சவூதி அரேபியாவுக்கு எதிராக விசாரணை அவசியம் - எல்லாவல மேதானந்த தேரர்

முஸ்லிம்களின் ஷரீ ஆ சட்டத்தை "படு பயங்கரமான படுகொலைச் சட்டம்' என வர்ணித்துள்ள ஜாதிக ஹெல உறுமய, மனித உரிமைகளைப் பற்றி பிதற்றிக்கொள்ளும் அமெரிக்கா, ரிஸானா நபீக்கை படுகொலை செய்த சவூதி அரேபியாவுக்கு எதிராகத்தான் ஜெனிவாவில் பிரேரணை கொண்டுவர வேண்டும் என்றும் வலியுறுத்தியுள்ளது.

அதேவேளை, தேசிய கீதம் பெரும்பான்மை இனத்தவர்களின் மொழியிலேயே இசைக்கப்படவேண்டும் என்ற நிலைப்பாட்டில் உறுதியாக இருக்கும் அந்தக் கட்சி, வாசுவின் யோசனையை அரசுக்கு எதிரான நடவடிக்கை என்றும் சுட்டிக்காட்டியுள்ளது.

உத்தியோகபூர்வ விஜயமொன்றை மேற்கொண்டு இலங்கைக்கு வந்துள்ள அமெரிக்க இராஜதந்திரிகள் குழு நேற்றுமுன்தினம் கொழும்பில் செய்தியாளர்களைச் சந்தித்து இலங்கை விடயத்தில் அமெரிக்காவின் நிலைப்பாடுகள் தொடர்பில் தெளிவுபடுத்தியது. 

இதன்போது ஊடகவியலாளரொருவர் எழுப்பிய கேள்விக்குப் பதிலளித்த மூவர் அடங்கிய அமெரிக்க "திரிசூல குழு' கொழும்பு நிர்வாகத்துக்கு எதிராக ஜெனிவா தொடரில் மீண்டுமொருமுறை பிரேரணை கொண்டுவரப்படவுள்ள விடயத்தை உறுதிப்படுத்தியது தெரிந்ததே.

அமெரிக்காவின் இந்த அறிவிப்புக்கு எதிராக அரச பங்காளிக்கட்சிகளும், கடும்போக்குடைய சிங்களப் பேரினவாத அமைப்புகளும் போர்க்கொடி தூக்கியுள்ளன. இந்நிலையில், அமெரிக்க இராஜதந்திரக்குழுவின் மேற்படி கருத்து தொடர்பில் ஜாதிக ஹெல உறுமயவின் நாடாளுமன்ற உறுப்பினர் எல்லாவல மேதானந்த தேரரிடம்  கருத்து கேட்கப்பட்டது. 

இதன்போது அமெரிக்காவின் அறிவிப்பை வன்மையாகக் கண்டித்த அவர், இலங்கையின் தற்போதைய நிலைவரங்களையும் எடுத்துரைத்தார். இந்த நாட்டில் புலிகள்தான் அசம்பாவிதங்களைப் புரிந்தனர். தமிழ், முஸ்லிம், சிங்களம் எனப் பாகுபாடின்றி அனைவருக்கும் எதிராக வன்முறைகளைக் கட்டவிழ்த்துவிட்டனர். தீவிரவாதத்துக்கு எதிராகக் குரல்கொடுத்தவர்களை மரணப்படுக்கையில் இருத்தினர்.

யுத்தத்துக்குப் பின்னர் தற்போதைய அரசு நாட்டில் பல துரித நடவடிக்கைகளை முன்னெடுத்து வருகின்றது. சிங்களப் பகுதிகளை விட தமிழர் பகுதிகளுக்கு முக்கியத்துவம் வழங்கப்படுகின்றது என்றும் மேதானந்த தேரர் கூறினார்.

எனவே, இலங்கையில் இவ்வாறு நல்லெண்ண செயற்பாடுகள் துரிதமாக முன்னெடுக்கப்படும் தறுவாயில், அரசுக்கு எதிராகப் பிரேரணை கொண்டுவருவதை அனுமதிக்க முடியாது. புலிகள் மனித உரிமை மீறல்களில் ஈடுபட்டது அமெரிக்கா உள்ளிட்ட சர்வதேச நாடுகளுக்குப் புரியாதா என்றும் அவர் கேள்வி எழுப்பினார்.

அமெரிக்காவோ அல்லது இதர நாடுகளோ மனித உரிமைகளைப் பற்றிப் பேசுகின்றன. ஆனால், சவூதிக்குப் பணிக்குச் சென்ற ரிஸானா நபீக் கழுத்து வெட்டி படுகொலை செய்யப்பட்டுள்ளார். மிகவும் கொடூரமான முறையில் கழுத்து வெட்டப்பட்டுள்ளது. 

கழுத்தை வெட்டிக்கொலை செய்யுமாறு எவருமே கூறவில்லை எனவும் தேரர் சுட்டிக்காட்டினார். அத்துடன், முஸ்லிம்களின் சரி ஆ சட்டமானது படுகொலைச்சட்டம் எனக் குறிப்பிட்ட அவர், இவ்வாறு மனிதப் படுகொலை புரியும் சவூதிக்கு எதிராகத்தான் அமெரிக்கா உள்ளிட்ட நாடுகள் ஜெனிவாவில் பிரேரணை கொண்டுவர வேண்டுமென்றும், மாறாக இலங்கை போன்ற நாடுகளுக்கு அல்லவென்றும் சுட்டிக்காட்டினார்.

தேசிய கீதச் சர்ச்சை

ஒரு நாட்டில் பெரும்பான்மையாக வாழும் இனத்தின் மொழியில்தான் தேசிய கீதம் இசைக்கப்படவேண்டும். அதுதான் வழமையும் கூட. திருகோணமலையில் நடக்கும் சுதந்திரதின விழாவில் தமிழில் தேசிய கீதம் இசைக்கப்பட்டால், மஹியங்கனையில் நடக்கும் நிகழ்வுகளின்போது வேடுவ மொழியில் தேசிய கீதம் இசைக்கவேண்டிய நிலை ஏற்படும்.

அரசின் நல்லெண்ண செயற்பாடுகளைத் திசைதிருப்பும் யோசனையே இதுவாகும். தமிழர்களுக்கு எதிரானவர்கள் அல்லர் நாம். ஏனைய விடயங்களிலும் தமிழர்களுக்கு இடமளிக்க வேண்டும். ஆனால், தேசிய கீதம் ஒரு மொழியில்தான் இருக்க வேண்டும்; இசைக்கப்பட வேண்டும்  என்று மேலும் தெரிவித்தார் எல்லாவல மேதானந்த தேரர்.