'என்ற மகள மௌத்தாக்கிட்டாங்களே..! - றிசானாவின் தாயார் கதறியழுகை...!!

எமது யாழ் முஸ்லிம் இணைய கையடக்க தொலைபேசிக்கு இன்று புதன்கிழமை, 9 ஆம் திகதி றிசானா நபீக்கின் தாயார் 2 தடவைகள் அழைப்பெடுத்திருந்தார். அவர் அழைப்பு எடுக்கும் நேரத்தில் எம்மால் பதிலளிக்க முடியவில்லை.

பின்னர் நாம் றிசானாவின் தாயாருக்கு தொலைபேசி அழைப்பெடுத்தோம். ''மகன் உண்மையைச் சொல்லுங்கள் இப்போது என்ன நடக்கிறது, என்ற மகளுக்கு எதுவும் நடந்திடாதே... என்று வினவினார்.

இல்லா உம்மா..., உங்க மகளுக்கு எதுவும் நடக்காது, நீங்கள் அவருக்காக பிரார்த்தனை செய்யுங்கள். நாங்களும் உங்கள் மகளுக்காக பிரார்த்தனை செய்கிறோம் என்று' நாம் றிசானாவின் தாயாருக்கு ஆறுதல் கூறினோம்.

'மகன்... என்ற மகள பத்தி நல்லதோ, கெட்டதோ எதுவென்றாலும் எனக்கு உடனடியாக அறிவிச்சுடுங்க, எல்லா முஸ்லிம்களையும் என்ற மகளுக்காக துஆ கேட்க சொல்லுங்கோ என்றும் சகோதரி றிசானாவின் தாயார் குரல் தளர்ந்த நிலையில் கூறவே, சரி என்று சொல்லிவிட்டு நாம் தொலைபேசி அழைப்பை நிறுத்திக்கொண்டடோம்.

ஏற்கனவே வந்த செய்திகளை எமது இணையத்தில் பதிவேற்றிவிட்டு, றிசானாவின் தாயார் எமக்கு வழங்கிய செய்திகளை (தனது மகளுக்காக முஸ்லிம்கள் துஆ செய்யவேண்டும்) என்ற செய்தியை பதிவிடுவோம் என நினைத்திருந்தோம்.

அப்போதுதான் அந்த துயரச்செய்தி எமது இணையத்திற்கு வந்தடைந்தது. ஆம் சகோதரி றிசானா நபீக்குக்கு மரண தண்டனை நிறைவேற்றப்பட்டுள்ளது என்ற செய்தியாகும்.

இச்செய்தியை உறுதிப்படுத்திக்கொள்ள உடனடியாகவே சவூதி அரேபியாவில் உள்ள டாக்டர் கிபாயா இப்திகாருடைய கையடக்க தொலைபேசிக்கு அழைப்பு மேற்கொண்டடோம். அவரும் படபடத்த குரலில் றிசானாவுக்கு மரண தண்டனை நிறைவேற்றப்பட்ட செய்தியை உறுதிப்படுத்தினார்.

இன்னா இலைஹி வஹின்னா இலைஹி ராஜுஊன் என்று கூறியவர்களாக றிசானாவின் தாயாருக்கு மீண்டும் தொலைபேசி அழைப்பெடுத்தோம். அழுதுகொண்டே பதில் வழங்கிய அவரிடம் இன்னா இலைஹி வஹின்னா இலைஹி ராஜுஊன் என்று கூறவே '' மகன் என்ற மகளே மௌத்தாக்கிட்டாங்களே..'' 'என்ற புள்ள என்ன குற்றம்  செய்தாள்'...? என கதறியழ தொடங்கினார். அந்த தாயின் அழுகுரலை கேட்கும் சக்தியற்று உம்மா.. பின்னர் கதைக்கிறேன் எனக்கூறிவிட்ட தொலைபேசியை துண்டித்துகொண்டேன்...!

இப்போது றிசானாவின் மறுமை வாழ்வுக்காக பிரார்த்திப்பதை தவிர எமக்கு வேறு வழியில்லை..!