்து நின்றுள்ளனர். பின்னர் ஒரு முஸ்லிம் அமைச்சர் ஜனாதிபதியை பார்த்து, முஸ்லிம்கள் நாட்டின் ஒற்றுமைக்காகவும், சகிப்புத் தன்மைக்காகவும்கூட குனூத் ஓதுகிறார்கள். இது நாட்டிற்கெதிராகவோ இல்லை எந்த சமூகத்திற்கெதிராகவோ இறைவனிடம் இறைஞ்சும் விவகாரம் அல்ல எனவும் சுட்டிக்காட்டியுள்ளார்.

அத்துடன் இக்கூட்டத்தில் பங்கேற்ற ஏனைய முஸ்லிம் அமைச்சர்களும் இதுதொடர்பில் தமது கருத்துக்களை அங்கு ஜனாதிபதியுடன் பகிர்ந்து கொண்டுள்ளனர்.

எனினும் ஜனாதிபதியுடனான சந்திப்பின் பின் கருத்து வெளியிட்டுள்ள சில முஸ்லிம் அமைச்சர்கள் மிகுந்த மனவேதனையடைந்த நிலையில் காணப்பட்டதாகவும் அறியவருகிறது. இக்கூட்டத்தில் பேசப்பட்ட மேலும் சில விடயங்களை ஜப்னா முஸ்லிம் இணையத்துடன் முஸ்லிம் அமைச்சர்கள் பகிர்ந்துகொண்ட போதிலும்  சில காரணங்களுக்காக நாம் அவற்றை இணையத்தில் பதிவிடுவதை தவிர்த்துள்ளோம் என்பது குறிப்பிடத்தக்கது.